Gustav Evertsson Horn

Gustav Evertsson Horn (* 28. Mai 1614 in Lemu; † 27. Februar 1666 in Stood) weer en sweedschen Offzeer un Politiker.

Horn is 1614 as Söhn von Feldmarschall Evert Horn un Margareta Fincke in Lemu in dat egentliche Finnland boren, wat do to Sweden höört hett. In dat sweedsche Militär is he 1635 Hauptmann worrn, 1640 Oberst un 1647 Generalmajor von de Kavallerie. An’n 30. April 1651 hett Sweden em tohoop mit sien Vedder Henrik Horn den Rang von en Baron geven. 1652 is he Generalleutnant worrn.

1653 is he Liddmaat von’n sweedschen Rieksraad worrn un 1654 as Nafolger von Erik Stenbock Generalguvernör von Ingermanland un Kexholm. Dat is he bet 1657 bleven, as em Krister Klasson Horn aflööst hett. He is denn Generalguvernör von Finnland worrn un hett Per Brahe in dit Amt aflööst. Dor hett he aver al 1658 dat Amt an Herman Fleming afgeven.

1656 is he General worrn, 1658 Riekstüügmeester un 1663 Feldmarschall.

1663 hebbt se em denn as Nafolger von Hans Christoff von Königsmarck as Generalguvernör von Bremen-Veern insett. Dat is he bet to sien Dood bleven. Na sien Dood hett Henrik Horn dat Amt as Generalguvernör övernahmen.

Horn hett an’n 20. August 1638 in Stralsund Maria Mörner (1619-6. Februar 1643) freet. De beiden harrn veer Kinner. De eerste Deern is 1639 boren un kort na de Geboort doodbleven. De annern weren Evert (1640–1687), Margaretha (13. Juni 1641-23. Juni 1663) un Maria (* 1642). Na’n Dood von sien eerste Fro hett Horn an’n 20. September 1644 in Stockholm Barbro Kurck († 29. Februar 1658) freet. Mit ehr harr he de Dochter Märta (1646-7. April 1668). De beiden harrn noch twee Kinner, dat een, Brita, is 1651 doodbleven un dat annere, en Söhn, is as jung Kind doodbleven. As drüdde Fro hett Horn an’n 19. März 1661 in Stockholm Maria Silfverhjelm (27. Oktober 1634-11. Juli 1712) freet. De beiden hebbt dree Kinner hatt. De eerste Söhn is 1662 boren un as Kind doodbleven, de Dochter Christian Gustafviana is 1663 boren un ok jung doodbleven un de Söhn Carl hett von 1665 bet 1711 leevt.

Gustav Horn is begraven in de Domkark von Åbo.