Sidney McNeill Gutierrez

Vun Wikipedia
Zur Navigation springen Zur Suche springen
Offiziell NASA-Porträt

Sidney McNeill „Sid“ Gutierrez (* 27. Juni 1951 in Albuquerque, New Mexico, USA) is en ehmalger US-amerikaansch Astronaut.

Utbillen[ännern | Bornkood ännern]

Gutierrez hett 1969 sien Schoolafsluss up de Valley High School in Albuquerque maakt. Dornah hett he Luftfohrttechnik an de United States Air Force Academy studeert un dat Studium 1973 mit en Bachelor afslooten. 1977 kreeg he en Master in Management an dat Webster College.

US Air Force[ännern | Bornkood ännern]

1977 is he in de US Air Force intreeden, 1981 wurr he to’n Testpiloten utbildt un is doruphen meestens Maschinen vun den Typ T-38, F-15 un F-16 flagen.

He hett över 4.500 Floogstünnen maakt up mehr as 30 verscheeden Flooggeräten.

NASA[ännern | Bornkood ännern]

1984 wurr he in de 10. Astronautengrupp der NASA utsöcht un een Johr lang as Pilot utbildt.

He deen ünner annern as Verbinnensspreeker (Capcom) för de Missionen STS-42, STS-45, STS-46, STS-49 un STS-52.

STS-40[ännern | Bornkood ännern]

Sien eersten Weltruuminsatz harr Gutierrez as Pilot bi de Mission STS-40 van‘ 5. Juni bit 14. Juni 1990 mit dat Space Shuttle Columbia ünner dat Kommando vun Bryan Daniel O'Connor. Disse Mission wurr mehrmals verschaaven, wiel an de Ruumfähre verscheeden Mängel uptreeden weern. De anner Besattensliddmaaten weern de Missionsspezialisten James Philipp Bagian, Tamara Elizabeth Jernigan un Margaret Rhea Seddon as ok de Bruuklastspezialisten Francis Andrew Gaffey un Millie Eilzabeth Hughes-Fulford.

Dat weer de fievte Spacelab-Mission, de eerste, de sück blots mit Bioweetenschapen befaaten dee. Dat wichtigste Experiment weer Spacelab Life Sciences-1. Dorbi wurrn hysiologische Ünnersöken an Minschen, 30 Gnaagdeerter un duusende lütt Quallen dörführt. Vun de 18 Ünnersöken hemm sück teihn mit Minschen, söben mit de Gnaagdeerter un een mit de Quallen befaat. Nah eben över 9 Daag weer de Mission to Enn‘

STS-59[ännern | Bornkood ännern]

Bi sien tweet Weltruummission weer Gutierrez Kommandant vun de Mission, de ditmal mit de Endeavour fleegen dee. Sien Pilot weer Kevin Patrick Chilton. Dorto keemen de Missionsspezialisten Linda Maxine Godwin, Jay Apt, Michael Clifford un Thomas David Jones. Teel vun de Mission weer, dat man mit X-SAR Radar Upnahmen vun de Eer maaken sull, um so Klimaverännern un Umweltverschmutzungen to lokaliseeren. Eerst wurr de Missionsdüer wegen utreckend Energiereserven um een Dag verlängert, denn aber noch mal um een Dag, wiel nu dat Weer schlecht wurrn weer. So düer de Mission van 9. bit 20. April 1994, as se nah 11 Daag un ruch weg 5 Stünnen weer lannen deen.

Nah de Ruumflüüg[ännern | Bornkood ännern]

1994 hett Gutierrez de NASA un de US Air Force verlaaten um in de Sandia National Laboratories to arbeiten, de hörrn to den Lockheed-Konzern. He is verheiraadt un hett dree Kinner.

Weblenken[ännern | Bornkood ännern]

Commons-logo.svg Sidney Gutierrez. Mehr Biller, Videos oder Audiodateien to’t Thema gifft dat bi Wikimedia Commons.