Postgeschicht von Hannover

Vun Wikipedia
Zur Navigation springen Zur Suche springen
De ünner Generalpostdirekter Wilhelm August von Rudloff rutgevene eerste Breefmark von Hannover, 1850/1851

De Postgeschicht von Hannover reckt von de Tied as Hannover 1692 Kurförstendom worrn is, bet to de Annexion von dat Königriek Hannover dör Prüßen 1866 un den Övergang in de prüüßsche Postverwaltung.

Historie[ännern | Bornkood ännern]

Nadem 1692 Hannover en Kurförstendom worrn is, is ut de „Förstlich Bruunswiek-Lümbörgsche Post“ en „Kurförstlich Hannöversche“ worrn. 1715 hett dat Kurförstendom de Hertogdömer Bremen un Veern von Sweden övernahmen. De Bruunswiek-Lümbörgsche Postordnung hett dor aver al siet 1683 gullen. An’n 23. Oktober 1736 hett de Königlich Grootbritannsche Kurförstlich Hannöversche Regerung dat Postwesen övernahmen. Dormit is dat Förstendom Bruunswiek-Wulfenbüttel ut dat Postrebeed utscheden.

Dat Ünnernehmen Thurn un Taxis hett in’n Postvertrag von Wien an’n 25. Juni 1748 dat Recht kregen, de Kaiserliche Riekspost in Hannover wedder intoföhren. 1790 hett de Regerung all de Postanstalten von Thurn un Taxis in dat Kurförstendom wedder ophaven. Se hett blots noch gegen en Transitporto den Dörgang von slatene taxissche Felliesen verlöövt. Ok de Rieksdeputatschoonshauptsluss von’n 25. Februar 1803, de Thurn un Taxis de Gerechtsame von en Generalpostmeester gewährleisten dee, hett dor nix an ännert. Dat Postwesen in Hannover is in Staatshand bleven un stünn ünner dat Finanz- un Hannelsministerium.

För de Postgeschicht in de Tied von 1810 bet 1814, kiek bi Postgeschicht von dat Königriek Westfalen un Napoleonsche Post in Noorddüütschland. Na de Franzosentied is de ole Stand aver wedderkamen.

De hannöversche Post harr ok Postämter in Hamborg un Bremen. 1848 geev dat alltohoop 26 Postämter, 185 Postexpeditschonen un 129 Postrelais.

1850 sünd de eersten Breefmarken inföhrt worrn. 1851 is Hannover den Düütsch-Öösterriekschen Postvereen bitreden. 1857 sünd Ganzsaken-Ümslääg rutgeven worrn. 1858 hebbt se de Groschen-Währung inföhrt. Dorüm weer en ne’e Utgaav von de Posttaxordnung nödig.

Na de Kapitulatschoon gegenöver Prüßen in’n Düütschen Krieg 1866 müssen von 1. Oktober 1866 af an prüüßsche Breefmarken bruukt warrn. To’n 1. Januar 1867 is de Hannöversche Postverwaltung in de Prüüßsche Postverwaltung ingliedert worrn.

Breefmarken[ännern | Bornkood ännern]

Breefmarken ut Hannover

De eersten hannöverschen Breefmarken von 1850 wiest in en Schild mit dat königliche Wapen, den Weert von de Mark in Tallen un de Opschrift „Franco“ un „Hannover“ dor över. 1853 keem en Mark mit de königliche Kroon in ovalen Schild mit dubbelte Währung (Postvereen) to dree Penn un, över dat Oval, een Drüddel Sülvergroschen. Noch en Markenbild, dat Bild von’n König in en rund Medaillon, keem 1859 an’n Schalter. 1860 is en Stadtpostmark to ½ Groschen rutkamen. Op witten Grund steiht dor en Posthorn, dor över de Kroon un denn dat Woort „HANNOVER“, dor ünner de Weert. Free-Kuverts kemen 1857 in Gebruuk. Baven links op’n Ümslag wiest en Oval dat Bild von’n König. För de Stadtpost geev dat en „Bestellgeld free“-Indruck, mit Kleverbladd 1858, oder mit Peerd in Galopp 1861. För Postanwiesungen is dat Bild von de Mark von 1859 bruukt worrn.

Fälschungen[ännern | Bornkood ännern]

Dat gifft nich veel Fälschungen von Hannover. En Nadruck lett sik licht kennen. Dör Afsnieden von’n Dörsteek warrt versöcht, de Dree-Penn-Mark von 1864 as dürere Mark von 1863 to verköpen. De Minimumgrött bedriggt 21,5 × 24,5 mm. Bi de 10-Groschen-Marken von 1861 sünd Fälschungen sworer to kennen. Dor kann en Prüfer helpen, dör Verglieksmaterial Fälschungen to kennen. Mehr Fälschungen as Originaals gifft dat von de swarten ½-Groschen-Marken. Bi de Fälschung sünd bi de Halterung links blangen dat Mundstück von dat Posthorn een dicke un nich twee dünne Lienen to sehn.[1]

Footnoten[ännern | Bornkood ännern]

  1. Hans Meyer: Altdeutschland: Zu große Angst vor Fälschungen. In: Deutsche Briefmarkenzeitung. 25/83, S. 4437.

Weblinks[ännern | Bornkood ännern]

Commons-logo.svg Breefmarken von Hannover. Mehr Biller, Videos oder Audiodateien to’t Thema gifft dat bi Wikimedia Commons.