Strothmann (Brenneree)
Strothmann weer en Koornbrenneree, de 1886 in Minnen grünnt worrn is. Siet 1996 höört Strothmann as Mark to de Berentzen-Grupp.
Dat Ünnernehmen Strothmann Brennereien is 1886 von Wilhelm Strothmann (* 1859) in Minnen grünnt worrn.[1] Toeerst in de Bäckerstrate, aver al 1888 is dat Ünnernehmen an’n Königswall ümtagen.[1] Üm de Johrhunnertwenn is de Affülleree noch wedder ümtagen, nu na Stemmer.[1] Dorbi hett Wilhelm Strothmann tohoop mit söven Buurn en Brenneree grünnt, üm mehr Brennrechten to kriegen. Bet 1936 sünd de Buurn utbetahlt worrn un de Brenneree weer denn wedder in Alleenbesitt von Strothmann.[1]
Fröher hett dat Ünnernehmen blangen Kööm deelwies ok Suur, Semp un Maltextrakt herstellt.[1] In de Kriegsjohren von’n Eersten un Tweten Weltkrieg dröffen Brennereen blots ganz inschränkt Koorn to Kööm brennen. In düsse Tied hett sik Strothmann mit Opdrääg von dat Heer över Water hollen.[1] In’n Tweten Weltkrieg sünd de Warken in Minnen, Bingen, Saust un Nordhausen von Bummen drapen worrn.[1] Na’n Krieg kunn de Brenneree ok Gin an de engelschen Besattertruppen afsetten un hett ok wedder Suur un Malt herstellt.[1]
Dat Geschäftshuus von de Brenneree is 1923/1924 von’n Architekt Wilhelm Kreis boot worrn.
1933 hett Strothmann de Brennereen Paul Schmidt in Bremerhoben, Neukamp in Saust, Schiff + Sander in Nordhausen, Johann Heinrich Arning in Minnen un en Wienbrenneree in Bingen övernahmen.[1]
Von 1922 bet 1970 harr dat Ünnernehmen in Steinhagen an’n Bahnhoff en Brenneree, in de Steinhäger herstellt worrn is.[2] Anfang de Johren 1960 is Strothmann in Steinhagen op en neet Gelänn an de Mirabellenstrate tagen.[2] Nadem de Ümsatz mit Spirituosen in de Johren 1960 bilütten dalgahn dee, hett Strothmann den Bedriev in Steinhagen un dat Herstellen von Steinhäger opgeven un dat Gelänn in Steinhagen an dat Ünnernehmen Kühne & Nagel verköfft.[2]
1983 is op 41.000 m² en Neebo von de Produkschoonsanlagen in Hahlen boot worrn.[1] 1985 hett Strothmann de Brenneree Wippermann ut Lemge toköfft.[1] As dat Ünnernehmen 1986 sien 100-jöhrig Jubiläum fiert hett, harr dat 140 Lüüd in Lohn un Brood.[1]
As sik 1988 de drüdde Generatschoon von de Familie Strothmann ut Öllersgrünn ut dat Ünnernehmen trüggtehn dee, is de Brenneree an dat nedderlandsche Ünnernehmen Lucas Bols verköfft worrn.[1] Bols hett dat Ünnernehmen denn aver 1996 al wedder an de Berentzen-Grupp verköfft.