Finanzkrise 2007/2008

Vun Wikipedia
En Middelsmann för Hypotheken maakt Warf för Kreditnehmers, mit de jemehr Bonität dat nich to’n Besten steiht.

De Finanzkrise 2007/2008 is en Bank- un Finanzkrise, de al in’n Vörsummer 2007 in de USA losgüng. Dormols hett dat in de Vereenigten Staten de Subprimekrise geven. In Düütschland warrt dor ok eenfach US-Immobilienkrise to seggt. Mit düssen Naam warrt en Krise betekent, de över de ganze Welt hen en bannige Reeg vun Bankhüser un jem ehre Kunnen bedrapen hett. Dor is dat to grote Verlusten un to allerhand Insolvenzen rund üm de Eer bi kamen.

Utlööst wurrn is düsse Krise, as in de USA de Priesen för Immobilien nich mehr kladdern wollen un to’n Deel al bargdal güngen. To glieke Tiet schaffen jummers mehr Kreditnehmers dat nich mehr, jem ehre Krediten to bedenen un af to betahlen. Vunwegen dat dat al to en Immobilienblaas kamen weer, flöög de nu ut’neen.

Toeerst bedrapen weern de so nömmten Subprime-Krediten. Dat sünd Krediten, de to’n groten Deel utgeven weert an Kreditnehmers, de süms nich veel Geld hefft. Düsse Krediten sünd vun grote Investmenthüser tohopensammelt un to grote Packen tohopensnöört wurrn. Andeelspapieren an düsse Schuldpacken hefft de Hüser denn an Lüde verköfft, de sik dor vun verspreken döen, düsse Papieren, de schollen woll oorntlich wat afsmieten. De groten „Rating-Agenturen“, dat sünd de Hüser de pröven doot, wat so’n Andeelspapieren weert sünd, harrn toeerst ok ordeelt, dor weer rein gornix verkehrt an, an düsse Subprime-Papieren.

As denn avers de Markt tohopenstört weer, weer över de ganze Welt hen de Finanzkrise dor. Een Bankhuus na’n annern möss togeven, dat se sik ok mit Subprime-Papieren afgeven harrn. Verscheden grote Hüser sünd dor bi över Kopp gahn oder sünd vun’n Staat övernahmen wurrn. De Benelux-Länner hefft de Fortis-Grupp, de up wackelige Been stünn, mit 23 Milliarden Euros unner de Arms grepen. In Düütschland kemen toeerst de IKB, un later, in’n Oktober 2008 de Hypo Real Estate eernsthaftig in’e Bredullje. Bi de Hypo-Real-Estate-Bank weern 50 Milliarden Euro nödig, dat dat Bankhuus nich unnergüng. Iesland stünn an’n Rand vun en Staatsbankrott. In Grootbritannien, warrt seggt, sünd tominnsten 50 Milliarden Euros nödig, üm dat een oder annere grote Bankhuus to redden. De US-Kongress hett en Kredit vun 700 Milliarden Euros an US-Banken geven, dat se nich in’n Afgrund störten doot.

Alltohopen, so hett de Internatschonale Währungsfond taxeert, sund vunwegen de Finanzkrise vun April bit Enne September 2008 bit hen to 945 Milliarden US-Dollar (603 Milliarden Euro) verloren wurrn.[1] In’n September 2008 seggt de IWF, dat weern alltohopen bi taxeerte 1,3 Bio. US-Dollar, man vun en Deel vun düsse Summ weer de Sake midderwielen afhaakt vunwegen Abschreibungen un Kapitalerhöhungen[2]

Borns[ännern | Bornkood ännern]

  1. Dramatische IWF-Schätzung – Hypothekenkrise kostet eine Billion Dollar Der Spiegel, 8. April 2008
  2. [1] „The Global Economy and Financial Crisis“, Reed vun John Lipsky, First Deputy Managing Director, International Monetary Fund, 24. September 2008