Schachbrettflegen
| Schachbrettflegen; Fleeschflegen | ||||||||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
 | ||||||||||||||||||||||||||||
| Systematik | ||||||||||||||||||||||||||||
| ||||||||||||||||||||||||||||
| Wetenschoplich Naam | ||||||||||||||||||||||||||||
| Sarcophagidae | ||||||||||||||||||||||||||||
| Macquart, 1834 |
De Schachbrettflegen oder Fleeschflegen (Sarcophagidae) sünd en Familie mank de Flegen (Brachycera). Se weert mit to de Tweeflunken (Diptera) torekent. Weltwiet gifft dat bi 2.500 Aarden. Tein vun jem sünd ok in Düütschland tohuse.
Kennteken
[ännern | Bornkood ännern]Schachbrettflegen sünd grau oder swatt, faken is dat Achterlief tekent, as en Schachbrett. Dor hefft se ok ehrn Naam vun her. Anners heet se ok Fleeschflegen. Dat is en ungefähr Oversetten vun den wetenschopplichen Naam Sarcophagidae, wat „Fleeschfreters“ bedüden deit. An un for sik passt de Naam nich sunnerlich, en egen Familie aftogrenzen, denn de Budden un Flegen vun düsse Familie vertehrt nich annere Saken, as u. a. ok de Brummers (Calliphoridae). De adulten Flegen freet gorkeen Fleesch. Up’e Bost (Thorax) sitt dunkere Langsstriepen. Schachbrettflegen könnt bit hen to 15 Millimeters lang weern. As Mundwarktüüch hefft se Suugrüssels to’n Uplicken vun allerhand Fleetstoffe.
Wat se freten doot
[ännern | Bornkood ännern]De Budden vun de allerhand Aarden vun de Schachbrettflegen freet ganz verscheden Saken un leevt in ganz verscheden Substrat:
Aas- un Schietfreters
[ännern | Bornkood ännern]Blangen de Budden, de as Rövers na Büte jaagt, höört to de ollerhaftigsten Aarden de, de sik vun Aas nehrt oder Schiete freten doot.
Parasiten un Parasitoide
[ännern | Bornkood ännern]En Reeg vun annere Aarden sünd Parasitoide un leevt an oder in warvellose Weerten. To düsse Weerten höört u. a. Mettjen, Sniggen, Dusendfööt, Skorpione, Kakerlaken, Kävers un Zikaden. De wecken Aarden leevt ok as Kleptoparasiten un klaut annere Deerter ehre Büte.
De wecken Aarden leevt ok as Endoparasiten vun Amphibien un Reptilien (as Eerdkrupers un Schildpadden), man ok up Söögdeerter (se könnt ok Minschen befallen).
Flegen
[ännern | Bornkood ännern]De adulten Flegen freet keen Fleesch, man nehrt sik vun allerhand Ssapp, as vun Honnigdau, Nektar, Boomssapp un den Ssapp vun Früchte, de wat afkregen hefft.
Wat for’n Geslechter dat mank de Schachbrettflegen gifft (Utwahl)
[ännern | Bornkood ännern]Echte Schachbrettflegen– Geslecht Sarcophaga
[ännern | Bornkood ännern]De Budden vun de Sarcophaga-Aarden leevt meist in Aas oder Schiete. In Düütschland gifft dat sunnerlich de Graue Schachbrettflege (Sarcophaga carnaria). Se kann 13 bit 15 mms lang weern. Se warrt ok „Graue Fleeschflege“ oder „Aasflege“ nömmt. Dat Seken leggt al bannig riepe Eier in den Ingang vun Mettjenlöcker oder ok in de Mettjen ehre Schietbulten. Dat duert denn nich lang, un de Budde kruupt ut. Wohrschienlich könnt se de Mettjen rüken un krabbelt dor denn hen un bohrt sik dor rin, faken bi den Gördel (Clitellum). Dat duert bloß en paar Dage, denn is de Budde utriept un de Mettje is doot. In’t Johr gifft dat en ganze Reeg vun Generatschonen bi düsse Flege. Overwintern könnt se as Budden oder as Poppen.
Trabantenflegen – Geslecht Senotaina
[ännern | Bornkood ännern]De Trabantenflegen luert an de Nester vun Graavwöpsen, wenn de ehre benusselte Büte for ehre egen Budden nahuse sleept. Se loopt dor denn achteran un leegt en Ei up de Büte. Dor kann denn de Flege ehre Budde in wassen un nich de Budde vun de Graavwöpse. To de Trabantenlegen höört u. a. S. albifrons un S. conica.
Geslecht Miltogramma
[ännern | Bornkood ännern]Liek as de Trabantenflegen leevt ok de Budden vun dat Geslecht Miltogramma in de Nester vun Immen un Wöpsen vun den Bestand vun ehre „Gastherren“. Nich bloß benusselte Insekten, man ok Honnig un Pollen vertehrt se dor. De Budden vun Blesoxipha laticornis sünd Binnenparasiten bi Feldhaupeer un de vun Agria mamillata Butenparasiten bi allerhand Insekten.
-
Graue Schachbrettflegen (Sarcophaga carnaria) paart sik -
Vun boven bekeken: Graue Schachbrettflege
Literatur
[ännern | Bornkood ännern]- J. und H. Haupt: Fliegen und Mücken – Beobachtung, Lebensweise, Augsburg 1998.
- K. Honomichl, Heiko Bellmann: Biologie und Ökologie der Insekten; CD-Rom, Gustav Fischer Verlag, Stuttgart 1994.
