Raphaël Poirée

Vun Wikipedia
Raphaël Poirée
Raphaël Poirée

Raphaël Poirée (* 9. August 1974 in Rives, Département Isère, Frankriek) is en ehmalger franzöösch Biathlet.

Biathlonloopbahn[ännern | Bornkood ännern]

Upstieg[ännern | Bornkood ännern]

De internatschonale Biathlon-Karriere vun Raphaël Poirée fung 1994 mit den Gewinn vun twee Junioren-Weltmeestertiteln an. In’ Biathlon-Weltcup is he eerstmals in de Saison 1995/96 nennenswert uptreeden, as he an dat Saisonenn’ Platz 17 in’ Gesamtweltcup belegg. Sien eerst Weltcupsieg hett Poirée in de Saison 1997/98 an’ 8. Januar 1998 bi den Sprint in Ruhpolding schafft, mit den fievten Platz in’ Gesamtweltcup reck Poirée ok sien eerste Top-10-Platzeeren. In’ März 1998 wunn he ok sien eerst Medaille bi Weltmeesterschaften, bi dat Verfolgungsrennen in dat sloweensch Pokljuka wunn he de Bronzemedaille achter Wladimir Dratschow un Ole Einar Bjørndalen. In de dorupfolgen Saison belegg he as in de Vörsaison Platz fiev in’ Gesamtweltcup.

Spoodriek Johren[ännern | Bornkood ännern]

Mit Anfang vun de Saison 1999/00 fungen de Johren an, in de sück Poirée to en vun de domineeren Athleten vun den Biathlonsports entwickeln dee. Dree Mal in Reeg wunn he den Gesamtweltcup un wurr so to en düersam Konkurrenten vun den Norweger Ole Einar Bjørndalen. Ok bi Weltmeesterschapen weer Poirée mehrfack spoodriek: In de Johren 2000 bit 2002 wunn he dree Mal nahnanner den Weltmeestertitel in’ Massenstart, wat hüm ok den faken ziteerten Titel „Meister des Massenstarts“ inbroch. Dorneben hett he 2001 ok mit de franzöösch Staffel de Goldmedaille haalt.

Twee langjohrig Konkurrenten gemeensam an’ Scheetstand: Raphaël Poirée un Ole Einar Bjørndalen bi den Weltcup in Antholz 2006

Weniger spoodriek verleep för Poirée de Saison 2002/03. In’ Gesamtweltcup belegg he den veerten Platz, bi de Weltmeesterschapen in Chanty-Mansijsk wunn he blots en Bronzemedaille in’ Massenstart.

To de spoodriekst Saison in de Loopbahn vun den Franzosen wurr de Saison 2003/04: Poirée wunn to’n veerten Mal den Gesamtweltcup as ok all Disziplinen-Weltcups. Bi de Weltmeesterschapen 2004 in Oberhof weer he mit dree Goldmedaillen in Sprint, Eenzel un Massenstart de spoodriekste Athlet bi de WM un hett dorto mit sien Ehefru en Rekord upstellt: Dat Ehepaar hett söben vun teihn Goldmedaillen wunnen.

Kien Glück bi Olympisch Spelen[ännern | Bornkood ännern]

So goot dat ok in’ Weltcup leep, en olympische Goldmedaille bleev Raphaël Poirée trotz de Deelnahm an dree Olympisch Spelen verwehrt. 2002 wunn he in Salt Lake City mit de Sülvermedaille in de Verfolgung (achter Ole Einar Bjørndalen, aber vör Ricco Groß) sien eenzige olympische Eenzelmedaille, mit de franzöösch Staffel wunn he 2002 un 2006 in Turin jewiels Bronze.

Karriereenn’[ännern | Bornkood ännern]

Wiels de Weltmeesterschapen 2007 in Antholz geev Poirée nah de Goldmedaille in’ Eenzel bekannt, an’ Enn’ vun de Saison 2006/07 sien Loopbahn aftosluuten.[1] He hett de WM mit en kumpletten Medaillensatz afslooten, neben de Goldmedaille in’ Eenzel (vör Michael Greis un Michal Šlesingr) hett he noch Sülver mit de franzöösch Mixed-Staffel un Bronze in’ Massenstart haalt.

De Rennen nah de WM verleepen för hüm in’ Gegensatz to’n Saisonanfang besünners spoodriek. Verklort wurr disse Leistungsünnerscheed in beid Saisonhälften dormit, dat he un sien Fru en Kind verwacht harrn. Nah de Gebort vun dat tweete Kind wurr Poirée, de todem all wuss, dat dat sien letzt Rennen weern sullen, besünners entspannt. Bi de dartletzt Weltcupstation in dat finnische Lahti kunn he all dree Rennen winnen. Disse Siegesreeg hett he bi de vörletzt Weltcupstatschoon in Oslo mit den Sieg in’ Eenzel fortsett. Dat bedüüd denn ok de Sieg in den Eenzel-Disziplinenweltcup un broch Poirée nah en to Anfang wenig tofräestellend verloopen Saison ok in’ Gesamtweltcup weer in en utsichtsriek Positschoon. Sien vörletzt Rennen hett he achter Bjørndalen up en tweeten Platz afslooten. Sien letzt Weltcuprennen weer de Massenstart an’ 11. März 2007 in Oslo, dat he up Platz 2 afsluuten dee.[2] Sülvst hier kunn blots en Teelfoto wiesen, dat he blots um wenige Zentimeter vun sien johrelangen düersamen Rivalen Ole Einar Bjørndalen slahn wurr. All acht vun sien letzt Eenzelrennen kunn he up en Podestplatz afsluuten, he wurr fiev Mal Eerst, twee Mal Tweet un eenmal keem he up den darten Platz. De Reis nah Chanty-Mansijsk to de letzte Weltcupstatschoon hett he nich mehr mitmaakt, ofschons he in’ Gesamtweltcup blots wenig Punkte achter den Führenden Michael Greis leeg.

Siet letzt Rennen hett Poirée buterhalv vun den Biathlon-Weltcup bestreeden: Bi de Militärweltmeesterschapen 2007 in dat estnisch Võru wunn he an’ 22. März den WM-Titel in’ Sprint,[3] bi de Franzöösch Meesterschapen kunn he an’ 30. März in Le Grand-Bornand buterdem den Massenstart up sien Naam schrieven.[4] Anfang 2008 nehm Poirée noch an mehreren Skimarathon-Volkslööp spoodriek deel, ünner anner an den legendären Worldloppet-Loop Transjurassienne in’ franzöösch Jura, be de he mit den 4. Platz en Podestplatz um wenig Zentimeter verpass..

Nah sien aktiv Loopbahn weer he bi de Weltmeesterschapen 2008 in Östersund as Experte för Eurosport beschäftigt. Buterdem hett he in Norwegen as Trainer arbeit, ünner annern vun Lars Berger.

Vör de Saison 2012/2013 is Raphael Poirée as Trainer nah Wittrussland wesselt. Sien Familie, also Ehefrau Liv Grete un de dree Deerns, sullen widerhen in Norwegen wahnen. De Tosommenarbeit weer tonächst blots bit to de Olympisch Winterspelen 2014 in Sotschi plaant. Poirée hett dor ünner annern mit den Düütschen Klaus Siebert tosommenarbeit, de Anfang April för sien Arbeit vun den wittrussischen Verband ehrt wurr. Dat Trainerprojekt gung aber all vör de Tiet in’ April 2013 in gegensiedig Invernehmen to Enn’[5].

Bilanz[ännern | Bornkood ännern]

Sien gröttste Erfolge reck Raphaël Poirée bi Weltmeesterschapen, siet 2000 wurr he all tosommen achtmal Weltmeester un wunn 18 WM-Medaillen (8x Gold, 3x Sülver, 7x Bronze). Dorto is he veermalig Gesamtweltcup-Sieger un hett 44 Weltcupsiege schafft. Domit is he nah Ole Einar Bjørndalen de spoodriekste Biathlet in’ Weltcup.

Poirée is todem neben sien franzöösch Landsmann Martin Fourcade de bitlang eenzige Biathlet bi de Mannlüüd, de dat schafft hett, den Gesamtweltcup un all Disziplinen-Weltcups binnerhalv vun een Saison to winnen (Saison 2003/04). In sien Loopbahn is hüm dat gelungen, teihn Disziplinenweltcupwertungen un – tosommen mit de veer Gesamtweltcupsiege – 14 Weltcupwertungen up sien Naam to schrieven. Mehr Weltcupwertungen hemm bi de Mannlüüd blots Ole Einar Bjørndalen un Martin Fourcade wunnen.

Privatleven[ännern | Bornkood ännern]

Poirée weer van 2000 bit 2013 mit de ehmaige norweegsch Biathletin Liv Grete Poirée (borene Skjelbreid) verheiraadt[6]. De beid hemm dree gemeensam Döchter. Sien Bröer Gaël Poirée is ebenfalls en ehmalger Biathlet. Ann-Elen Skjelbreid, de Süster vun Liv Grete, is ebenfalls Biathletin. Egil Gjelland, sien ehmalger Schwager is Athletenbotschopper vun de Entwicklungshülpsoganisatschoon Right to Play.[7]

Enn’ 2009 hett Raphaël Poirée en Unfall mit sien Quad harrt un wurr bit Enn’ Januar 2010 in en Klinik behannelt.[8][9]

Weblenken[ännern | Bornkood ännern]

Raphaël Poirée. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. http://www.biathlonworld.com/ger/page_000235_648.htm
  2. http://www.biathlonworld.com/ger/page_000231_700.htm
  3. Militärweltmeesterschapen 2007 in Võru: Ergevnis Sprint van’ 22. März 2007
  4. Franzöösch Meesterschapen 2007 in Le Grand-Bornand: Ergevnis Massenstart van’ 30. März 2007
  5. Herutgever: biathlon-online.de; [1], Weißrussen und Raphael Poiree trennen sich, van 23. April 2013, afropen an den sülvigen Dag
  6. [2] Liv Grete og Raphael Poiree separeres, dagbladet.no van’ 5. Juli 2013, afropen an’ 31. Januar 2014
  7. http://www.righttoplay-ski.com/nav1/cross-country/news-events/detail/article/37/successful_support_for_right_to_play_in_france.html
  8. Biathlon - Poiree aus Klinik entlassen bei Focus Online vom 26. Januar 2010
  9. Nach dem Quad-Unfall: Ex-Biathlet Raphael Poiree gibt erstes Interview