Wilhelm von Ditfurth (1874–1949)

Vun Wikipedia
Zur Navigation springen Zur Suche springen

Wilhelm Börries Hans Otto von Ditfurth (* 7. August 1874 in Minnen; † 20. Mai 1949 in Lemmje) weer en düütschen Offzeer un Politiker von de DNVP.

Von Ditfurth is 1874 as öllsten Söhn von Amalie Leontine Ferdinande Dorette, borene von Hattorf (28. Juni 1851–31. Dezember 1934), un Franz von Ditfurth (9. September 1840–12. September 1909) in Minnen boren.[1] Na’n Dood von sien Vader hett he de Familiengöder övernahmen un is ünner annern Besitter von dat Good Lemmje bi Wutzen worrn, wat över siene Moder in de Familie kamen weer.[1] Tosätzlich weer he Mitbesitter von dat Good Lübrassen un dat Forstgood Ditfurth.[1]

In’n Eersten Weltkrieg weer he Oberstleutnant un 1918 för en Tied Baas von’n Generaalstaff von dat IX. Armee-Korps.

Bi de Wahl 1924 is he in’n Wahlkreis 16 Süüdhannover (Hannover-Hilmssen) as Afornten in’n Prüüßschen Landdag wählt worrn. He is bet to de nächste Wahl 1928 Afornten bleven.

In’n Tweten Weltkrieg weer he wedder Offzeer. 1940 weer he Kummandant von dat Stalag XI B in Fambossel un denn Kummandant von verschedene Kriegsfungenenlagers in Frankriek un Belgien. An’t Enn von dat Johr 1940 is he Baas von’n Generaalstaff von’n Befehlshebber bi de Düütschen Truppen in Däänmark worrn un 1941 Baas von’n Generaalstaff von dat Högere Kummando XXXVII. 1943 weer he bi de Föhrerreserve von dat Oberkommando des Heeres.

Von Ditfurth weer Ridder von’n Orden Pour le Mérite, von’n Huusorden von Hohenzollern un Rechtsridder von’n Johanniter-Orden.[1]

Von Dithfurth hett an’n 7. Oktober 1898 in Windischleuba Elisabeth Freiin von Münchhausen (19. März 1879–8. Januar 1959; Dochter von Börries von Münchhausen) freet. De beiden harrn fiev Döchter un een Söhn:[1]

  1. Heilwig Amalie Klementine Eleonore Anna Elisabeth (* 8. August 1899)
  2. Willtrudis Anna-Louise Rosaly Anna-Margarete Anni Hilde (* 22. Juli 1901)
  3. Helmtrudis Luise Klementine Agnes Osterhold (* 22. Juli 1901)
  4. Osterhold Anna Klementine Mariine Dorothea (* 7. August 1904)
  5. Oda Klementine Margarete Johanna (* 23. Oktober 1912)
  6. Wilhelm-Hattorf Börries Franz Bodo (* 30. Oktober 1920)

Na Wilhelm sien Dood 1949 hett sien Söhn de Familiengöder övernahmen.

Footnoten[ännern | Bornkood ännern]

  1. a b c d e Historischer Verein Lemmie: Ditfurth, v., Wilhelm Börries Hans Otto