Hero Omken

Vun Wikipedia

Hero Omken, ok nömmt Hero Omken de Jüngere († 1522) weer en oostfreesch Hööftling in't Harlingerland. Dat beherrsch he meest 50 Johr lang, van 1473 bit to sien Dood 1522. Sien Öllern weern Sibet Attena un Onna van Stedesdorf, de en Dochter vun Hero Omken den Ölleren weer.

Hero Omken nehm de Familiennaam vun sien Moder an. Dat weer in Oostfreesland woll nich begäng, aber mögelk. Dormit hett he sück up de een Siet vun de Politik vun sien Vader afsett, de immer en trüe Gefolgsmann un Früend vun de Cirksena ween weer. Up de anner Siet hett he sück dormit ok vun de Kinner vun sien Vader ut de sien tweet Ehe distanzeert, de he de Mitregentschap verwiegern dee, ofschons se eegentlich testamentarisch vun Sibet Attena verfügt wurrn weer.

Hero Omken sien Gegnerschap to de Grafen vun Oostfreesland ut dat Huus Cirksena stook laatstens to de Tiet in Oogen, as he Armgard, en Dochter vun den Grafen Gerd vun Ollnborg heiraaten dee. De Ollnborger weern to de Tiet de wichtigste Gegner vun Oostfreesland.

Sien Halfbröer Ulrich vun Doorm, de Anspröök up de Mitregentschap in't Harlingerland stellen dee, gestunn Hero blots en finanzielle Affinnen to. Ok sonst geev he nich völ up dat Testament vun sien Vader, harr de doch verfügt, dat sien Kinner den Cirksena de Trüe hollen sullen. Ganz in' Gegendeel, hero hett jeder Gelegenheit bruukt, um den Grafen Edzard vun Ostfreesland to schaden, besünners as de 1514 in de Sächsische Fehde verwickelt wurr un in de Rieksacht full.

Edzard hett sück nah sien Rehabiliteeren sienersiets mit Överfälle rächt un versöch, sien vun den Kaiser tosekert Anspröök up dat Harlingerland dörtosetten. Hero Omken kunn de Unafhängigkeit vun dat Harlingerland aber noch bewohren. Nah sien Dood 1522 wurr sien Söhn Balthasar vun Esens sien Nahfolger.

Sien Dochter Onna (Anna) († nah 1559) weer mit Otto III. von Rietberg verheiraadt. Nah den Dood vun Balthasar keem somit Esens so an de Grafen von Rietberg.

De Söhns Sibo (†1520) un Kasper (†1521) keemen in den Kamp för en Verwandten, den däänschen König Christian II. to Dood. Kasper full bi den Storm up Königsbarg.[1]

Literatur[ännern | Bornkood ännern]

Einzelnachweise[ännern | Bornkood ännern]

  1. Hilkert Weddige, Koninc Ermenrîkes Dôt:die niederdeutsche Flugschrift "Van Dirick van dem Berne" und "Van Juncker Baltzer" : Überlieferung, Kommentar, Interpretation, Band 76, S. 18