Friedrich August Lessen

Vun Wikipedia

Friedrich August Lessen (* 7. Juni 1780 in Malchow; † 21. Januar 1827 in Marlow) wier ’n Mäkelborger Schriftsteller.

Läben[ännern | Bornkood ännern]

Sien Vadder wier Koekenmeister von dat Klooster Malchow. In sien Jungsjohren hett Lessen Privatünnerricht krägen un is nahdem nah Königsbarg gahn un hett dor studiert. In London un Sweden hett hei donn as Angestellten in Hannelshüüser arbeit. 1813 würd hei Soldat un kämpfte gegen Napoleon. Nah den Krieg güng hei as Primierleutnant trügg nah Mäkelborg, oewer hei künn dat dor as Börger nich uthollen. Hei harr sick dat in Kopp sett, de Greeken in ehren Kampf gegen de Törken tau helpen un so treckte hei 1822 nah Greekenland. Von de Reis un de Begäbenheiten in dat Land vertellt hei in sien Bauk „Hellenia“. 1823 güng hei wedder taurügg nah Mäkelborg, wur hei donn ook 1827 in Armaud doot bläben is.

Hellenia[ännern | Bornkood ännern]

„Helenia“ is 1824 in Rostock rutkamen. Hei hett dat in Strophenform dicht. Dat is oewer nich bloß ’n Gedicht oewer de Reis, hei beschrifft dor ook, wat hei sick dröömt harr, woans de Städer, de hei besöcht harr, utsehgen, woans de Minschen dor läben un woans dat in Grekenland würklich wier, indem dat dat nich miehr väl mit dat tau kriegen harr, wat hei dor so oewer lääst harr. Hei hett dacht, dat hei mit all sien Erfohrung dor nahstens General warden künn, oewer dat wier nich so. Hei sehg, wo arm de Lüd dor wieren un dat dat mit de Idyllen in de Bäuker nich tau verglieken wier. De Text is oewer ook bannig wichtig för de Spraakforschung, wiel dat dor de Koseform -ing in tau finnen is, de dat bloß in’t Mäkelborgsch-Vörpommersch gifft. Hei is ein von de iersten, de dat schrifft, so kann’n dor „Frünting“, „netting“ un „lising“ in läsen.

Bäuker[ännern | Bornkood ännern]

Hellenia. Ein Taschenbauck. Rostock, drückt bi Adlers Arben. 1824 (nie’e Utgaav 2006).

Schilderung einer enthusiasmirten Reise nach Griechenland im Jahr 1822, C. G. Zobel, Görlitz 1823 (miehrstendeils up hochdütsch, Uttog ut Hellenia, Str. 478-492, up S. 125 - 128).

Bäuker oewer Lessen[ännern | Bornkood ännern]

Eva-Sophie Dahl: Die „Hellenia“ des Friedrich August Lessen. Dichtung und Sprachdenkmal eines Mecklenburgers aus dem frühen 19. Jahrhundert, in: Jahrbuch des Vereins für niederdeutsche Sprachforschung 87 (1964), S. 107 – 138.

Weblenken[ännern | Bornkood ännern]