Vanessa Voigt

Vanessa Voigt 2022

Vanessa Voigt (* 7. Oktober 1997 in Schmalkalden) is en düütsch Biathletin. Hör bitlang gröttste Spood is de Gewinn vun de Bronzemedaille mit de düütsch Fruenstaffel bi de Olympisch Winterspelen 2022. Todem weer se ok Eerste in de Gesamtwertung vun den IBU-Cup in de Saison 2020/21.

Familie un Herkunft

Vanessa Voigt stammt ut Seligenthal, in de Nahberschap vun hör Öllernhuus wahnt ok de ehmalge Biathlet Sven Fischer. Voigt hett twee Bröers. Hör Twillingsbröer Kevin Voigt is Fotograf.

Werdegang

Vanessa Voigt fung mit 8 Johren mit dat Langloopen an, 2010 wessel se aber wegen de beter Trainingsbedingungen an dat Sportgymnasium Oberhof. 2013 hett se hör eerst Versöök mit de Biathlonwappen maakt, um sück den lang vörhannen Kindheitswunsch Biathlon to erfüllen un wiel hör „das einfache Laufen und das Bäume zählen“ to langwielig wurr. In‘n Winter 2015/16 wunn se de Gesamtwertung vun den Düütschlandpokal in hör Öllersklass.

Hör eerst internatschonale Rennen hett Voigt in‘n Dezember 2016 in‘n Rahmen vun den IBU-Junior-Cup 2016/17 bestreeden, bi dat tweet Rennen vun de Saison reck se in Lenzerheide mit en darten Platz hör eerst Podiumsplatzeeren. Dornah keem en tweet Platz – gemeensam mit Christin Maier un Anna Weidel – in dat Staffelrennen von Hochfilzen as ok en tweet Platz in dat Staffelrennen vun de Biathlon-Juniorenweltmeesterschapen 2017 vun Brezno-Osrblie an de Siet vun Sophia Schneider un Anna Weidel. De folgend beid Johren leep se ok in den IBU-Junior-Cup un reck doe in’n Dezember 2017 bi den Sprint in Obertilliach weer up en tweeten Platz. In’n Winter 2019/20 hett se hör eerste Rennen in‘n IBU-Cup bestreeden un reck dorbi in’n Januar 2020 bi den Sprint in Brezno-Orsblie mit en darten Platz hör eerst Podiumsplatzeeren. Ebenfalls in Brezno-Osrblie wurr se dree Daag later gemeensam mit Lucas Fratzscher, Florian Hollandt un Franziska Hildebrand in de Mixedstaffel Tweet. Voigt kunn dorbi as Slusslöperin vun de Mannschap mit fehlerfree Scheeten un en flink Looptiet den Rückstand vun goot 41 Sekunden up de Mannschap vun Russland düütlich körter hollen un reck blots 2,6 Sekunden nah de Siegern dat Teel. In den Saisonverloop reck se noch mehrere Top-10-Platzeeren. Bi de Biathlon-Europameesterschapen 2020 in Minsk weer hör best Platzeeren Platz 13 in dat Mixedstaffelrennen. Een Johr later wunn se aber in Duszniki-Zdrój Sülver mit de Mixed-Staffel.

Siet de Saison 2021/22 trett Vanessa Voigt regulär in‘n Weltcup an. In hör eerst Saison 2021/21 keem se all to dree Insätzen un an’t Enn’n in den Gesamtweltcup up Rang 81.

De Saison 2021/22 leep aber goot an. Se reck dor mehrfack Top-Ten-Platzeeren un stunn Mit Platz 2 bi den Sprint in Oterpää sogüor eenmal up dat Podium (achter Julia Simon, aber vör Karoline Offigstad Knotten un Denise Herrmann. Se wurr ok för de Olympisch Winterspelen 2022 nomineert un keem ok in de Mixed-Staffel dor to’n Insatz un keem gemeensam mit Denise Herrmann, Benedikt Doll un Philipp Nawrath up den 5. Platz. In dat Eenzelrennen över 15 km reck se den 4. Platz (achter Denise Herrmann, Anaïs Chevalier-Bouchet un Marte Olsbu Røiseland. In’n Sprint keem se up Rang 18 in, kunn sück in de Verfolgung aber noch up Platz 12 verbetern. As Startlöperin ahn Fehlschööt wunn se gemeensam mit Vanessa Hinz, Franziska Preuß un Denise Hermann an‘n 16. Februar 2022 de Bronzemedaille mit de Fruenstaffel. De Saison sloot se in den Gesamtweltcup up Platz 13 af.

De nächst Saison keem se in de Gesamtweltcup ok weer mehrfach ünner de best Teihn un reck an’t Enn den 12. Rang. Bi de Biathlon-Weltmeesterschapen 2023 leep dat in de Enzelwettbewarfen nich besünners, se reck aber an de Siet von Hanna Kebinger, Sophie Schneider un Denise Herrmann-Wick de Sülvermedaille mit de Fruenstaffel. Mit de Mixed-Staffel keem se immerhen noch up Rang 6.

De Saison 2023/24 gung gliek goot los up de eerste Statschoon in Östersund mit Platz 3 in dat Eenzel, Platz 5 in’n Sprint und nochmal Platz 3 in de Verfolgung. Platz 4 in’t Eenzel un in’n Massenstart vun Antholz weern hör nächst goot Ergevnisse vör de Biathlon-Weltmeesterschapen 2024. Mit de Fruen-Staffel reck se dor de Bronzemedaille un keem in’n Massenstart ahn Fehlschööt up den 5. Platz. In de Gesamtwertung vun de Saison keem se up den 8. Rang un weer dormit de best Düütsche.

De Saison 2024/25 leep mit Platz 9 in dat Eenzel vun Kontiolahti, Platz 37 in’n Sprint und Platz 4 in de ansluutend Verfolgung goot an. Up de nächst Statschoon in Hochfilzen keem se in’n Sprint up den 12. Platz un in de Verfolgung up Rang 2. Ok up de darte Statschoon in Le Grand-Bornand keemen noch mal Platz 6 und 3 in’n Sprint un Verfolgung dorto. Dornah gung dat, all länger gesundheitlich anslaan, aber düchtig bargdaal. In de Sprintrennen von Oberhof und Ruhpolding keem se blots up den 68. bzw. 70 Rang. Se hett denn de Saison wiet vör de Tiet afslooten. In de Gesamtwertung keem se aber trotzdem noch up den 25. Rang.

Utteknungen

• 2022: Sülvern Lorbeerblatt

Weblinks

Vanessa Voigt. Mehr Biller, Videos oder Audiodateien to’t Thema gifft dat bi Wikimedia Commons.

• Profil bi de IBU
• Athletenprofil bi den Düütschen Skiverband
• Athletenprofil up zoll.de