Eduard Kühl
Eduard Kühl (* 9. April 1896 in Ohrsee; †) weer en düütschen Politiker von de NSDAP.
Kühl is 1896 in Ohrsee boren un an’n 1. Mai 1933 in de NSDAP ringahn. He weer von Februar 1933 bet Sommer 1934 in de SA un is in’n Februar 1934 Oortsgruppenamtsleiter för Kommunalpolitik in Wisteed worrn. Von Januar 1936 af an weer he Oortsgruppenleiter von de NSDAP in Drochters.
He weer von’n 1. April 1935 bet 1945 Börgermeester von Drochters. In de Tied von’n 1. Februar bet to’n 1. Juli 1943 weer he Vertreder för Börgermeester Carl Nörtemann in Stood, de in’n Tweten Weltkrieg to’n Wehrdeenst inropen weer. An’n 17. Mai 1943 is he Kreisleiter von de NSDAP in’n Kreis Stood worrn.
An’t Enn von’n Tweten Weltkrieg is Kühl an’n 10. Mai 1945 von de Briten in Drochters verhaft worrn un is bet Juli 1948 in Haft bleven. An’n 16. Juli 1948 hett em dat Spruchgericht in Bardörp to 18 Maand Haft veroordeelt, de aver mit siene Internierungshaft al afgullen weer. Later hett he as Maakler in Gauensiek leevt.
