Anastasiya Kuzmina

Anastasia Kuzminová (2015)

Anastasiya Vladimirovna Kuzmina (slowaaksch: Anastázia Kuzminová, russisch: Анастасия Владимировна Кузьмина, borene Schipulina, russisch Шипулина; * 28. August 1984 in Tjumen, Russische SFSR, UdSSR), is en ehmalge slowaaksch Biathletin vun russisch Herkunft un tweemalige Olympiasiegerin in' Biathlon.

Biographie

Kuzmina bedreev siet 1999 Biathlon. De Polizistin leevt in Tjumen un geiht för Dinamo Tjumen an den Start. Se wurr vun Waleri Polchowski, Sergei Schestow un Leonid Gurjew traineert. Hör Bröer Anton is ebenfalls Biathlet.

Kuzmina fung all in de Juniorenberiek bannig spoodriek an. Bi de Juniorenweltmeesterschap 2002 in Ridnaun wunn se en eerste Medaille, Sülver mit de russisch Staffel. Een Johr later wunn se in Kościelisko Staffelgold as ok Sülver in' Eenzel un in de Verfolgung. 2004 folg in Haute Maurienne nochmal Staffelsülver, 2005 in Kontiolahti wunn se Staffelgold un Bronze in' Sprint. 2004 gung se eerstmals bi Junioreneuropameesterschapen in Minsk an den Start. Hier wunn se ok Gold mit de Staffel un Sülver achter Krystyna Pałka in de Verfolgung. In dat folgen Johr is se weer bi de Junioreneuropameesterschap in Nowosibirsk antreeden un wunn achter Anna Bulygina Sülver in' Sprint un Gold in dat ansluuten Eenzel.

2005 geev Kuzmina in Obertilliach hör Debüt in' Europacup. In' Eenzel wurr se Söbente un wunn dat Sprintrennen. Anfang 2006 geev se in Oberhof hör Debüt in' Biathlon-Weltcup. In' Sprint wurr se 63., bi de ansluuten Verfolgung 37. In de nächst Saison wunn se in Östersund as 13. eerste Weltcuppunkte un reck hör bit dorhen best Weltcupergebnis – de Saisonhett se aber all vör de Tiet nah de tweet Weltcupstation in Hochfilzen afslooten, wiel se hör eerst Kind verwachten dee.

Se hett den Vader vun dat Kind, den russischstämmigen israeelschen Skilanglöper Daniel Kuzmin heiraadt. Siet 2008 start se för de Slowakei, wo dat Paar in Banská Bystrica leevt. Besünners spoodriek in hör eerst Saison för hör nee Land wurrn de Biathlon-Weltmeesterschapen 2009 in Pyeongchang. Dor wunn se völlig unverwacht achter Olga Saizewa de Sülvermedaille in' Massenstart. Ok tovör harr se mit de Rängen 29 in' Eenzel, söben in' Sprint – togliek hör eerst Top-Ten-Platzeeren in en Weltcup-Rennen – as ok 17 in dat Verfolgungsrennen bannig good Ergevnisse haalt. Nich weniger spoodriek fung een Week later de in Ufa stattfinnen Biathlon-Europameesterschap an. Kuzmina wunn de Titel in' Sprint un in de Verfolgung. Bi de Olympisch Winterspelen 2010 in Vancouver wunn se de Goldmedaille in' Sprint (vör Magdalena Neuner un Marie Dorin) as ok Sülver in de Verfolgung (achter Magdalena Neuner aber vör Marie-Laure-Brunet). Dorneben weer dat hör eerst Weltcupsieg un dat eerste Gold för de Slowakei bi Olympisch Winterspelen, de slowaaksch Ieskunstlöper Ondrej Nepela hett bi de Olympisch Winterspelen 1972 in Sapporo in tschechoslowaaksch Farven Gold wunnen. In de Saison 2010/2011 wunn se in Hochfilzen in' Sprint un reck fakener Top-Ten Platzeeren. Nahdem se de Statschonen in Presque Isle un Fort Kent utlaaten harr, leep se bi den eersten Eenzelwettbewarf vun de Biathlon-Weltmeesterschapen 2011 in Chanty-Mansijsk in' Sprint up den darten Platz achter Magdalena Neuner un Kaisa Mäkäräinen. In de ansluten Verfolgung reck dat to Platz 6. Dorto keemen Platz 9 in' Eenzel un Platz 10 in' Massenstart

Bi de Olympischen Winterspielen 2014 in Sotschi wunn se hör tweet Goldmedaille in' Sprint (ditmal vör Olga Wiluchina un Wita Semerenko. To dat Enn vun de Saison hett se van' 4. bit to'n 7. April 2014 bi dat Arctic Circle Race, en 160km-Langdistanzrennen up Gröönland an den Start gahn un hett dat Rennen as Tweet achter Niviaq Chemnitz Berthelsen afslooten.

Weblenken

Anastasiya Kuzmina. Mehr Biller, Videos oder Audiodateien to’t Thema gifft dat bi Wikimedia Commons.

• Anastasiya Kuzmina in de Datenbank vun de IBU (engelsch)
• Indrag in de Datenbank vun Sportsreference.com (engelsch)