Ragnhild Femsteinevik

Ragnhild Femsteinevik (* 27. August 1995 in Hatlestrand, Hordaland) is en norweegsch Biathletin. Se is tweemal Europameesterin wurrn, hörr in de Saison 2022/23 to dat norweegsch Weltcupteam un fier mit de Staffel en Weltcupsieg.

Sportliche Loopbahn

Mittelfeld in’n IBU-Cup un eerste EM-Medaillen

Ragnhild Femsteinevik startet för den Vereen Hålandsdal IL. Hör eerst internatschonal Rennen hett se bi de Juniorenweltmeesterschapen 2016 in dat rumäänsch Cheile Grădiștei bestreeden un reck in dat Eenzelrennen den 27. Rang, in dat sülvig Johr kröön se sück mit Hilde Fenne un Jori Mørkve to norweegsch Meesterin in’n Staffelwettbewarf. To Anfang vun de Saison 2016/17 wurr se in dat eerst Rennen vun den IBU-Cup, den Sprint in Beitostølen, Fiefte un wurr doruphen glieks för de Weltcuprennen in Östersund un up de Pokljuka-Hochebene nomineert. Nah dree Rennen, de se to‘n Deel wiet buterhalv de Punkteränge afsluuten dee (eenmal wurr se sogor Vörletzte), keem se dornah blots noch in de IBU-Cup to’n Insatz. Nah een Johr ahn internatschonale Rennen is se in’n Winter 2018/19 weer in’n IBU-Cup antreeden. Mit en darten Platz bi den Sprint an’n Arber reck se hör eerst Podiumsplatzeerung, in de Lenzerheide folg – gemeensam mit Håvard Bogetveit, Johannes Dale un Emilie Kalkenberg – in dat Mixedstaffelrennen noch en dart Platz. Nah en gooden negenten Platz in dat Eenzelrennen över 15 km bi de Europameesterschapen in Minsk verpass Femsteinevik in de Single-Mixed-Staffel knapp de Medaillenränge, nahdem Endre Strømsheim nah dat letzt Scheeten dree Straafrunnen loopen muss. Ok in de Saison 2019/20 hett se kien internatschonale Wettkämpe bestreeden; eerst to de Europameesterschapen 2021 weer se wedder an’n Start, verpass aber de Top Ten in all Rennen recht düütlich. In’n Rest vun de Saison dorgegen reck se in’n IBU-Cup ahn Utnahm Top-10-Ergevnisse, womit se in dat letzt Trimester in‘n Weltcup starten drüff un in Nové Město na Moravě nah Rang 47 in‘n Sprint eerstmals en Verfolgungsrennen up de höchste Ebene recken kunn.

Europameestertitel un WM-Medaillen

In‘n Dezember 2021 fier Femsteinevik mit den Massenstart vun Sjusjøen hör eersten Sieg in en IBU-Cup-Rennen. Nahdem se ok den Sprint vun Osrblie in’n folgenden Januar winnen kunn, weer se af den Weltcup in Ruhpolding Deel vun dat norweegsch Weltcup-Team un wunn as 34. Vun den Sprint ok hör eerst Ranglistenpunkte.

Düütlich spoodrieker weer se bi de Europameesterschapen. Femsteinevik wunn in’n Sprint as ok mit de Mixedstaffel un kröön sück so to en tweefack Europameesterin. Nahdem se in den Saisonverloop noch en wiederen Sieg as ok twee Podestplätze reckt harr un de IBU-Cup-Gesamtwertung mit 25 Punkten Rückstand up Lou Jeanmonnot as Tweet afslooten harr, keem se an dat Enn’n vun de in Oslo nochmal in den Weltcup to’n Insatz keem keem dor in’n Sprint up Rang 15, wat bit dorhen hör best Ergevnis weer. An dat Enn’n vun de Saison belegg se Rang 62 in de Weltcup-Gesamtwertung.

To’n Winter 2022/23 steeg Femsteinevik in de A-Mannschap vun Norwegen up is den dörgahnd in’n Weltcup antreeden. Hör eerst Podiumsplatzeerung mit en Staffel reck se mit Karoline Offigstad Knotten, Ida Lien un Ingrid Landmark Tandrevold glieks bi de eerst Statschoon in Kontiolahti]], nah ehrder enttäuschenden Eenzelrennen leep se sluutend Midden Dezember in’n Massenstart vun Le Grand-Bornand up den negenten Platz un somit eerstmalig ünner de Top-10. De eerste Staffelsieg folg sluutend an de Siet vun Knotten, Tandrevold un Marte Olsbu Røiseland Midden Januar 2023 in Ruhpolding. Ok an de Weltmeesterschapen in Oberhof hett se deelnommen un reck dor as best Ergevnis Platz 21 in de Verfolgung, in‘n Gesamtweltcup stunn se an dat Saisonenn’n up Rang 34.

Wegen en Coronaerkrankung verpass Femsteinevik de eersten Wettkämpfe vun den Winter 2023/24 un hett dat eerst Trimester blots in’n IBU-Cup bestreeden, wo se besünners wegen völ Scheetfehler blots een Top-10-Ergevnis halen dee. In de Folge muss se in’n Januar in den dartklassigen Norwegencup starten. Dor reck se denn aber goot Ergevnisse un kreeg hör IBU-Cup-Platz torüch, wo se nu ok düütlich betere Leistungen wies. In’n März wunn se in Obertilliach fehlerfree en Sprint. An dat Enn’n vun de Saison keem se up Rang 17 in de Gesamtwertung.

In dat Fröhlohr 2024 hett de norweegsch Verband Ragnhild Femsteinevik ut all Kadern streeken. Se is sietdem Deel vun dat privat Team Havland, to dat ünner annern ok Marit Ishol Skogan un Karoline Erdal hörrn. Mit goot Leistungen in den tweetklassigen IBU-Cup hett sück Femsteinevik in‘n Januar 2025 tp de Wettkämpfe in Ruhpolding torüch in den Weltcup kämpt. Se wurr denn in de Folge ok för de Deelnahm an de Weltmeesterschapen nomineert un is dor den Sprint, dat Verfolgungs- un dat Eenzelrennen loopen. Unverwacht wurr Femsteinevik ok för de Single-Mixed-Staffel upstellt, gemeensam mit Johannes Thingnes Bø wunn se de Sülvermedaille. Se weer ok Deel vun de norweegsch Damenstaffel, gemeensam mit Karoline Offigstad Knotten, Ingrid Landmark Tandrevold un Maren Kirkeeide wunn se nochmals Sülver. In glieker Besetten harr de Staffel kört tovör in Antholz bi den Weltcup all den tweeten Platz beleggt un nah de WM gelung dat in Nové Město na Moravě nochmals. In’n Biathlon Gesamt-Weltcup stunn se an’t Enn’n up Rang 44.

In de Folgesaison keem se blots up de eerste Statschoon to’n Insatz, reck dor aber kien Punkteränge. Ok in den IBU-Cup reck dat blots eenmal för en Platz in de Top-10.

Persönliches

Ragnhild Femsteinevik stammt ut Hatlestrand in de Kommune Kvinnherad. Hör Bröer Martin un hör Süster Guro sünd ok Biathleten. Femsteinevik is dorför bekannt, dat se meest all Wettkämpfe ahn Handschen löppt. Tüschendör is se ok mal bi de Skilanglöpers (Sprint) an den Start gahn.

Weblinks

Ragnhild Femsteinevik. Mehr Biller, Videos oder Audiodateien to’t Thema gifft dat bi Wikimedia Commons.