Eko Fresh

Vun Wikipedia

Eko Fresh (* 3. September 1983 in Köln; boren as Ekrem Bora) is en Rapper, de düütsch singt un vun törksche Öllern afstammen deit.

Leben

Anfang

Ekrem Bora is in Köln boren un in Mönchengladbach upwussen. Vun sien 16. Johr af an hett he sik in dat Rappen öövt. Na de 10. Klass is he dorüm ok vun dat Gymnasium afgahn. To sienen 17. Gebortsdag hett he en Konzert maakt. Dor sünd verscheden Rapper vun dat Royal-Bunker-Label bi uptreden. Bi düsse Gelegenheit hett Kool Savas sehn, dat he Talent hett un is denn tohopen mit em uptreden. Nadem he up dat Royal-Bunker-Label en EP rutgahn laten hett (dat weer produzeert vun Melbeatz), hett Savas em fudderhulpen un hett mit Eko, Melbeatz un Valezka dat Optic-Records-Label grünnt, dat he hüdigendags noch bedrifft. Valezka is Eko sien grode Leev ween un de beiden weern en poor Johren tohopen. Nadem se ut’neen gahn sünd, hett Valezka tohopen mit Manuellsen un Jaysus dat Leed „Kein Du und Ich“ rutgahn laten.

Karrier

Kool Savas un Eko Fresh hefft denn tohopen dat Stuck „König von Deutschland“ upnahmen. Denn is bi Optik Records en ne’e Version rutkamen, wo blots Eko rappt hett un de is up Platz 15 vun de düütschen Charts kamen. Up düsse Aart is Eko allerwegens in Düütschland bekannt wurrn, ok buten den Krink vun de Hip-Hop-Fans. Denn meen Kool Savas aber, dat Eko nu övermödig wurrn weer un woll dat ne’e Album nich produzeern. Eko meen denn, nu füng sien Karrier eerst richtig an un hett Optik Records verlaten. He is denn glieks bi Sony BMG ünner Verdrag nahmen wurrn. Dor hett he sien eerst Solo-Album anfungen: „Ich bin jung und brauche das Geld“. Denn hett he noch twee Alben maakt. Dat eerste dorvun weer „Dünya Dönüyor – Die Welt dreht sich“. He hett dat tohopen mit Azra vun Royal Bunker maakt. Dor hett he sik mit sien binnersten Geföhlen ut’neen sett, as sien Lengen nah sien Vadder, den he nich kennt hett. Dat anner heet L.O.V.E. (Life Of Valezka and Eko). Dat is dat ruhigst un meist melodisch vun siene Alben bitherto. Sien neegst Single „Ich bin jung und brauche das Geld“ keem up Platz 5 in de düütschen Charts. Hier maak he sik oorntlich dick, man grien dor ok öber. Vunwegen düsse Single geev dat denn endgüllig keen Tosamenarbeiden mehr mit Kool Savas.

Egen Label

In dat Johr 2004 hett Eko sien egen Label German Dream Entertainment upmaakt. Dor maakt ok noch Kay One, Summer Cem, Capkekz un Kingsize bi mit. Fudderhen schall ok noch SD mitmaken, de fröher mal Liddmaat vun Optik Records weer.

2004 is Eko för den Musikpries Comet upstellt wurrn. Wunnen hett em denn aber sien Konkurrenten Sido.

Eko arbeit ok fudderhen as Songwriter. Ünner annern hett he dat Leed „Du hast mein Herz gebrochen“ för Yvonne Catterfield schreven. Dieter Bohlen hett dat produzeert. Denn hett he ok en Single mit Xzibit un Raptile maakt. De Single heet „Make Y’all bounce“.

Disrespect

Eko hett sik anhören mößt, wie he vun en paar düütsche Rappers „disst“ wurrn is. He woll dat torüchgeben un hett dat Leed „Die Abrechnung“ schreven. Dor hett he ünner annern Kool Savas, Sido, B-Tight, Fler un Bushido in angrepen. Mit Bushido hett he sik later besnackt un wedder verdragen. Vunwegen sien Angreep is en Floot utlööst wurrn un allerhand Rappers hefft Eko torüch disst. Kool Savas hett „Das Urteil“ rappt, Fler hett „Hollywoodtürke“ rutbröcht usw. In „Hollywoodtürke“ hett aber nich blots Eko wat afkregen, man ok över Bushido is Schimp utstört wurrn. Bushido sien Antwoort weer denn „FLERräter“, wat he tohopen mit Eko Fresh rutbröcht hett.

Eko hett dat Album „German Dream Allstars“ tohopen mit de Rappers vun sien Label German Dream rutgeven. Dat duur nich lang, denn dissen Fler un B-Tight in dat Leed „Du Opfer“ Bushido un Eko Fresh. De hett denn tosamen mit sien Mackers Summer Cem un SD dat Leed „Die Bestrafung“ gegen Kool Savas schreven.

As Antwoort up „Du Opfer“ hett he tohopen mit Bushido dat Leed „Untergrund“ schreven. Dor hefft de Lüde meist nich mehr up höört. Dat is dormals seggt wurrn, de Hip-Hop-Krieg weer nu vorbi. Man korte Tiet later keem Kool Savas mit de „John Bello Story“ an. Dor is in dat een oder anner Leed slecht vun Eko snackt wurrn. Bald kreeg he bi een vun sien Kunzerten ok en Buddel in’t Gesicht. Dor is en Narv vun bi torüchbleven. Later keem rut, dat de Mann, de de Buddel smeten harr, en Fan vun Kool Savas weer. Savas harr ja in en Leed vun de „John Bello Story“ sungen: „Smiet Eko man en Buddel an’n Kopp“. Eko hett denn anfungen, en nee Album uttoarbeiden. Dat weer heel un deel gegen Savas richt un hett den Naam dragen: „Fick Immer Noch Deine Story“. Man al twee Maanden, ehr dat rutkeem, konn een dat al in’t Internet dalladen. Dor hett Eko de Saak üm noch mal överarbeidt, en paar Leeder wegnahmen un anner toföögt. Düt ne’e Album hett he denn an’n 16. Dezember 2005 ünner densülvigen Naam „Fick Immer Noch Deine Story“ rutbröcht. Dat is 3.000 mal verköfft wurrn.

Marihuana

In’n August 2005 is Ekrem Bora vunwegen en Öberdosis Marihuana in en Krankenhuus in Köln bröcht wurrn. He harr Muffins süms backt un dor dat Marihuana biföögt. De Polizei hett 186,5 Gramm Backwark seker stellt, dor schöölt alltohopen fiev Gramm Marihuana inbackt ween hebben. Later hett Eko vör de Press togeven, dat he al fökener mal Marihuana smöökt harr. Normalerwies, hett he seggt, konn he dat goot verdrägen, man vunwegen en Spleet in siene Lungen weer dat dütmol böös utgahn.

Hüdigendags

An’t Enn vun 2005 sünd Eko un Valezka ut’neen gahn un Valezka hett ok Eko sien Label German Dream verlaten.

2006 weer Eko ok up de Samplers „Nemesis“ un „Vendetta“ vun Bushido to hören. Wenn sien Verdrag mit Sony BMG utlopen is, will he na Bushido sien Label ersguterjunge wesseln. De neeste Single „Gheddo“ feat. Bushido keem up’n 2. Juni 2006 rut un dat Album „Hartz IV“ weer denn an’n 23. Juni so wiet. Up de „Turkish Remix“ vun de Single rappt Eko dat twede Mal na dat Album „Dünya Dönüyor“ in Törksche Spraak. Mit Fler hett dat nu just wedder Striet geven. Un Tony D. hett seggt, Eko weer „de Söhn vun en Ulenhoor“. Man he hett sik dor later in’t Internet för entschulligt.

Musik

Alben

  • 2003: Ich bin jung und brauche das Geld
  • 2004: L.O.V.E. (mit Valezka)
  • 2004: Dünya Dönüyor – Die Welt dreht sich (mit Azra)
  • 2005: Eko Fresh Presents German Dream Allstars
  • 2005: Elektro Eko: Fick deine Story Mixtape (Bootleg)
  • 2005: Elektro Eko: Fick immer noch deine Story Mixtape
  • 2006: Hart(z) IV
  • 2007: Ekaveli

Singles

  • 2001: Jetzt kommen wir auf die Sachen (EP)
  • 2003: König von Deutschland (EP)
  • 2003: Ich bin jung und brauche das Geld (feat. G-Style)
  • 2003: Ich will dich (feat. Valezka un Joe Budden)
  • 2003: Dünya Dönüyor (feat. Azra)
  • 2004: L.O.V.E.
  • 2004: Eigentlich schön (mit Azra, feat. Chablife und Philippe)
  • 2005: Abrechnung
  • 2006: Gheddo (feat. Bushido)
  • 2006: Ek is back (feat. G-Style)
  • 2006: GD Generation X (Eko Fresh aka Ek the Hitman Hart feat. Summer Cem & Farid Bäng - Juice Exclusive)

Tohopen

  • 2003: Optik Anthem (feat. Kool Savas, mit Melbeatz un Valezka ünner den Naam "Optik Crew")
  • 2004: Flerräter (feat. Bushido)
  • 2004: Gegensätze ziehen sich an (feat. Bushido) Dat Rutgeben vun düt Leed is verbaden wurrn.
  • 2005: Nette Kanacken (feat. Chablife)
  • 2006: Nemesis (feat. Bushido, Baba Saad, D-Bo, DJ Stickle, Chakuza & Billy)
  • 2006: Landsleute (feat. Summer Cem)
  • 2006: Hartz 1 (feat. Capkekz un SD)
  • 2006: Gheddo Türkisch Remiks (feat. Killa Hakan, Ceza, Yener, un Ayaz)

Disstracks vun Eko

Disstracks gegen Eko

  • 2002: Knick Inna Optik (vun Sentence aka Sentino)
  • 2002: Du bist whack (vun Illo77)
  • 2003: Eko Diss (vun Abdel Rodriguez)
  • 2005: Blut ist Dicker als Wasser (vun Dimi & Sinan feat. Kool Savas)
  • 2005: Das Urteil (vun Kool Savas)
  • 2005: Hollywood Türke (vun Fler)
  • 2005: Du Opfer (von Fler & B-Tight)
  • 2005: Ich Geb'n Fuck (vun Caput)
  • 2005: 4 Eko (vun Illmatic)
  • 2005: Verdanken (vun Ercandize)
  • 2005: Nicht mit Illz (vun Illmatic)
  • 2005: H.A.T.E. (Album) (vun Abdel Rodriguez)
  • 2005: Die Meisten meiner Feinde (von Fettes Brot)
  • 2006: E.K.O. (Du Opfer Part II) (vun Fler, G-Hot& Tony-D)
  • 2006: L.O.V.EKO (vun MOK)
  • 2006: DREAMS (vun Manuellsen)
  • 2006: Der Angriff (vun Irie D un Ufuk Sahin)

Weblinks