Wilhelm Marquardt
Wilhelm August Heinrich Marquardt (* 1. Dezember 1899 in Wümm; † 14. Januar 1994 in Imbeek) weer en plattdüütschen Schriever un Heimatkundler.
Marquardt is 1899 as Söhn von Elise Louise Auguste, borene Kothe (5. Mai 1879–18. Juni 1947), un den Schoolmeester Karl Heinrich Wilhelm Marquardt (6. Dezember 1874–11. September 1954) in Wümm boren.[1] Kort na de Geboort keem de Vader as Schoolmeester na Imbeek.[1] Dor güng Marquardt ok na Volksschool.[1] Op Realschool weer he in Buxthu un denn op de Präparandenanstalt un dat Lehrerseminar Stood.[1] Von’n 18. Juni 1917 bet 2. September 1918 weer Marquardt Soldaat in’n Eersten Weltkrieg.[1] He is bi dat Infanterie-Regiment Nr. 92 in Bruunswiek utbillt worrn un keem denn an de Westfront na dat Füsilier-Regiment Nr. 73.[1] Dor weer he in de 7. Kumpanie ünner Ernst Jünger.[1] He is mit dat Ieserne Krüüz 2. Klass uttekent worrn un keem bi Cagnicourt in Kriegsfungenschop.[1] As Fungenen keem he na Abbeville un weer denn bi Gaudiempre un Essars insett.[1] Na de Fungenschop hett he sik in Stood wieder as Schoolmeester för de Volksschool utbillen laten un in’n Juni 1921 de 1. Lehrerprüfung bestahn.[1]
He weer denn bet 1934 Schoolmeester an de Volksscholen in Imbeek, Bourm, Krummasell, Bahrendörp, Solzhusen, Teinderp, Hittfeld un Imbeek.[1] In’n Mai 1933 is he Maat von de NSDAP worrn.[1] 1934 hett he de Schriftleitung för den ne’en Harburger Kreiskalender övernahmen (Johrgäng 1935 bet 1941), weer von 1935 af an för „Volkstum und Heimat“ in’n Go Oosthannover tostännig un is na Lümborg versett worrn.[1] In disse Tied weer he för twee Johr von’n Schooldeenst freestellt.[1]
An’n 26. August 1939 is he för den Tweten Weltkrieg na de Wehrmacht inropen worrn un hett an de Westfront den Feldtog dör Luxemborg, Süüdbelgien, dör de Champagne bet Moulins in Middelfrankriek mitmaakt.[1] He is denn aver wedder trüggkamen un hett Opgaven in de Heimat- un Volksdomspleeg övernahmen.[1] Na dat Enn von’n Tweten Weltkrieg is he in’n Mai 1945 fastnahmen worrn un keem över dat Lager Westertimk na dat Stalag XI B.[1] Vör de Sprookkamer in Bomlitz is he to twee Johr Fängnis veroordeelt worrn.[1] Een Dag later is he aver rutlaten worrn un weer denn Landarbeider.[1] Von Harvst 1948 bet Enn Januar 1952 hett he in dat Geschäft von siene Süster Helene in Grotenheere arbeidt.[1] In’n Mai 1952 keem he wedder in’n Schooldeenst un hett in Hittfeld anfungen.[1] 1953 is he denn ok wedder beden worrn, de Schriftleitung för den Harburger Kreiskalender to övernehmen (Johrgäng 1954 bet 1982).[1] To’n 1. April 1958 is he Schoolbaas in Imbeek worrn un to’n 31. März 1965 in Rohstand gahn.[1]
Blangenbi weer he Schriever un Heimatkundler. Marquardt weer von 1960 bet 1972 Raadsherr in’n Gemeenraad von Imbeek un von 1964 bet 1972 Afornten in’n Kreisdag von’n Landkreis Horborg.[1]
Marquardt hett 1965 dat plattdüütsche Book An’n olen Dörpsbeek rutbröcht. Sien Söhn Walter Marquardt hett 2008, 2009 un 2010 in dree Böker en Deel von de plattdüütschen Geschichten rutgeven, de Wilhelm Marquardt sammelt hett.
Marquardt hett an’n 21. Juli 1927 in Hittfeld Anna Grohbrüg (21. April 1902–1. August 1985) freet.[1] De beiden harrn söven Kinner.
Warken[ännern | Bornkood ännern]
Plattdüütsch:
- An’n olen Dörpsbeek. Verlag Dr. Johannes Knauel, Hamborg 1965
- Sagen, Määrkens und Vertellen ut den Kreis Horborg un ümto. (rutgeven von Walter Marquardt) Sutton, Erfurt 2008, ISBN 978-3-86680-345-9
- Nee Sagen, Määrkens und Vertellen ut den Kreis Horborg un ümto. (rutgeven von Walter Marquardt) Sutton, Erfurt 2009, ISBN 978-3-86680-500-2
- Stippstörken. (rutgeven von Walter Marquardt) Sutton, Erfurt 2010, ISBN 978-3-86680-645-0
Hoochdüütsch:
- Eine Chronik der vier Walddörfer am Kiekeberg des Landkreises Harburg. Christians, Hamborg 1980
- Bötersheim, Drestedt, Kakenstorf, Trelde. Sülvsverlag, Imbeek 1979
- Sprötze. Oortschop Sprötz, Sprötz 1977
- 400 Jahre Becker's Gasthof in Helmstorf. Sülvsverlag, Imbeek 1974
- Die Harburger Geestdörfer der Stadt Buxtehude. Stadt Buxthu, Buxthu 1981
- Chronik Helmstorf. Gemeen Seevdaal, Seevdaal 1982
- Eine Chronik der vier Rosengarten-Dörfer am alten Dethweg des Landkreises Harburg. Gemeen Rosengoorn, Rosengoorn 1984
- Chronik der Gemeinde Hollenstedt. Gemeen Hullnst, Hullnst 1986
- Chronik der Gemeinden Halvesbostel mit Holvede und Regesbostel mit Holtorfsbostel und Rahmstorf. Christians, Hamborg 1989
- Lindhorst. Gemeen Seevdaal, Seevdaal 1990
- Von Riesen, Räubern und Hexen. Convent-Verlag, Hamborg 2001
Footnoten[ännern | Bornkood ännern]
- ↑ a b c d e f g h i j k l m n o p q r s t u v w x y http://www.online-ofb.de/famreport.php?ofb=harburg_sued&ID=I554
Weblenken[ännern | Bornkood ännern]
- Wilhelm Marquardt in de PBuB (hoochdüütsch)