Arnd Peiffer

Vun Wikipedia
Arnd Peiffer bi den Biathlon-Weltcup 2012 in Hochfilzen

Arnd Peiffer (* 18. März 1987 in Wulfenbüttel) is en düütsch Biathlet.

Karriere[ännern | Bornkood ännern]

Arnd Peiffer kummt ut Clausthal-Zellerfeld un sien Vereen is de WSV Clausthal-Zellerfeld.[1] Den eersten internatschonalen Upträe harr Peiffer in' Dezember 2007, as he bi den Europacup vun de Junioren in' Eenzel Platz 15 belegg un bi den dorup folgen Sprint all sien eersten Sieg halen kunn. In Langdorf-Arbersee gelung hüm en wiedere Sprintsieg in' Januar 2008. De Hööchtpunkt vun de Saison wurrn för hüm de Juniorenweltmeisterschaften in Ruhpolding, bi de he twee Bronzemedaillen winnen kunn, in' Sprint achter Anton Schipulin un Florian Graf un mit de Staffel in de Besetten Simon Schempp, Manuel Müller, Peiffer un Florian Graf. To dat Enn' vun de Saison kreeg he sien eerste Insätze in den Europacup un kunn in Cesana (San Sicario) all gliek ünner de Top-Ten lannen.

In de Saison 2008/09 wurr Peiffer in den Natschonalmannschaps-B-Kader in de Lehrgangsgrupp Ib instuuft un in' IBU-Cup insett. All bi de eerste Statschoon in Idre schaff he in' Sprint en veerten Rang un kunn in Obertilliach bi de tweet Veranstaltung in' IBU-Cup ebenfalls in' Sprint as Dart sien eersten Podestplatz fiern. Dat gliek Ergevnis in Martell un en veert Platz in de ansluuten Verfolgung hemm hüm in de Tüschentiet de Führung in de Gesamtwertung vun den IBU-Cup vör Daniel Böhm inbrocht. An' 8. Januar 2009 geev he as Liddmaat vun de düütsch 4×7,5 km-Staffel in Oberhof in' Weltcup sien Debüt. As vörletzt Löper övernehm he an dart Stäe liggend vun Michael Rösch un kunn mit en stark Loopleistung un twee fehlerfree Scheetinlagen de Führung övernehmen. Toni Lang as Slusslöper kunn dat Tempo vun de Öösterrieker un Russen nich ganz mitgahn un führ de Staffel nah Michael Greis sien Straafrunn in' eersten Afsnitt up Platz dree un dormit bi sien eersten Weltcup-Insatz up dat Podium.[2] Disse darte Platz wurr later to Platz twee korrigeert, nahdem de russisch Staffel wegen Jaroschenko sien Dopingvergahn disqualifizeert wurr.[3] Twee Daag later bi sien eersten Eenzelinsatz in en Sprintrennen keem he up den achten Platz un harr dormit de Qualifikatschonsnorm för de Weltmeesterschapen. Bi sien eersten Insatz in Pyeongchang reck Peiffer mit Andrea Henkel, Simone Hauswald un Slusslöper Michael Greis den Bronzeplatz mit de Mixed-Staffel. Dorbi leep he vun all Mannlüüd de tweetflinkste Runn nah Ole Einar Bjørndalen. Ok bi sien tweeten Start in Südkorea wunn he en Bronzemedaille mit Rösch, Christoph Stephan un Greis in de Männerstaffel. Peiffer hett blots een Nahladenspatroon bruukt un weer todem flinkste Löper up de dart Runn. Bi de letzten Weltcup-Statschoon vun de Saison in Chanty-Mansijsk gelung Peiffer in' Sprint sien eerst Sieg in en Weltcup-Rennen. Mit de tweetbesten Loopleistung un en fehlerfree Scheeten hett he sück dorbi överlegen gegen de Weltelite dörsett.

Peiffer hörr af Saisonbeginn 2009/10 to de fast nomineert Startern vun de düütsch Mannschap in' Weltcup. Neben Michael Greis weer he de eerste, de de Nomineerenskriterien för de Qualifikatschoon to de Olympisch Winterspelen reck un konstant Platzeerungen in de Punkteränge schaff un in Antholz in' Sprint sien tweeten Weltcupsieg fiern kunn. In de Gesamtwertung vun den Weltcup belegg he in de Endafreken Platz negen. In dat letzt Rennen vun de Saison 2009/2010 wunn he in Chanty-Mansijsk gemeensam mit Magdalena Neuner, Simone Hauswald un Simon Schempp den Weltmeestertitel in de Mixed-Staffel.[4]

Arnd Peiffer nehm an de Olympisch Winterspelen 2010 in Vancouver deel. Neben Platz fiev mit de düütsch Staffel weer Rang 17 in' Massenstart sien best Resultat. In de folgen Weltcupsaison 2010/2011 hörr Peiffer to de beständigsten düütsch Startern. He leep bi jedes Rennen in de Punkteränge, dorbi weern besünners good sien tweet Platz bi den Sprint in Oberhof un sien dart Weltcup-Eenzelsieg in Presque Isle ebenfalls in' Sprint. Sien good Form kunn he to'n Uptakt vun de Weltmeesterschapen 2011 in Chanty-Mansijsk bestätigen. In de düütsch Mixed-Staffel, in de mit Henkel, Neuner, Peiffer un Greis de starksten Biathleten vun de loopen Saison upboden weern, övernehm he mit mehr as twintig Sekunn Vörsprung vun Magdalena Neuner un kunn disse Führung gegen den Tweeten Ole Einar Bjørndalen hollen. De Slusslöper Michael Greis verlor woll de Spitzenpositschoon, dennoch wunn Peiffer mit Sülver sien darte Weltmeesterschapsmedaille in de mischt Staffel. Twee Daag later wurr Peiffer Weltmeester in' Sprint. Mit de tweetbest Loopleistung un blots een Scheetfehler hull he Martin Fourcade in Schach un sker sück sien eersten Weltmeesterteitel in en Individualwettbewarf. In der Verfolgung verpass he as Veert en Medaille blots knapp. Wenig Daag later belegg Peiffer in' Eenzel Platz 15 un reck dorbi sien bit dorhen best Ergevnis över de lang Eenzelstreck in' Weltcup. Mit en fievten Platz in dat Saisonafslussrennen an' Holmenkollen seker sück Peiffer Platz veer in de Gesamtwertung vun den Weltcup 2010/2011. En vun de starksten düütsch Löpers in de Weltklass weer dormit to glieker Tiet ok de best düütsch Starter.

In de Saison 2011/12 wunn Peiffer in‘ Weltcup up de veerte Statschoon den Sprint in Oberhof vör Simon Fourcade un Jewgeni Ustjugow. An de 7. Statschoon an‘ Holmenkollen wunn he de Verfolgung, nahdem he noch in‘ Sprint up Platz 2 kommen weer. Bi de Biathlon-Weltmeesterschapen 2012 in Ruhpolding kunn he mit de Staffel un de Mixed-Staffel jewiels en Bronzemedaille winnen. To’n Afsluus von de Saison in Chanty Mansijsk reck he denn aber in all dree Disziplinen (Sprint, Verfolgung un Massenstart) jewiels den 2. Platz. Dat broch hüm in den Gesamtweltcup an‘ Enn‘ up Platz 4 und in den Verfolgungsweltcup keem he up den darten Platz.

De Biathlon-Saison 2012/13 leep för de düütsch Mannlüüd mit Utnahm vun Andreas Birnbacher ehrder dörwussen. Ok Arnd Peiffer reck in de Eenzeldisziplinen kien Ergevnisse up dat Podest, keem woll immer in de Staffeln to’n Insatz, aber ok dor blots tweemal up dat Podest. In den Gesamtweltcup keem he up Rang 18. Ok bi de Biathlon-Weltmeesterschapen 2013 geev dat för hüm blots en Bronzemedaille mit de Staffel.

De Saison 2013/14 broch hüm up de darte Statschoon in dat franzöösch Annecy-Le Grand Bornand mit de Staffel den Sieg un up de 7. un 8. Statschoon in Pokljuka bzw. in Kontiolahti aber noch 2 darte Plätze in‘ Sprint. Ok wenn he kien Weltcuprennen wunnen harr, stunn he an’t Enn vun de Saison up den 7. Platz in de Gesamtwertung.

Bi de Olympisch Winterspelen 2014 in Sotschi wunn Peiffer mit de düütsch Staffel an de Siet vun Erik Lesser, Daniel Böhm un Simon Schempp de Sülvermedaille, keem aber ansonsten nich ünner de best Teihn. An' Slussdag kunn he noch an den 50-km-Langloop deelnehmen un keem hier up Platz 40 bi 64 Deelnehmern.

De Saison 2014/15 broch hüm up de 5. Statschoon in Ruhpolding en tweeten Platz in de Staffel und Platz 3 in‘ Sprint. In Antholz keem he mit de Staffel up den 2. Platz, wat hüm un sien Kollegen in Oslo nochmal gelung. In Oslo aber wunn he ok den Sprint un stunn dormit endlich mal weer baben up dat Podest. Dat broch hüm an dat Enn‘ vun de Saison in‘ Sprint-Weltcup ok den 9. Platz in. Mit de Mixed-Staffel harr he up de eerste Statschoon in Östersund all eenmal den darten Platz reckt.

Mit de Staffel wunn he denn noch bi de Biathlon-Weltmeesterschapen 2015 in Kontiolahti de Goldmedaille.

De Weltcup-Saison 2015/16 fung för Peiffer veelversprekend an, reck he doch glieks to Anfang in Östersund jewiels den 2. Platz in Sprint und Verfolgung. Mit de Staffel keem he in Antholz up den 2. Platz un to’n Afsluss keem he in Chanty Mansijsk in‘ Sprint noch mal up Platz 3. Dormit weer he in‘ Sprint-Weltcup an‘ Enn‘ up Platz 4, in‘ Verfolgungsweltcup up den 10. Platz un in‘ Massenstart up Platz 6. Dorto wunn he mit de Mixed-Staffel noch dat Rennen in Canmore (Kanada).

Bi de Biathlon-Weltmeesterschapen 2016 keem he in‘ Sprint up Platz 7 un in‘ Massenstart up Platz 5, wunn aber mit de Staffel de Sülvermedaille un mit de Mixed-Staffel kunn he sück de tweet Sülvermedaille halen.

Arnd Peiffer hett 2006 sien Abitur an de Robert-Koch-School (Clausthal-Zellerfeld) maakt un hett af August 2007 de Bundespolizeisportschool Bad Endorf besöcht. Mit Beginn vun dat Wintersemester 2008/2009 nehm Peiffer en Studium to'n Wertschapsingenieur an de Technische Universität Clausthal up, bleev aber wiederhen bi de Bundespolizei.[1][2]

Utteknungen[ännern | Bornkood ännern]

Weblenken[ännern | Bornkood ännern]

Enkeld Nahwiesen[ännern | Bornkood ännern]

  1. a b [http://www.goslarsche.de/Home/harz/artkel-archiv_arid,72227.html Das perfekte Rennen: Arnd Peiffer gewinnt Weltcup-Sprint van 26. März 2009, afropen an' 5. März 2011, Goslarsche Zeitung – goslarsche.de
  2. a b Christian Ernst: [http://www.tu-clausthal.de/presse/nachrichten/details.php?id=706 Clausthaler Student überzeugt beim Biathlon-Weltcup van' 9. Januar 2009, afropen an' 5. März 2011, Nachrichten Sportinstitut, TU Clausthal 2009
  3. Nicole Resch: [http://www.biathlonworld3.de/en/press_releases.html/do/detail?presse=407 IBU press release February 13th, 2009, IBU 2009
  4. [http://wintersport.zdf.de/ZDFsport/inhalt/31/0,5676,8059807,00.html WM-Gold für deutsche Biathleten, zdf.de van' 28. März 2010, afropen an' 5. März 2011