Dorothea Wierer

duumDorothea Wierer 2018

Dorothea Wierer (* 3. April 1990 in Bruneck, Südtirol) is en italieensch Biathletin.

Leven

Dorothea Wierer leevt in Niederrasen un wurrd vun Alex Inderst un hör Techniktrainer Manuel Tovagliari traineert. Dat darte vun fiev Kinner hett de Sportböverschool in Mals besöcht un dor 2009 de Matura afleggt. Sietdem arbeit se bi de Finanzwache.

Sportlich Loopbahn

Mit denn Biathlonsport fung se mit 10 Johr an, 2006 is se in de italieenschen Natschonalkader uprückt. 2010 wurr se Liddmaat vun de B-Natschonalmannschap. Siet de Saison 2007/08 is Wierer tonächst in' Italiencup, later in' Europacup vun de Junioren antreeden. In de dorup folgen Saison keemen ok Rennen vun den Alpencups dorto. In Martell nehm se 2007 an hör eerst Junioren-Weltmeesterschapen deel. Mit en teihnten Platz in dat Eenzelrennen, Rang 16 in' Sprint un 14 in de Verfolgung as ok en teihnten Platz mit de Staffel reck Wierer good Resultate. Noch beeter wurrn de Ergevnisse bi de Junioren-WM 2008 in Ruhpolding, wo de Italienerin den Titel in' Eenzel wunn, in' Sprint up Rang 8, in de Verfolgung aber blots up Rang 21 keem. Gemeensam mit Alexia Runggaldier un Monika Messner wunn se todem de Bronzemedaille achter de Mannschapen ut Düütschland un Norwegen. Bi de Junioren-Europameesterschap 2008 in Nové Město na Moravě keemen de Ränge 17 in' Eenzel, 26 in' Sprint un 5 in de Staffel dorto. In den wiederen Verloop vun dat Johr nehm Wierer an de Sömmerbiathlon-Weltmeesterschapen 2008 vun de Junioren in Haute Maurienne deel, wo se as Fievte in' Sprint as ok Veerte in dat Verfolgungsrennen un mit de Staffel knapp Medaillen verpassen dee. In Canmore is Wierer weer spoodoriek bi de Junioren-WM antreeden un wunn den Titel in de Verfolgung, nahdem se as Veertplatzeerte in' Sprint noch knapp en Medaille verpasst harr. Mit Nicole Gontier un Runggaldier wunn se todem weer de Bronzemedaille in dat Staffelrennen. In dat Eenzel keem se up den 7. Platz. In Torsby nehm de Italienerin 2010 to'n veerten Mal an en Junioren-WM deel, wunn dor kien Medaillen, reck aber dennoch good Ergevnisse. In dat Eenzelrennen keem se up Platz 6, in' Sprint Rang 13 un in de Verfolgung up Platz 11.

To de Saison 2008/09 geev Wierer hör Debüt bi de Fruen in' Leistungsberiek. Hör eerste hett se dorbi in' IBU-Cup in Obertilliach bestreeden un wunn as 34. vun dat Eenzel un 21. in' Sprint ok glieks eerste Punkte. Doran sloot sück in Oberhof 2009 dat eerste Rennen in' Biathlon-Weltcup an. Mit Rang 69 in' Sprint reck se gliek in dat eerste Rennen hör för lang Tiet best Eenzelresultat, dat Bestand bit to den Gewinn vun de eersten Weltcuppunkte harr. In den wiederen Saisonverloop kunn se aber hör Bestleistung in' IBU-Cup bit to en elften Platz in en Verfolgungsrennen in Martell verbeetern. In Hochfilzen wurr Wierer fröh in de Saison 2010/11 weer in' Weltcup insett. Mit Michela Ponza, Katja Haller un Karin Oberhofer reck se in hör eerst Staffelrennen Platz 9. Eegenoordig verleep dorbi de Wessel vun Oberhofer up Wierer, wiel Wierer mehrere Sekunnen to laat bi den Wessel weer un Oberhofer solang up hör Mannschapskameradin wachten muss. Infloot up dat Gesamtergevnis harr dat aber nich, to dat Wierer mit blots tweemaal Nahladen en good Leistung bistüern dee. In Ruhpolding kunn se as 24. vun den Sprints eerstmals Punkte in en Weltcuprennen winnen. Bannig spoodriek weer Dorothea Wierer bi de Biathlon-Juniorenweltmeesterschapen 2011 in Nové Město na Moravě. In' Eenzel, in' Sprint un in de Verfolgung wurr se Junioren-Weltmeesterin un wunn mit de Staffel de Sülvermedaille. Bi de Biathlon-Weltmeesterschapen 2011 belegg Wierer in dat Verfolgungsrennen Platz 9 un reck dormit hör eerst Top-10-Resultat. Ehrn bit dorhen gröttsten Erfolg fier se bi de Biathlon-Weltmeesterschapen 2013 in Nové Město. Dor wunn se as Startlöperin mit de italieensch Staffel an de Siet vun Gontier, Ponza un Oberhofer unverwacht Bronze un dormit de eerste Medaille för en italieensch Fruenstaffel bi en Biathlon-Weltmeesterschap. In' Sprint un in den Verfolger leep dat nich so good, nah Platz 50 full se in den Verfolger noch up Platz 59 torüch.

Bi de Olympisch Winterspelen 2014 in Sotschi keem se in' Sprint up Platz 6 und in de Verfolgung up Rang 17, wunn aber mit de Mixed-Staffel an de Siet vun Karin Oberhofer, Dominik Windisch un Lukas Hofer de Bronzemedaille.

Bi de Biathlon-Weltmeesterschapen 2015 verpass se mit Platz 4 in't Eenzel de Bronzemedaille blots um 0,4 Sekunnen tegenöver Kaisa Mäkäräinen.

Bi den Weltcup in Östersund in de Saison 2015/16 gelung hör mit en Sieg in' Eenzel hör eerst Weltcupsieg. Dör en wiederen Sieg in dat Eenzel vun Ruhpolding un en achten Platz bi de Biathlon-Weltmeesterschapen 2016 in Oslo kunn se an dat Enn' vun de Saison den Eenzelweltcup mit twee Punkten Vörsprung vör Marie Dorin-Habert winnen. In den Sprint-Weltcup reck se Rang 3, in den Verfolgungs-Weltcup Rang 2 un in de Gesamtweltcup leeg se an' Enn up Platz 3.

De Saison 2016/17 fung vör hör bi de beid Rennen weniger good an, as se bi de eerst Statschoon in Östersund blots in den Verfolger up dat Podest keem un bi de tweet Statschoon in Pokljuka ok blots in't Middelfeld bi de Punkteränge rinkeem. In de nahfolgen Statschonen keem se in acht Rennen blots eenmal nich ünner de best Teihn und stunn tweemal up dat Podest. Pünktlich vör de Weltmeesterschapen keem se in Antholz aber nich so good torecht un bi de Biathlon-Weltmeesterschapen 2017 in Hochfilzen reck se in de Eenzelrennen kien Medaille. Platz 10 in dat Verfolgungsrennen un Platz 8 in den Massenstart beleeven hör best Eenzelergevnisse. Mit de Fruenstaffel keem se up den 5. Platz und mit de Mixed-Staffel verpass se up Platz 4 ebenfalls en Medaille. Up de dree letzt Weltcupstatschonen in dissen Winter reck se bi den Verfolger in Oslo as best Ergevnis Platz 8. Wiel se aber an all Rennen vun de Saison deelnommen harr un immer in de Punkteränge kommen weer, reck dat an Enn' to Platz 5 in den Gesamtweltcup. De sülvige Platzeeren reck se ok in de Verfolgungsweltcup und den Massenstartweltcup. In' Eenzelweltcup keem se nich ünner de best Teihn und in den Sprintweltcup reck se Platz 8.

Weblenken

Dorothea Wierer. Mehr Biller, Videos oder Audiodateien to’t Thema gifft dat bi Wikimedia Commons.

• Dorothea Wierer in de Datenbank vun de IBU (engelsch)
• Profil up de Websteed vun sportmentor-hkg.de
• „Ich hatte in letzter Zeit Probleme mit dem Schießen“: Dorothea Wierer in en Interview