Sunn (Landkreis Stood)
Dit Woort hett noch annere Bedüden: kiek dorför ünner Sünn.
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 21726 | |
| Vörwahl: | 04144 | |
| Geograafsche Laag: | Koordinaten:53° 35′ N, 9° 18′ O53° 35′ N, 9° 18′ O | |
|
| ||
Sunn (hoochdüütsch Sunde) is en lütten Oort un en oold Eddelgood in de Gemeen Olendörp (Samtgemeen Olendörp-Himmelpoorten) in’n Landkreis Stood, Neddersassen.
Geografie[ännern | Bornkood ännern]
De Oort liggt op de Stoder Geest. In Sunn gifft dat de Sunner Seen. Dat Water ut dat Rebeed flütt över’n Hosterbeek af.
De Naveröörd sünd Kuhla un Himmelpoorten in’n Noorden, Düünbeudel in’n Noordoosten, Heinbokel un Hogenoh in’n Süüdoosten, Olendörp Siedlung in’n Süüdwesten, de Timmerlood in’n Westen un Olendörp in’n Noordwesten.
Historie[ännern | Bornkood ännern]
Sunn höört von öllers al to Olendörp mit to un weer keen egen Gemeen. Sunn dükert toeerst in dat Vörder Register von 1500 op, as Meiergood von’n Arzbischop von Bremen. In de Swedentied in de twete Hälft von dat 17. Johrhunnert hett Daniel von Arentsschild den Hoff in Sunn as Lehn kregen. 1705 is Christoph Daniel von Arentsschild as Besitter von Sunn in de Ridderschop von dat Hartogdom Bremen opnahmen worrn un de Hoff weer denn en Eddelgood. De Hoff is bet in dat 18. Johrhunnert in Besitt von de Familie von Arentsschild bleven. Na disse Tied is he an verscheden Besitters verköfft worrn. Toletzt 1847 an de Familie Krull. Hermann Krull hett dat Good 1907 an Otto von Gruben op Kuhla verköfft.[1]
Verwaltungsgeschicht[ännern | Bornkood ännern]
In de Franzosentied hett de Oort toeerst 1810 bet 1811 binnen dat Königriek Westfalen to de Mairie Olendörp in’n Kanton Himmelpoorten höört un denn von 1811 bet 1814 to dat Franzöösche Kaiserriek ünner Napoleon un dor ok wedder to de Mairie Olendörp in’n Kanton Himmelpoorten.
Vör 1885 weer Sunn Deel von de Böörd Olendörp binnen dat Amt Himmelpoorten. 1885 is de Oort denn Deel von’n Kreis Stood worrn un 1932 von’n Landkreis Stood.
Goodsherrn[ännern | Bornkood ännern]
- –1670: Daniel von Arentsschild
- –1721: Christoph Daniel von Arentsschild
- 1847–1852: Johann Gustav Krull
- 1852–: Johann Ernst Georg Daniel Krull
- ~1876–1907: Hermann Krull
- 1907–: Otto (Anton Eduard Wilhelm) von Gruben
- 1984–: Otto von Gruben
Inwahnertall[ännern | Bornkood ännern]
| Johr | Inwahners |
|---|---|
| 1791[2] | 2 Füürsteden |
| 1824[3] | 3 Füürsteden |
| 1848[4] | 12 Lüüd, 2 Hüüs |
| 1. Dezember 1871[5] | 20 Lüüd, 2 Hüüs |
| 1. Dezember 1885[6] | 15 Lüüd, 2 Hüüs |
| 1. Dezember 1905[7] | 11 Lüüd, 2 Hüüs |
Religion[ännern | Bornkood ännern]
Sunn is evangeelsch-luthersch präägt un höört to dat Kaspel von de Martinskark in Olendörp.
För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.
Weertschop un Infrastruktur[ännern | Bornkood ännern]
För Sunn is de Freewillige Füürwehr Olendörp mit tostännig.
Verkehr[ännern | Bornkood ännern]
Sunn liggt an de Kreisstraat 72, de in’n Noordwesten in Olendörp an de Landsstraat 114 ran geiht. In’n Süüdoosten geiht de K 72 in Heinbokel an de K 57 ran, de denn in Düünbeudel Ansluss an de Bundsstraat 73 un in Hogenoh an de B 74 büddt. Ans gifft dat noch en lüttjere Straat, de in’n Noorden na Kuhla geiht.
De nächste Bahnhoff is in Himmelpoorten an de Nedderelvbahn von Cuxhoben na Hamborg, wat so bi söss Kilometer weg is.
Footnoten[ännern | Bornkood ännern]
- ↑ https://www.arcinsys.niedersachsen.de/arcinsys/detailAction?detailid=b4147
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 224
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 592
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 134
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 143
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 152
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 161