Victor Dahdaleh

Vun Wikipedia
Zur Navigation springen Zur Suche springen

Victor Phillip Michael Dahdaleh (* August 1945 in Ramleh, Palästina) is en kanaadsch-brietschen Ünnernehmer. He is Besitter von de Dadco-Grupp. Ünner annern höört to Dadco ok dat AOS-Wark bi Stood.

Över sien Vermögen gifft dat keen sekere Utkünft, he gellt allgemeen aver as Milljardär.

Leven[ännern | Bornkood ännern]

Dahdaleh is 1945 as christlichen (antiochisch greeksch-orthodox) Araber (Palästinenser) in de Stadt Ramleh in Palästina boren.[1] He sprickt Araabsch, Engelsch un Franzöösch.[1]

Von dor is de Familie tooerst na Jordanien kamen un denn na Kanada utwannert. He hett an de York University in Toronto, 1967 an de London School of Economics un an de McGill University in Montreal studeert. In Toronto hett he en Bachelor of Arts in Verwaltungswetenschoppen maakt un an de McGill 1975 en Diplom-Afsluss in Management. He hett dat Ünnernehmen Dadco övernahmen, dat sien Grootvader 1915 grünnt harr. Dat Ünnernehmen hett ünner annern Bomaterialien in’n Nahen Oosten verköfft un mit Phosphat hannelt.[1]

Later hett he de kanaadsche un de brietsche Staatsbörgerschop annahmen. He leevt in Londoner Stadtdeel Belgravia un hett en tweten Wahnsitt in de Swiez.[1]

Prozess[ännern | Bornkood ännern]

De Kunzern Alcoa harr von 2001 bet 2005 över Middelslüüd Smeergeller an Lüüd in Bahrain betahlt, dormit de Kunzern Aluminium Bahrain Aluminiumoxid von Alcoa afnimmt. De Geller von Aluminium Bahrain an Alcoa sünd över een von Dahdaleh sien Firmen in Singapur lopen. (2001 bet 2005 is de Tiedruum, de Dahdaleh in’n Prozess vörhollen worrn is. De Geller sünd von 1989 bet 2007 över Dahdaleh sien Firma lopen.) Dahdaleh is vörhollen worrn, dat he een von düsse Middelslüüd (Consultant A) weer, de Smeergeller nahmen oder geven hebbt. Von 2007 bet 2013 is dorüm gegen Dahdaleh ermiddelt worrn.[2]

Dat hett twee Prozesse gegen Dahdaleh geven, een in de USA un een in Grootbritannien.

De Prozess in de USA vör’n District Court for the Western District of Pennsylvania is mit en Vergliek toenn gahn, in den Alcoa tostahn hett, dat se Smeergeller betahlt hebbt. De Kunzern hett 384 Milljonen US-Dollar betahlen müsst, 174 Milljonen an de Securities and Exchange Commission un 223 Milljonen an dat US-Justizministerium. Dör düssen Vergliek is Dahdaleh as fre’en Mann ut’n Prozess rut un is nich veroordeelt un ok nich freespraken worrn.

In’n Prozess vör’n Southwark Crown Court hett dat Serious Fraud Office Dahdaleh Bestekeree vörhollen. He is an’n 10. Dezember 2013 von Richter Nicholas Loraine-Smith ut Mangel an Bewiesen freespraken worrn. En grote Rull hett dorbi speelt, dat wichtige Tügen nich utseggt hebbt. Ok de Rull von de Avkatenfirma Akin Gump, mit de dat Serious Fraud Office tohooparbeidt hett, is kritiseert worrn.[2] Vör Gericht hett em de Avkatenfirma Allen & Overy vertreden.[3]

Ünnerlagen ut de Panama Papers hebbt 2016 nochmaal wedder Henwiesen dor op geven, dat Dahdaleh würklich Consultant A ween is.

Ämter, Mäzen un Ehren[ännern | Bornkood ännern]

Dahdaleh is Board Member von dat International Aluminium Institute un is siet 1995 Maat von’n Court of Governors von de London School of Economics. Von 2004 bet 2009 weer he Präsident von de Canada-UK Chamber of Commerce. He weer Stiftungsraad von de William J. Clinton Foundation un bedrifft ok sien egen Stiftung, de Victor Phillip Dahdaleh Charitable Foundation.

An de McGill University in Montreal hett he 2007 tohoop mit de William J. Clinton Foundation 16 Stipendien inricht, wat 2015 op 32 Stipendien utwiedt worrn is.[4] Tosätzlich is dor 2015 ok en ne’en Lehrstohl för Neurowetenschoppen inricht worrn.[4] Dahdaleh hett för den Lehrstohl 2 Milljonen kanaadsche Dollar geven un för de tosätzlichen Stipendien 1,5 Milljonen Dollar.[4]

2015 hett he 20 Milljonen kanaadsche Dollar an de York University in Toronto spennt, mit de dat Dahdaleh Institute for Global Health Research inricht worrn is.[5]

2016 hett he en Ehrendokter von de juristische Fakultät von de York University kregen.[6]

An de St. Francis Xavier University in Antigonish, Nova Scotia, hett he tohoop mit Wafic Saïd 5,5 Milljonen kanaadsche Dollar spennt.[7] En poor Maand later hett he ok en Ehrendokter von de St. Francis Xavier University kregen.

Footnoten[ännern | Bornkood ännern]

  1. a b c d Billionaire Found in Middle of Bribery Case Avoids US Probe, newsmax.com an’n 14. August 2014
  2. a b Tom Harper: Victor Dahdaleh corruption case: Billionaire's fraud trial collapses after key SFO witnesses refuse to give evidence, The Independent an’n 10. Dezember 2013
  3. Gordon Rayner: Billionaire labour donor charged over £600m 'fraud', The Telegraph an’n 25. Oktober 2011
  4. a b c Victor Phillip Dahdaleh supports neuroscience research, mcgill.ca an’n 26. Mai 2016
  5. Philanthropist Victor Dahdaleh donates $20 million to York University, InsideToronto.com an’n 27. Oktober 2015
  6. Victor Dahdaleh receives doctor of laws degree from York University, victordahdalehfoundation.com an’n 20. Juni 2016
  7. Robert Cribb, Marco Chown Oved: Honorary degrees for Brian Mulroney’s billionaire friends who funded his St. F.X. legacy project, Toronto Star an’n 30. November 2017

Weblenken[ännern | Bornkood ännern]