Seleukidische Ära

Jahreszahl AΞP op enen Tetradrachmen vun Demetrios I. (Soter). AΞP is in dat milesische Talllensysteem de Tall 161. So stammt de Münt op dat Bild uut dat Jaar 151 v. Chr. (312 v. Chr. + 161 = 151 v. Chr.)

De Seleukidische Ära (kort ook SE för engelsch Seleucid Era, op Latienesch AG för Anno Graecorum) oder daarför dat se in’n greekschsprakigen Delen vun dat Röömsche Riek begäng weer ook greeksche Ära heten is ene Tellwies för Jaren, de vun dat 4. Jaarhunnerd v. Chr. besünners bi den Seleukiden un Parthern, man ook bi anner Völker in’n Orient bet in de islaamsche Tied rin begäng weer. Ook in dat antike Judäa weer de Seleukidische Ära as Tellwies för de Jaren begäng, wat to’n Bispeel Angaven in dat eerste Book vun de Makkabäer un in dat Nee’e Testament wiest.

De Tellwies neem to Anfang Betog op de Heerscherjaren vun Seleukos I., enen Diadochen vun Alexander de Grote, de in’n Negen Oosten de Seleukidische Dynastie begrünn un 312 v.Chr Babylon innamen het. Na sienen Dood tellen siene Nafolgers nich eer egen Heerscherjaren, man bleven bi un tellen de Jaren vun de Innaam vun Babylon 312 v.Chr. af an.

Ook wenn de Seleukidische Ära wiedhen begäng weer sünd Jaarsangaven in düsse Tellwies faken unklaar, wenn se vundaag in den gregoriaanschen Klenner ümrekent warrt. Dat Klennerjaar begünn in Syrien in’n Oktober, so dat’t Jaar 1 SE in Syrien Oktober 312 v. Chr. bet September 311 v. Chr. weer. Man in Babylon begünn dat Klennerjaar in’n April, so dat’t Jaar 1 SE hier vun’n April 311 v. Chr. bet März 310 v. Chr. weer. So is dat bi Jaarsangaven na de Seleukidische Ära swaar to seggen, of se dat syrische oder babyloonsche Systeem bruukt.

De seleukidsche Klenner vermengeleer greeksche un babyloonsche Elementen. Grundlaag weren de Maand- un den Sünnzyklus. Een Jaar harr twölv Maanden, een Schaltjaar 13 Maanden.

In dat Jödendoom weer de seleukidische Ära wiedhen begäng, to’n Bispeel op Ketubbot un Scheidbreven. De Jöden in Jemen bruken de Tellwies noch bet in dat 20. Jaarhunnerd.

Literatuur

• Paul Kosmin: Time and its Adversaries in the Seleucid Empire. Harvard UP, Cambridge 2018.
• Wolfgang Leschhorn: Antike Ären. Zeitrechnung, Politik und Geschichte im Schwarzmeerraum und in Kleinasien nördlich des Tauros. Steiner, Stuttgart 1993, ISBN 3-515-06018-9
• Elias J. Bickerman: Notes on Seleucid and Parthian Chronology. In: Berytus Archeological Studies. 8, 2, 1943, ISSN 0067-6195, S. 73–83, Abschrift im Digital Documentation Center.