Edward Donnall Thomas

Edward Donnall „Don“ Thomas (* 15. März 1920 in Mart bi Waco, Texas; † 20. Oktober 2012 in Seattle, Washington) weer en US-amerikaansch Mediziner. He kreeg 1990 den Medizinnobelpries un weer Perfesser an de University of Washington.

Thomas studeer Chemie un Chemieingenieurwesen an de University of Texas at Austin, mit den Bachelor-Afsluss 1941 un den Master-Afsluss 1943. Dornah studeer he Medizin an de Harvard Medical School, wo he 1946 sien Doktertitel (M.D.) kreeg. He weer Perfesser an de University of Washington un Direkter vun dat Fred Hutchinson Cancer Research Center in Seattle. Dor hett Thomas af den 1950er Johren Pionierarbeit in de Transplantatschoon vun Stammzellen ut dat Knakenmark leist. He hett ok an dat Bekämpen vun de bi Transplantatschonen uptreden Graft-versus-Host-Reaktschoon arbeit.

1980 kreeg he den Charles F. Kettering Prize vun de General Motors Cancer Research Foundation. 1987 hett he José Carreras, den weltbekannten Tenor, mit autologer Stammzelltransplantatschoon vun sien akuten Leukämie heelt. 1990 kreeg he gemeensam mit Joseph Edward Murray den Nobelpries för Physiologie oder Medizin för hör Inführen vun de Methood vun dat Överdragen vun Gewebe un Organen as klinische Behandlungspraxis in de Humanmedizin.

1990 kreeg he de National Medal of Science un en Gairdner Foundation International Award. 1987 harr he all den Karl Landsteiner Memorial Award kreegen.

Thomas weer siet sien Studientiet mit de Journalistin Dorothy Martin verheiraadt, mit de he dree Kinner harr.

Weblenken

• Edward Donnall Thomas up de Siet vun den Nobelpries (engelsch)
• Portrait von Thomas am Fred Hutchinson Center
• DNB-Katalog
• Personennaamdatei