Pickelsen

Pickelsen (hoochdüütsch: Peckelsheim) is en Deel vun Willebadessen in't södelke Oostwestfalen in't düütsche Bunnsland Noordrhien-Westfalen. De Oort höört hüdigendags to den Kreis Höxter.

Laag

Pikkelsen, ene vörmolige Hansestadt, de inst in'n Kreis Warburg weer, liggt in't Oberwälder Land in't Werserbargland. Pikkelsen liggt circa 200 Meter över NN in de Warburger Börde. Ene ole Buernansiedlung, worr de Stadt un de Borg Pikkelsen 1318 vun de Bischop Dietrich vun Patterbuorn gründ't. In't 19. Johrhunnert is Pikkelsen as Flecken tekent. De Straat, de dor't Löener oder Brauckdoor geiht, is dat Hoofdelement vun't Stadtbild. De anner Doren sünd dat Borgdoor, dat Lutzerdor un dat Waterdoor. De kathoolsche gootsche Parrkark Liborius un Maria worr in't 17. Johrhunnert wedderherstellt.

Sprake

Pikkelsen harr ene Mundart vun de Ruum Saust-Gütsel-Patterbuorn, de to'n westfääschen Dialekt vun dat Plattdüütsche torekent weern kann. Hier warrt mei juk, mägget un buggen seggt.

Weertschop un Verkehr

Traditschonell lä de Weertschap in den Ruum Pikkelsen in de Hannen vun Schaper, Möller, Bruwer un Buern. De Oort lä in't Middelöller an den Hannelsweg Warberich- Deppelt, män hett vandage kene Iesenbahn. Inst geev dat hier en Gericht, dat Gogericht ten Bispeel, män vandage gifft dat nix miehr.

Historie

Pikkelsen höör bit 1803 to dat Förstbisdom Patterbuorn, man denn gung dat korte Tied an't Königriek Westfalen un denn weer dat lang in Preußen. De Stadt weer vun de Striederie mit Bruunswiek-Grubenhagen un vun den hessisch-patterbuornsche Krieg in't 15. Johrhunnert bedrapen un worr in de Dartigjöhrigen Krieg vun Christian vun Brunswiek plünnert.

Welke Öörd in de Naberschop vun Pikkelsen sund in't 19. Johrhunnert wööst wurrn. In't 19. Johrhunnert geev dat hier ene Synagoge.

Inst kreeg de Oort de Elektrizität dor de Elektrizitätswerk AG Mitteldeutschland in Kassel, vandage kricht de Oort de Elektrizität vun de RWE AG in Essen.

Literatur

• W. E. Giefers, Die Anfänge der Städte Borgholz, Borgentreich, und Peckelsheim, in: Westfälische Zeitschrift 39 II (1881).
• Bau- und Kunstdenkmäler von Westfalen, Kreis Warburg (1939)
• P. Reinthal, Peckelsheim, der Grundriß der Burg un der Stadt, eine baugeschichtliche Urkunde, in: Die Warte (1935)