Windketelfunkschoon

Vun Wikipedia

As Windketelfunkschoon oder Windketeleffekt warrt dat Spiekern vun Blood för korte Tiet in de elastischen Arterien dicht bi’t Hart wiel dat Tohopentrecken vun’t Hart (Systool) betekent.

Dorbi warrt dat Blood, dat ut dat Hart rutpumpt warrt, deelwies vun wegen dat druckbedingte Vergröttern vun den Arteriendörmeter so lang spiekert, bit de sik Wannen vun de Bloodfatten dör jemehr egen Elastizität wedder tosamentehn doot. Dat heet, dat de mechaansche Energie vun’n Hartslag in Form vun Spannung (dör dat elastische Dehnen vun de Adern) spiekert warrt un bi de Diastool vun de Bloodfatten in Arbeit gegen den Fattwedderstand un dormit in den Transport vun’t Blood ümsett warrt.

De Tietafstand twüschen de Kontrakschoon vun’n Hartmuskel un de Kontrakschoon vun de Bloodfatten sorgt för en liekmatigen Stroom vun’t Blood dör den Lief. Ahn den Effekt weer dat Blood stootwies dör de Lief pumpt. An den Effekt hebbt sünners de Aorta un de Rebeden dicht an’t Hart vun de Hals- un Armarterien Andeel. Ofschoonst de Windketeleffekt bi en jungen utwassen Minschen en Volumenännern vun blots üm un bi 40 ml liekkamen deit, speelt he aver en düchtige Rull to’n Oprechthollen vun’n Blooddruck. Bito is de för’t Utdehnen vun de Arterie brukte Arbeitsleistung vun’t Hart en bedüdend Bestanddeel vun de Nalast.

De Begreep Windketel geiht torüch op de fröheren handbedreven Füerwehrpumpen, bi de in stiefwannige Fatten dör Kompresschoon vun en Luftblaas en anhollend liekmatige Druckafgaav mööglich maakt weer.