Vörlaag:Hööftsiet/utwählt Artikel dissen Maand/2018-10
De Bargaante, ok Sandgoos oder Vossaant nömmt, (Tadorna tadorna) höört to de Halfgöse. Dat sünd Aantenvagels, de sotoseggen in’e Midden twuschen Göse un Aanten staht.
De plattdüütschen Naams „Sandgoos“ un „Vossaant“ betreckt sik dor up, datt düsse Vagel in Löcker un (Voss-) Kuhlen unner de Eer bröden deit. „Bargaante“ warrt düsse Vagel up Nedersaksisch, Nedderlannsch, Westfreesch un Noordfreesch nömmt. Ob düsse Naam sik dor up betrecken deit, datt se ehre Eier good versteken (bargen) deit, oder datt se grote Tahlen vun Jungen groot trecken (bargen) deit, oder datt se sik unner de Eer in Kuhlen un Löcker bargen deit, oder, vunwegen datt se in de Dünen (Barge) leven deit, lett sik nich seggen. Up Hoochdüütsch heet se „Brandgans“. Dor an, datt se mol Aante un mol Goos nömmt warrt, kann een good sehn, datt se nich kloor na Göse oder Aanten hen insorteert weern kann. Vundeswegen warrt se na de hüdige Taxonomie to de Halfgöse rekent.