Damm (Anatomie)

De Damm (ünner den Klötensack) mit de Penisnaht bi’n Mann

De Damm twüschen Puus un Oors bi’n Fro

As Damm oder Perineum (vun’t gr. perinéum „Damm“) warrt in de Anatomie dat Rebeet vun’n Lief betekent, dat twüschen den Oors un de buteren Geslechtsorganen liggt. Dat is bi Mannslüüd dat Rebeet twüschen dat Oorslock (Anus) un den Klötensack (Skrotum), bi de Fronslüüd dat Rebeet twüschen dat Oorslock un de achtere Kommissur vun de groten Schaamlippen.

Dat Perineum besteiht vör allen ut Muskeln, de to de Beckenboddenmuskulatur rekent warrt. Se warrt ünnerdeelt in de Muskeln in’t Rebeet vun’n Oors un de Muskeln vun’t urogenitale Rebeet. Överdeckt warrt de Damm vun Huut, de rieklich fienföhlig innerveert is.

De Innervatschoon löpt över den Nervus pudendus. De Damm tellt bi beid Geslechter to de erogenen Zonen. Bi Mannslüüd kann dör Druck op dat Perineum de Erekschoon verstarkt warrn. Bi’t Anröhren warrt de so nöömte Perinealreflex utlöst, dat is en reflektoorsch Tohopentehn vun’n buteren Slutmuskel vun’n Oors (Musculus sphincter ani externus).

Wenn Fronslüüd en Kind to Welt bringt, kann dat dör dat bannige Dehnen vun de Scheed to en Dammriss kamen. Mitünner warrt dorüm wiel de Geboort to Vörsorg en Dammsnitt (Episiotomie) dörföhrt, üm swore Geboorten lichter to maken.

• 
  Muskeln vun’n Damm bi Mannslüüd
• 
  Muskeln vun’n Damm bi Fronslüüd