Philipp Nawrath

Philipp Nawrath (2025)

Philipp Nawrath (* 13. Februar 1993 in Füssen) is en düütsch Biathlet. He is 2017 to’n eersten Mal in’n Weltcup antreeden un fier dor 2023 sien eersten Sieg in en Eenzelrennen. 2025 wunn he twee Staffel-Bronzemedaillen bi de Weltmeisterschapen.

Werdegang

Philipp Nawrath is in Nesselwang in den Ostallgäu upwussen. Midden vun de 2000er-Johren fung he mit dat Biathlon bi den örtlichen Skivereen an.

Nah sien Realschoolafsluss 2011 is Nawrath tonächst den Skitoog Mittenwald vun de Bundswehr bitreeden. Later is he to de Spitzensportförderung vun de Polizei Bayern wesselt un fung dor en Utbillen an, de he 2019 afsluuten dee.

Nawrath leevt siet 2013 in Ruhpolding un traineert dor an’n Olympiastüttpunkt in de Chiemgau-Arena in de Grupp mit den Weltcupathleten.

Anfänge (bit 2016)

Philipp Nawrath hörr to’n Anfang vun sien Loopbahn nich to de best Biathleten vun sien Johrgang in Düütschland. Eerst 2010 reck he mal en Sülvermedaille bi de Düütsch Jöögdmeesterschapen in de Öllersklass 17.

In de Vörbereitung up sien letzte Saison in‘n Juniorenberiek hett Nawrath 2013 den Stüttpunkt wesselt un truck nah Ruhpolding. In‘n Winter 2013/14 reck he bi de eersten acht Düütschlandpokalrennen tweemal Platz 3 in de Juniorenklass. As Fieft vun de Gesamtwertung wurr he för sien eerst internatschonalen Wettkämpe bi de Juniorenweltmeesterschapen 2014 in Presque Isle nomineert. Dor reck he in’n Sprint un in’n Eenzel jewiels de Top Ten. As Startlöper vun de düütsch Staffel an de Siet vun Roman Rees, Alexander Ketzer un Matthias Dorfer wunn he de Goldmedaille.

To de Saison 2014/15 is Philipp Nawrath vun den Junioren- in den Utwussenberiek wesselt. He wurr vun den Düütschen Skiverband (DSV) in de Lehrgangsgrupp 1b, d. h. de B-Mannschap, upnommen. En’n Dezember 2014 geev he in Obertilliach mit den Plätzen 13, 19 un 34 sien Debüt in‘n IBU-Cup. In’n Januar 2015 reck he in Duszniki-Zdrój as 16. un 30. ähnliche Ergevnisse; in Ridnaun keem he in’n Sprint blots up Platz 70. Bi de Biathlon Europameesterschapen wurr he nich nomineert. He reck dornah noch mal twee Plätze ünner de best 20, keem aber to dat Saisonfinale ok nich to’n Insatz un hett denn noch veer Düütschlandpokalrennen bestreeden.

In der Saison 2015/16 bleev he Deel vun de Lehrgangsgrupp 1b un keem blots in’n Düütschlandpokal to’n Insatz, wo he up Letzt den darten Rang belegg. Internatschonal wurr he in de Saison aber nich insett.

Eerste Weltcupinsätze (2016 bit 2018)

Nah sien Leistungen ut de Vörsaison verlor Philipp Nawrath to de Saison 2016/17 sien Platz in de B-Mannschap un wurr vun den DSV den Förderkader toordnet. Eerst Enn’n Dezember 2016 is he nah över 18 Maand mal weer in’n IBU-Cup antreeden un reck in Obertilliach in‘n Sprint ahn Scheetfehle ras Dart sien eerst Podest. Bi den Rennen in‘n Januar 2017 in Martell un an’n Arber hörr Nawrath wat dat Loopen angung wiederhen to de best Athleten, keem aber wegen swaak Scheeten nich över en teihnten bzw. 11. Platz as best Ergevnisse herut. Enn’n vun den Maand nehm he an sien eerst Europameesterschapen in Duszniki-Zdrój deel, bi de he in’n Sprint un in de Verfolgung jewiels de Top Ten recken dee. Bi den afsluuten IBU-Cup in Osrblie wurr he 30. un 18. In‘n März 2017 wurr Nawrath eerstmals för den Weltcup nomineert un geev in Kontiolahti mit Platz 34 un 42 in Sprint un Verfolgung sien Instand. Bi dat Weltcupfinale in Oslo in de Folgeweek keem he up de Plätze 49 un 55.

To de Saison 2017/18 kehr Philipp Nawrath in de Lehrgangsgrupp 1b vun den DSV torüch. zurück. Bi den eersten IBU-Cup Enn’n November in Sjusjøen wurr he in twee Sprints 34. un 25. As tweetbest Düütscher vun de Gesamtwertung drüff he in de Folgeweek bi den Uptakt vun de Weltcupsaison in Östersund starten, wo he de Plätze 41, 47 un 52 belegg. Bi den tweeten Weltcup in Hochfilzen reck he in’n Sprint mit fehlerfree Scheeten mit Platz 9 sien eerste Top-Ten-Platzeerung. In de letzt Week vör Wiehnachten keem he in Le Grand-Bornand in Sprint un Verfolgung up Platz 59 un 44. In‘n Januar 2018 allerdings verlor Nawrath sien Platz in de Weltcupmannschap. He is denn bi den IBU-Cup in Osrblie an den Start gahn, wo he mit goot Looptieden en 21. un en negenten Platz recken dee. Enn’n vun den Maand hett he an de Europameesterschapen in Ridnaun deelnommen, bi de sien best Ergevnis en 17. Platz in‘n Sprint weer. In Martell wurr he mit wiederhen swaak Scheetleistungen 22. un 42. Bi den nächsten IBU-Cup nah en fief Week lang düern Paus in’n März in Uwat bleev Nawrath in‘n Sprint ahn Fehler un reck sien tweeten Podestplatz in de Rennreeg. In Chanty-Mansijsk keem he up de Plätze 11, 8 un 16. De Gesamtwertung vun den IBU-Cups sloot he up Platz 18 af. In den Gesamtweltcup reck dat för Rang 60.

Eerste WM-Deelnahmen (2018 bit 2020)

In de Vörbereitung up de Saison 2018/19 weer Philipp Nawrath wiederhen Deel vun de Lehrgangsgrupp 1b. Bi de Düütsch Meesterschapen in‘n September verpass he de Qualifikation för den Weltcup. He fung den Winter bi den eersten IBU-Cup in Idre, wo he nah Platz 11 in den tweeten Sprint in de Verfolgung mit blots een Scheetfehler up Platz een vörloopen un somit sien eersten Sieg haalen dee. Twee Week later in Ridnaun schaff he aber blots weer de Ränge 52 un 29. In Obertilliach is he nah Platz 24 in dat Eenzel to de anner Rennen nich mehr antreeden. In’n Januar 2019 drüff Nawrath nah en 19. un en 14. Platz bi den IBU-Cup in Duszniki-Zdrój to de Rennen in Ruhpolding nah een Johr weer in’n Weltcup starten. He reck dor en 30. un in Antholz en 29. un en 41. Platz. In‘n Februar weer he in Canmore eerstmals Deel vun de düütsch Staffel, de up Platz veer lannen dee. In Soldier Hollow reck he in’n Sprint mit Platz 12 sien bit dorhen best Saisonergevnis. Ofschons he blots de half Norm vun den DSV reckt harr, wurr Nawrath in‘n März 2019 för sien eerste Weltmeesterschapen in Östersund nomineert. He kreeg dor en Insatz in’n Sprint, wo Platz twalf recken dee. In de ansluuten Verfolgung kunn he dissen Platz nich hollen un full up den 21. Platz torüch. Dornah weer he blots noch in’n Massenstart dorbi, den he as 15. afsluuten dee. Bi dat direkt ansluuten Weltcupfinale in Oslo stell he in’n Massenstart up Platz 9 sien Karrierebestleistung in. In de Gesamtwertung belegg he mit twalf vun 25 loopen Rennen Platz 33.

To de Saison 2019/20 wurr Philipp Nawrath vun den DSV eerstmals in de Lehrgangsgrupp 1a, d. h. de A-Natschonalmannschap, upnommen. Bi de Düütsch Meesterschapen in’n September wunn he Sülver mit de bayerisch Staffel. Wegen wat swaaker Leistungen in de Eenzelrennen verpasse he aber de Qualifikatschoon för den Weltcup. He is stattdessen bi den IBU-Cup-Uptakt in Sjusjøen antreeden, wo he in de Verfolgung vun Platz 4 nah Platz lopen un den tweeten Sieg in sien Loopbahn halen dee. In den wiederen Verloop vun den Dezember reck he noch en darten un en veerten Platz in’n IBU-Cup. Anfang Januar 2020 wunn Nawrath bi den IBU-Cup in Osrblie mit Loopbesttiet den Sprint. He kreeg doruphen en Startplatz för den Weltcup in de Folgeweek in Ruhpolding, wo he in’n Sprint as Söbenter en nee Bestleistung upstellen dee. Bi dat Eenzel up de Pokljuka hett he dit Ergevnis as Veert sogor noch mal överdrapen. In’n Februar 2020 nehm Nawrath an sien tweet Weltmeesterschapen in Antholz deel. He is dor blots dat Eenzel loopen un keem dor mit fief Scheetfehlern up Platz 45. In‘n März kunn he wegen Krankheit kien Rennen mehr bestrieden; todem wurr de Saison wegen de anfangen COVID-19-Pandemie vör de Tiet afbraken.

Erfolg in‘n IBU-Cup un Staffelsieg in‘n Weltcup (2020/21)

To Anfang vun de Vörbereitung in‘n Mai 2020 wurr bi Philipp Nawrath en Liestenbröök faststellt. Nah de Operatschoon kunn he mehrere Week blots sinnig traineeren. Nah den Wedderinstieg wurr in’n August en tweet Liestenbröök up de anner Siet faststellt, de ok opereert wurrn muss. An de Düütsch Meesterschapen kunn he dorüm nich deelnehmen un dat führ dorto, dat he vun den DSV in de B-Mannschap torüchstuuft wurr. He verpass somit ok de Mögelkeit, sück för den Uptakt vun de Weltcupsaison to qualifizeeren.

Wegen de COVID-19-Pandemie fung de IBU-Cup-Saison 2020/21 eerst in‘n Januar mit en Düppelveranstaltung an‘n Arber an. In de eerst Week reck Nawrath in‘n Sprint Platz twee un führ todem de düütsch Staffel as Slusslöper to’n Sieg. Ok in de nächst Week hett he noch twee Podestplätze haalt. Bi de Europameesterschapen in Duszniki-Zdrój kunn he wegen wat swaaker Loopleistungen in de Eenzelrennen nich an disse Ergevnisse anknütten, wunn aber mit de Mixed-Staffel as Slusslöper Sülver. Bi en wiedere Düppelveranstaltung vun den IBU-Cup in‘n Februar 2021 in Osrblie wunn Nawrath in de eerst Week in de Verfolgung sien eerst Saisonrennen. In de tweet Week reck he in all dree Rennen de Loopbesttiet un wunn den Sprint; todem wunn he weer as Slusslöper mit de düütsch Staffel.

Anfang März kreeg Nawrath in Nové Město sien eersten Weltcupinsatz vun de Saison. Wegen sien Leistungen in den IBU-Cup-Staffeln leep he ok do ras Slusslöper vun de Staffel. He övernehm vun Erik Lesser, Benedikt Doll un Arnd Peiffer mit meest twee Minüüt Vörsprung, kunn de hollen, un reck somit sien eersten Weltcupsieg. In de Eenzelrennen wurr he 52. un 28. In de Folgewoche is he bi dat IBU-Cup-Finale in Obertilliach antreeden, weil he in de Gesamtwertung utsichtsriek platzeert weer. Nah en achten Platz in dat Eenzel un en Sieg in’n eersten Sprint övernehm he ok de Führung, verlor aber nah en 17. Platz mit dree Scheetfehlern in den tweeten Sprint mit söss Punkten Rückstand gegen Filip Fjeld Andersen. Bi dat Weltcupfinale in Östersund wurr he 42. un 26. Dor reck he in de Gesamtwertung Rang 67.

Eerste Olympiadeelnahm (2021/22)

Vör Beginn vun den Winter 2021/22 weer Philipp Nawrath wegen en Entscheed vun de Trainer för den Uptakt vun de Weltcupsaison in Östersund vörqualifizeert. He reck dor in dat tweet Rennen as Sösster in’n Sprint de Olympia-Norm vun den DOSB; sien tweetbest Ergevnis weer Platz 24. Bi den Weltcup in Hochfilzen keem he mit Platz 8 nochmal in de Top-Ten, full aber in de Verfolgung mit söben Scheetfehler up Platz 47 torüch. Ok mit de Staffel klapp dat nich mit dat Podest (Platz 4). In Le Grand-Bornand belegg he in all dree Rennen Plätze tüschen 10 un 20.

Bi den eersten Weltcup in‘n Januar 2022 in Oberhof leep Nawrath nah Platz 51 mit fief Scheetfehlern in de Verfolgung up Platz 25 vör. Ok in Ruhpolding hett he sück vun Platz 41 up Platz 15 in de Verfolgung stiegert, todem reck he mit de Staffel as Tweet erstmals in de Saison dat Podest. Den Weltcup in Antholz hett he nich loopen, um sück up de Olympiavörbereitung to konzentreeren.

In‘n Februar 2022 weer Nawrath in Peking eerstmals för de Olympisch Winterspelen nomineert. All in dat eerst Rennen, de Mixed-Staffel, keem he as Slusslöper to’n Insatz. He hett as Teihnt vun Benedikt Doll övernommen un keem denn as Fieft in dat Teel. In Sprint un Verfolgung keem he up de Plätze 22 un 19. In de Staffel vun de Mannlüüd weer Nawrath weer Slusslöper. He hett vun Doll as Veert tietglik mit den Tweet- un Dartplatzeerten Norwegern un Franzosen övernommen, mit de he bit to dat letzt Scheeten tosommenbleev. Dor aber hett he deen een Straafrunn schaaten un verlor den Ansluss. De düütsch Staffel keem denn up Platz 4. In den afsluuten Massenstart wurr Nawrath 23.

Bi den eersten Weltcup nah Olympia Anfang März in Kontiolahti belegg Nawrath mit de veertbest Looptiet in’n Sprint Platz 7. In Otepää wurr he 33. un 11.; bi dat Saisonfinale in Oslo reck he mit Platz söss in‘n Sprint un Platz fief in’n Massenstart sien best Ergevnisse vun de Saison. De Weltcup-Gesamtwertung hett he up Rang 18 afslooten. Mit Looptieden, de in’n Snitt dree Perzent flinker weern as de Snitt vun dat Feld, weer he de flinkste Löper in dat düütsch Team, wiels he in dat Stahndscheeten mit 72 Perzent drapen Schieven to de swaaker Athleten tell.

WM in Oberhof (2022/23)

Nawrath bi de Weltmeesterschapen 2023 in Oberhof

In‘n August 2022 nehm Philipp Nawrath an de Sömmerbiathlon-Weltmeesterschapen in Ruhpolding deel. Sien best Ergevnis weer Platz 6 in’n Supersprint. Bi de Düütsch Meisterschapen in Oberhof wunn he de Bronzemedaille in’n Eenzel.

För den Uptakt vun de Weltcupsaison in Kontiolahti weer Nawrath wegen sien Leistungen ut de Vörsaison vörqualifizeert. He reck dor mit düütlich swaaker Looptieden as in de Vörjohr de Plätze 18, 29 und 22. In Hochfilzen full he nah Platz 28 in‘n Sprint in de Verfolgung mit söben Scheetfehlern up Platz 54 torüch. Nah disse Ergevnisse wurr he in den IBU-Cup torüchstuuft, kunn aber in Ridnaun wegen Rüggbeschwerden nich starten.

Bi den IBU-Cup in Osrblie Anfang Januar 2023 reck Nawrath de Plätze söben un söss. He drüff doruphen in Ruhpolding un Antholz weer in‘n Weltcup starten, wo he de Plätze 38, 39 un 34 belegg. Wiel he de Norm vun den DSV för de Weltmeesterschapen nich reckt harr, leep he Enn‘n Januar bi de Europameesterschapen in de Lenzerheide um den sössten Platz in de Mannschap. Mit de Bronzemedaille in‘n Sprint un jewiels en fieften Platz in dat Eenzel un in de Verfolgung hett sück Nawrath gegen Philipp Horn un Lucas Fratzscher dörsett un wurr för de Heimweltmeesterschapen in Oberhof nomineert. He kreeg dor in dat Eenzel sien eersten Insatz un reck mit Platz 9 sien best Saisonergevnis. Dornah is he gemeensam mit Sophia Schneider in de Single-Mixed-Staffel loopen, de Platz söss belegg. För de Staffel vun de Mannlüüd wurr he nich upstellt.

Bi den eersten Weltcup nah de Weltmeesterschapen in Nové Město leep Nawrath in de Verfolgung mit de tweet isoleert Tiet vun Platz 30 up Platz elf vör. In de Folgeweek in Östersund stell he mit Loopbesttiet as Veertplatzeerter in dat Eenzel sien bitherig Bestleistung in’n Weltcup in; todem reck he mit Platz dree sien eenzig Staffelpodest in de Saison. Bi dat Weltcupfinale in Oslo keem he up de Plätze 9,14 un 20. De Gesamtwertung hett he up Rang 28 afslooten.

Eerst Weltcupsieg (2023/24)

In‘n Mai 2023 hett sück Philipp Nawrath bi’t Footballspelen en Bänderreet un en Fraktur in‘n Middelfoot totrucken. He leet dat nich opereeren, sonnern konservativ behanneln. All wenig Maand Later wunn he bi de Düütsch Meesterschapen in Ruhpolding in’n Eenzel den eersten Titel in sin Loopbahn (vör Matthias Dorfer un Benedikt Doll); todem wurr he in’n Sprint un Verfolgung jewiels Tweet.

In‘n November 2023 wunn Nawrath de interne Weltcupqualifikatschoon vun de düütsch Mannschap in’n Rahmen vun de norweegsch Saisonanfangsrennen in Sjusjøen. Bi den eersten Weltcup in Östersund fier he in’n Sprint ahn Scheetfehler mit de tweet Looptiet sien eersten Weltcupsieg vör Tarjei Bø un Vebjørn Sørum. In de ansluuten Verfolgung stunn he as Tweet achter Sebastian Samuelsson ebenfalls up dat Podest; todem führ he vörövergahnd den Gesamtweltcup an. As en Grund för sien Spood hemm Beobachter Nawrath sien Kraft in’n Böverkörper utmaakt, de hüm angesichts vun dat nee Verbot vun Fluor-Wachsen besünners goot topasskommen weer. Buterdem harr he sien Stahndscheeten – vör allen de Scheetgeschwindigkeit – ünner Anleiten vun den nee Bundstrainer Uroš Velepec verbetert.

Bi den tweeten Weltcup in Hochfilzen kunn Nawrath mit den Plätzen 34 un 22 nich an de Ergevnisse ut Östersund anknütten un verlor dormit ok dat Geel Trikot vun den Gesamtführenden in’n Weltcup. Mit de Staffel keem he up Platz 3. In Lenzerheide stunn he as Dart in’n Sprint weer up dat Podest; in de Verfolgung hett he denn aber 7 Fehler schaaten un full up Platz 18 torüch. Bi den Massenstart reck dat ok blots to Platz 24. In’n Januar 2024 reck he in Oberhof un Ruhpolding jewiels den tweeten Platz mit de Staffel, in de Eenzelrennen keem he aber nich ünner de best Teihn. In Antholz wurr he 41. un 13.

Bi de Weltmeesterschapen in‘n Februar 2024 in Nové Město leep Nawrath as eerst Rennen de Mixed-Staffel. He hett as tweet Löper in Führung liggend övergeven, an dat Enn’n reck dat aber blots för Rang 5. Bi disse WM geev dat Probleme mit dat Skimaterial; in’n Sprint un in de Verfolgung keem he ok blots up de Plätze 16 un 21, up dat Eenzel hett he verzicht. In de düütsch Staffel vun de Mannlüüd leep he up Positschoon dree. He hett vun Justus Strelow un Johannes Kühn up Platz söben övernommen, un hett up Platz vörloopend an Benedikt Doll övergeven, de de Staffel up Platz veer in't Teel broch. In den afsluuten Massenstart wurr Nawrath Teihnt.

Nah de Weltmeesterschapen wies Nawrath swaakere Looptieden as in de restlich Saison. In Oslo belegg he in’n Massenstart Platz söss. Mit de Staffel reck he in Soldier Hollow den darten Platz, in de Eenzelrennen reck he dor Platz 25 un 31. Bi dat Weltcupfinale in Canmore belegg he de Plätze 12, 11 un 15. De Gesamtwertung hett he as 15. afsloooten.

Best Düütsch in’n Gesamtweltcup (2024/25)

Bi de Düütsch Meesterschapen in Altenberg wunn Philipp Nawrath de Bronzemedaille in‘n Eenzel. För den Uptakt vun de Weltcupsaison in Kontiolahti weer he upgrund vun sien Ergevnisse ut de Saison dorför qualifizeert. Nah Platz 22 in’n Eenzel wurr he ahn Scheetfehler in’n Sprint Dart un reck dormit den veerten Podestplatz in sien Loopbahn. Bi den Weltcup in Hochfilzen keem he tweemal up Platz 8. Ok in Le Grand-Bornand reck he mit de Plätze söss un söben tweemal de Top-Ten.

Nah den Joheswessel leep dat nich so goot wieder. Bit insluutend den Weltcup in Antholz keem he nie nich ünner de best Teihn.

Bi de Weltmeesterschapen 2025 in de Lenzerheide is he tonächst an Positschoon dree in de Mixed-Staffel loopen un reck an de Siet vun Selina Grotian, Franziska Preuß un Justus Strelow de Bronzemedaille, wat ok sien eerste WM-Medaille in sien Loopbahn weer. In’n Sprint (Platz 18), Verfolgung (Platz 44) un Massenstart (Platz 16) leep dat nich so goot. In’n Eenzel is he nich antreeden. In de düütsch Staffel vun de Mannlüüd leep he up Positschoon een. He övergeev up Platz 6 an Danilo Riethmüller. Gemeensam mit Johannes Kühn un Philipp Horn wunn de Mannschap Bronze un Nawrath glieks sien tweete WM-Medaille.

Ok nah de WM keem he regelmatig in de Punkteränge, aber blots bi dat Weltcupfinale nochmal ünner de best Teihn. In de Gesamtwertung weer he as 14. eerstmals de best Düütsche.

Saison 2025/26

Bi den Düütsch Meesterschapen in‘n September an‘n Arber wunn Philipp Nawrath Sülver in’n Sprint un Bronze in de Verfolgung. För den Uptakt vun de Weltcupsaison weer he wegen sien Leistungen ut dat Vörjohr qualifizeert. In Östersund reck he de Plätze 12 un 13, In Hochfilzen fung he mit Platz 15 an, reck denn aber bi de nächst Insätze dreemal den 10. Platz. Bi den Sprint vun Oberhof muss he sück blots den Italiener Tommaso Giacomel slahn geven. To’n Weltcup Afsluss in Oslo reck he nochmal den tweeten Platz achter Johan-Olav Botn aber vör den Weltcup-Gewinner vun disse Saison Éric Perrot. He sülvst hett den Weltcup up Rang 9 afslooten un weer dormit weer de best Düütsche.

Bi de Olympisch Winterspelen, de för de Biathleten in Antholz stattfinnen deen, leep dat för de düütsch Biathleten insgesamt nich besünners goot. Philipp Nawrath keem in’n Eenzel up Platz 5 un in’n Massenstart reck dat för Platz 7. Mit de Staffel vun de Mannlüüd geev dat mit Platz 4 ok kien Medaille. De hett he sück aber mit Bronze in de Mixed-Staffel an de Siet vun Justus Strelow, Vanessa Voigt un Franziska Preuß haalt. Dat weer sien eerste Olympiamedaille und för de Düütschen bi disse Veranstaltung ok de eenzige Medaille.

Persönliches

In‘n Dezember 2023 wurr bekannt, dat Nawrath mit de norweegsch Biathletin Karoline Offigstad Knotten liiert is.

In‘n Oktober 2025 geev dat Biathlon-Paar sien Trennung bekannt.

Weblinks

Philipp Nawrath. Mehr Biller, Videos oder Audiodateien to’t Thema gifft dat bi Wikimedia Commons.

• Indrag up de Sieden vun de IBU (engelsch)
• Indrag up de Sieden vun de FIS (engelsch)
• Indrag up Olympaedia.org (engelsch)
• Persönliche Website vun Philipp Nawrath
• Statistische Auswertung up realbiathlon.com (engelsch)