Penelope Milford

Penelope Milford (* 23. März 1948 in St. Louis, Missouri; † 14. Oktober 2025 in Saugerties, New York) weer en US-amerikaansch Schauspelerin.

Leven

Milford is in Winnetka, Illinois upwussen. 1967 truck se nah New York City, wo se bi Wynn Handman studeeren dee. Nah eenigen Off-Broadway-Produktschonen kreeg se de Rull vun de Jenny in de Broadway-Produktschoon Shenandoah, in de se söben Maand to sehn weer. Hör eerst Filmrull kreeg se 1970 in dat Filmdrama Maidstone vun Norman Mailer, wurr aber nich in’n Afspann nöömt. Hör Sex- un Nacktszene in de Filmbiografie Valentino broch hör 1977 Upmarksomkeit.

In dat Independent-Filmdrama Coming Home – Sie kehren heim vun Hal Ashby övernehm Milford 1978 an de Siet vun Jane Fonda, Jon Voight un Bruce Dern en vun de grötter Rullen. Dorför wurr se 1979 as Best Nevendorstellerin för den Oscar nomineert. In de Kummedie Fort Travis is se 1980 in en gröttere Rull neben Richard Harris, Karen Black un Martin Landau uptreden; gröttere Rullen speel se ok in den Horrorfilm Blutspur (1982) un in den Avendüerfilm Die goldene Robbe (1983). In dat Filmdrama Normal Life (1996) weer se neben Ashley Judd un Luke Perry to sehn. 1997 hett se hör letzten Film dreiht. 2013 speel se an dat Theater in Harold Pinter sien Theaterstück A Kind of Alaska.

Milford weer nah eegen Angaven in dat Öller vun twintig Johren för en körten Tiet mit en Komponisten verheiraadt un Enn’n vun de 1970er Johren eng mit Richard Gere befrüend. Hör jüngere Bröer Kim weer ok Schauspeler. Milford is in’n Oktober 2025 in dat Öller vun 77 Johren storven.

Filmografie (Utwahl)

• 1970: Maidstone
• 1974: Der Mann auf der Schaukel (Man on a Swing)
• 1977: Valentino
• 1978: Coming Home – Sie kehren heim (Coming Home)
• 1980: Fort Travis (The Last Word)
• 1981: Ein Senkrechtstarter kratzt die Kurve (Take This Job and Shove It)
• 1981: Endlose Liebe (Endless Love)
• 1982: Blutspur (Blood Link)
• 1983: Die goldene Robbe (The Golden Seal)
• 1984: Das brennende Bett (The Burning Bed, Fernsehfilm)
• 1985: Der Hitchhiker (The Hitchhiker, Fernsehserie, Folge 2x08)
• 1988: Heathers
• 1990: Miss Missouri
• 1991: Cold Justice
• 1996: Normal Life – Tödliche Illusion (Normal Life)
• 1996: Henry: Portrait of a Serial Killer 2
• 1997: Night of the Lawyers

Utteknungen

• 1975: Drama-Desk-Award-Nomineeren in de Kategorie Outstanding Featured Actress in a Musical för Shenandoah
• 1979: Oscar-Nomineeren in de Kategorie Best Nevendorstellerin för Coming Home – Sie kehren heim

Weblinks

• Penelope Milford in de Internet Movie Database (engelsch)