Portal:Wikinews/Winners bi „Vertell doch mal!“ uttekent

25. Mai 2008: Vunavend sünd in Hamborg in dat Ohnsorg-Theater de Winners vun’n Kortgeschichten-Weddstried Vertell doch mal! uttekent worrn. Al dat 20. Johr hebbt de veer Landsprogrammen vun’n NDR tohoop mit de Spoorkassen un dat Ohnsorg-Theater to dissen Weddstried opropen. 2207 Geschichten to dat Thema In de School sünd dorto schreven worrn. En Jury ut teihn Lüüd hett 25 Geschichten utsöcht, de later as Book rutgeven warrn schöölt un de besten fief dorvun sünd vunavend vun Schauspelers vun dat Ohnsorg-Theater vörleest worrn un sünd mit Priesen vun alltohoop 3000 Euro uttekent worrn. De fief Winners sünd:

1. Middenmank in Babylon vun Dietrich von Horn (Bartheil)
2. Utgrenzt vun Claus Günther (Hamborg)
3. Mien Mester vun Heero Onnen (Braak)
4. Mit links vun Volker Krüger (Bordelum)
5. Feldkamp stiggt ut vun Birgit Lemmermann (Rodenborg)

En Bericht vun de Gala un de besten Geschichten to hörn gifft dat an’n 26. Mai 2008, fief Minuten na Klock negen avends op NDR 1 Welle Nord bi Von Binnenland und Waterkant. Ok op NDR 1 Neddersassen in de Sendung Plattdeutsch fief Minuten na Klock acht avends un fief Minuten na Klock söven avends bi NDR 1 Radio MV in dat Kulturjournal warrt dor över snackt. Ok de Klönkist hett Vertell doch mal! an’n Sünnavend, 7. Juni 2008, fief Minuten na Klock söven avends, as Thema.