Seebandsdiek
De Seebandsdiek weer de Dieklien, de Land Hadeln vör de Floden von de Elvmünn schuult hett. De Diek leeg also an de süden Sied von de Elv.
De Diekverbannen, de vondaag för dat Rebeed tostännig sünd, sünd de Haadler Diek- un Överboverband un de Cuxhobener Diekverband.
Verloop[ännern | Bornkood ännern]
De Diek is von Belen över Oterndörp, Olenbrook (mit en Slüüs an’n Olenbroker Kanaal) un Groden (mit en Slüüs an de Grodener Wettern) langs de Trass von de Nedderelvbahn un de Bahnhoffstraat bet an de Slüüs an’n Landwehrkanaal in Ritzbüttel lopen. De Diek op de Westsied von’n Landwehrkanaal is Döser oder Steenmarner Seediek nöömt worrn. He güng langs de hüdige Poststraat, denn Catharinenstraat oder Bernhardstraat (oder dortwüschen) un Streekweg bet achter Steenmarn. Dor is de Diek bi Duhnen anslaten an de Utlöpers von de Hoge Lieth, de dor bet direkt an de Noordsee ranreckt.
Historie[ännern | Bornkood ännern]
De eerste Seebandsdiek stammt ut dat 12. Johrhunnert. Vörher hett dat keen slaten Dieklien an de Haadler Ünnerelv geven. De Hüüs un Hööv stünnen op Worten oder de Öörd weren von Ringdieken schuult.
Bi de Februarflood 1825 is de Seebandsdiek in Ritzbüttel braken. Dorbi is en Wehl utspöölt worrn un de Diek is üm dat Wehl rüm leggt worrn. Bet 1927 is dat Wehl bilütten verfüllt worrn un vondaag steiht dor dat Huus Atlantic över.
De Diek is üm un bi 800 Johr lang in siene ole Form bestahn bleven. He is jümmer wedder utbetert un deelwies höger maakt worrn, aver de Verloop is all de Tied bleven. Eerst nadem na de Stormfloden von 1962 un von 1976 (de ole Diek harr to düsse Tied an de siedste Steed en Bestickhöögd von 6,80 m) de Dieken an de Elv in de Johren 1980 mit en Bestickhöögd von 8,30 m utboot worrn sünd, hebbt se den olen Diek wegreten un en Diek ganz neet opboot. De ole Diek weer vör düsse Tied noch op en Stück von 19 Kilometer in’n olen Tostand vörhannen. Na’n Diekbo is blots noch de Afsnidd von de Olenbroker Slüüs bet na de Grodener Slüüs nableven. In düssen twee Kilometer langen Afsnidd is de ne’e Diek in dat Diekvörland verleggt worrn un de ole Diek is hier as Slaapdiek bleven. Aver ok düsse Afsnidd harr den blots noch bet 2009/2010 Bestand, as de Haven Cuxhoben för de Produkschoon un dat Verladen von Offshore-Windkraftanlagen utboot worrn is. Sietdem is blots noch en üm un bi 100 Meter langen Afsnidd direkt in’n Westen von de Olenbroker Slüüs nableven. 2018 hett de Haadler Diek- un Överboverband för 150.000 Euro an düssen letzten Afsnidd en Pavillon mit en Diekgeschichtliche Bildungs- un Informatschoonssteed boot.[1]
Literatur[ännern | Bornkood ännern]
- Norbert Fischer: Im Antlitz der Nordsee. Zur Geschichte der Deiche in Hadeln. Landschopsverband Stood, Stood 2007, ISBN 978-3-931879-34-1
- Andreas Wendowski-Schünemann, Mathias Wiegert un Matthias Fischer: Der Hadler Seebandsdeich in Cuxhaven. Erste archäologische Untersuchung 2008. In: Nachrichten aus Niedersachsens Urgeschichte Band 78/2009, Sied 195ff.
Footnoten[ännern | Bornkood ännern]
- ↑ Altenbruch: Pilgerstätte zur Deichgeschichte, Niederelbe-Zeitung an’n 13. September 2018