Portal:Wikinews/Kunferenz to Plattdüütsch in de Pleeg

Vun Wikipedia

12. Juni 2008: An’n 27. Juni schall dat in Sleswig en Kunferenz to dat Thema „Plattdüütsch in de Pleeg“ geven. De Kunferenz veranstalten doot de Bundsraat för Plattdüütsch un dat Binnenministerium.

Dat is en Problem, dat vele Inrichtungen in de Pleeg kennt. Ole Lüüd, de Pleeg bruukt un de deelwies Demenz hebbt, fallt opmaal kumplett in jemehr Moderspraak trüch. In Amerika kennt se dat Problem veel, aver ok hier gifft dat Lüüd, de opmaal blot noch Plattdüütsch snackt. De Pleeginrichtungen mööt mit dit Problem ümgahn un dat Personal mutt de Lüüd verstahn könen un opbest mit de Lüüd ok sülvst Platt snacken. Aver ok ans kann dat Bruken vun de Moderspraak helpen, dat sik de olen Lüüd in de Pleeginrichtungen, oder wenn se in’t Krankenhuus mööt, wohl föhlt. Dat gellt natürlich nich alleen för Demenz-Kranke. Veel Inrichtungen sünd dor aver nich op instellt.

Dorvun will de Bundsraat för Plattdüütsch de Lüüd, de in de Pleeg arbeidt, helpen, sik över dat Thema uttotuuschen. To de Kunferenz sünd Experten ut Politik, Verwaltung un ut de Praxis in Pleegheimen un Krankenhüüs inlaadt.