Sahara (2005)

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Sahara
Düütsch Titel: Sahara – Abenteuer in der Wüste
Produkschoonsland: USA, Düütschland, Grootbritannien, Spanien
Johr vun’t Rutkamen: 2005
Läng: 124 Minuten
Originalspraak: Engelsche Spraak
Öllersfreegaav in Düütschland: FSK 12
Filmkru
Speelbaas: Breck Eisner
Dreihbook: Thomas Dean Donnelly
Joshua Oppenheimer
John C. Richards
James V. Hart
Produkschoon: Mace Neufeld
Howard Baldwin
Karen Elise Baldwin
Musik: Clint Mansell
Kamera: Seamus McGarvey
Snitt: Andrew MacRitchie
Szenenbild: Allan Cameron
Kledaasch: Anna B. Sheppard
Dorstellers

Sahara is de Titel vun en US-amerikaanschen Aventüerfilm ut dat Johr 2005 mit Matthew McConaughey, Penélope Cruz un Steve Zahn in de Hööftrullen. Dat Dreihbook baseert op den Roman Sahara vun de US-amerikaanschen Schriever Clive Cussler.

Inholt[ännern | Bornkood ännern]

In Westafrika breedt sik en unbekannte Süük ut. De Behöörden künnt aver nix maken, vunwegen dat in Mali, woneem de Oorsprung vun de Krankheit vermoodt warrt, de Laag för Utlänners gefährlich is. Dor regeert neemlich de Warlord Kazim, de sik üm de Süük nich scheert. Dorüm wennt sik de beiden WHO-Dokters Eva Rojas un Frank Hopper an de NUMA-Aventürers Dirk Pitt un Al Giordino, de sülvst op’n Weg dorhen sünd. För allen Dirk will dor na dat geheemnisvulle snaaksche Panzerschipp CSS Texas söken, dat in’n Sezessionskrieg vun de Konföderierten Staaten losschickt worrn is un na Dirk sien Vermoden in Afrika strannt wesen schall. En Henwies hett em op de Spoor na Mali bröcht. So maakt se sik op’n Weg un nehmt de beiden Dokters en Stück wiet mit op’n Niger.

Ünnerwegens stööt Dirk un Al aver jümmer wedder op Suldaten, de jem wat wüllt. Se höört to den malischen Warlord Kazim. Unafhangig dorvun kriegt ok de WHO-Dokters Eva un Frank Arger mit Kazim sien Lüüd. Se loop jem in de Hannen, wobi Frank dootschaten warrt, vunwegen dat de Suldaten keen Tügen torüchlaten wüllt. Eva kann nix doon, is aver in en Brunnen in Sekerheit. As Dirk un Al Eva befree’n doot, sett se jemehrn Weg tosamen foort. Se glöövt an en Verswören. Wohrhaftig hett Kazim heemlich mit den franzööschen Grootindustriellen Massarde to kriegen, de in de Wööst en solare Müllopböötlaag ünnerhollt, woneem he aver ok tünnenwies Giftmüll lagert. Dat is ok de Oorsaak för de Süük, vunwegen dat ut de Fatten Gift in en Nevenarm vun’n Niger insickern deit, wodör dat Grundwater kuntamineert warrt.

In de Twüschentiet is Rudi Gunn, de anfangs mit de beiden Aventürers ünnerwegens weer mit Proven wedder torüch bi sien Schipp. Admiral Sandecker, för den Dirk un Al arbeit, finnt rut, dat de Toxinen, de vun Massarde sien Anlaag in’t Water insickert dat Wassdom vun Rootalgen föddert. Wenn de in de Ozeanen kamt, drauht sogors de Gefohr för dat Weltklima. Man, so wiet kummt dat opletzt nich: Dirk, Al un Eva kriegt Togang to de Fabrik in de Wööst un künnt in’n letzten Ogenblick verhinnern, dat sik de Anlaag sülvst tonichten maakt, as Massarde versöcht sien Sporen to verwischen. In’n Showdown finnt de Helden nich blots dat snaaksche Panzerschipp midden in de Wööst, man kriegt mit de Hülp vun en poor Tuareg-Stämm, mit de se sik kort vörher anfrünnt hebbt, ok de Suldaten vun Kazim ünner. Se kann opletzt de Süük indämmt un dat gol in Sekerheit bröcht warrn, un Massarde kriggt sien gerechte Straaf.

Kritik[ännern | Bornkood ännern]

  • moviemaze.de kummt to den Sluss, dat Sahara allns hett, wat en goot Aventüer in de Wööst bruken deit, so as en Helden mit Charisma, en go’e Geschicht – ok wenn se ’n beten unrealistisch is – veel Witz un Action. He meen, dat de Film richtig weer för all Lüüd, de sik twee Stünnen in’t Kino vergnögen wulln un sik nich an en löckerige Geschicht stören deen.[1]
  • Op mpex.net warrt de Film vun’n Stil her mit Aventüerfilmen ut de Indiana-Jones-Reeg vergleken. Loovt warrt sünners de Woortwitz un dat de Film nich dröög un anstöövt ankummt as ok de Soundtrack. Deepgang un philosophische Achtergrünnen schüll een vun de Geschicht nich vermoden, man sik blots hensetten un entspannen.[2]
  • Op filmstarts.de weer de Film ok kortwieligen Actionfilm beschreven, de Action, Spaaß un coole Spröök an’n lopen Band beden de un dorüm vör en entspannten Kinoavend jüst dat richtige weer. Kritiseert weer aver de humanitäre Aspekt bi de Geschicht, de ’n beten to dull in’n Vördergrund rückt worrn is.[3]

Utteken[ännern | Bornkood ännern]

Sahara weer vör tosamen söven Filmpriesen nomineert un is mit twee dorvun uttekent worrn:

Achtergrünnen[ännern | Bornkood ännern]

Vergliek mit den Roman[ännern | Bornkood ännern]

De Film is na den glieknöömten Roman vun Clive Cussler entstahn, de to en Bookreeg ründ üm den NUMA-Helden Dirk Pitt un sien Sidekick Al Giordino. För den Film sünd tallrieke Steden vun den Roman ännert worrn:

In’t Book warrt to’n Bispeel beschreven, wat ut Abraham Lincoln worrn is, de sik as Passageer op dat Panzerschipp ophollen hett. Disse hele Deel warrt in’n Film weglaten. Dat glieke gellt för de Geschicht rund üm en Ingrieptrupp vun de UNO, de in’t Book gegen de Truppen vun General Kazim hülpen deit. Dat Panzerschipp hett blots den Rahmen vun de Geschicht billt un harr mit de egentlichen Geschicht nich veel to doon. Weglaten weer ok de Straafmine vun Kazim, woneem he Dokters vun de WHO fangen hollen de, de vun de Helden un de UNO-Suldaten befreet warrt. An de Steed is in den Film aver dat Drapen mit de Tuareg inboet worrn. Dorblangen sünd noch wietere Vertellsträng weglaten worrn. För den Film nee utdacht weer dorgegen de Figur vun den Agent Carl, de in’t Book nich vörkummt.

Produkschoon[ännern | Bornkood ännern]

Dreiht weer de Film vun Januar bit März 2004, toeerst in Marokko, dorna een Maan dlang in Spanien un toletzt noch mol fief Weken in Grootbritannien. Wiel de Dreiharbeiten harr de Kru veel mit Sandstörm to kriegen. Plaant weer de Produkschoon an sik al veel fröher. Al in’n Sommer 2001 schüll de Dreih mit Hugh Jackman in de Hööftrull anfangen, man wegen de Terroranslääg vun’n 11. September is dat Projekt eerstmol op Ies leggt worrn. As dat denn losgahn schüll, weer Jackman mit annere Arbeiten besett. Twüschendör weer seggt, dat Tom Cruise oder Brad Pitt de Rull övernehmen schüll.

McConaughey, de opletzt de Hööftrull speel, hett sik butendem ok as utföhren Produzent inbröcht, nadem he sik söven Johren lang mit de Figur ut’nannersett harr. As Dirk Pitt hett he, na Vörlaag vun de Romanen, gröne Kuntaktlinsen dragen un sik de Haar bruun farvt. Bito hett he Warf för den Film maakt, vunwegen dat he mit en Ford-Pickup un en Wahnwagen mit de Opschrift Sahara dör de USA föhrt is. Matthew McConaughey un Penelope Cruz sünd na den Film wohrhaftig en Tiet lang en Poor wesen, man dat hett nich anduert, vunwegen dat se sik nich faken sehn künnen un övereenkamen weern, jemehr Verbinnen wedder to lösen.

Literaturvörlaag[ännern | Bornkood ännern]

  • Clive Cussler: Operation Sahara, Goldmann (2005) – ISBN 3442461553 (düütsche Taschenbook-Neeutgaav mit Filmbild-Cover)
  • Clive Cussler: Sahara: A Dirk Pitt Adventure, Pocket (2005) – ISBN 1416513418 (engelsche Taschenbook-Neeutgaav mit Filmbild-Cover)

Borns[ännern | Bornkood ännern]

  1. Filmkritik vun Thomas Straßer op www.moviemaze.de; afropen an’n 9. Januar 2015
  2. Filmkritik vun Lars Lehmann op www.mpex.net; afropen an’n 9. Januar 2015
  3. Filmkritik vun Deike Stagge op www.filmstarts.de; afropen an’n 9. Januar 2015

Weblenken[ännern | Bornkood ännern]