Rapphohn

Rapphohn/Rappheen/Feldhohn/Wildhohn/Patrise
Rappheen (Perdix perdix)
Systematik
Riek: Animalia Stamm: Chordata Klass: Aves Ornen: Galliformes Familie: Phasianidae Ünnerfamilie: Phasianinae Geslecht: Perdix
Wetenschoplich Naam
Perdix perdix
(Linnaeus, 1758)

Dat Rapphohn (Perdix perdix), ok Rappheen, Feldhohn, Wildhohn oder Patries, is en Höhnervagel, de op’n Grund bröddt. Rapphöhner leevt in Steppen- un Heidelandschoppen vun Europa un Asien. Se freet besünners Saden, Wildkrüder un Köörn. Vun wieder weg seht Rapphöhner meist eenheitlich gries ut, wat de Deerter helpt sik to tarnen. Ut de Nöögde bekeken is de licht rode Kopp, de ut griese Feddern vun’n Hals stark rutstickt, good to sehn. Wenn sik de Vagels opricht is op de vörsten Deel vun’n Buuk en düsteren Plack, de as en Hoofiesen formt is, good sichtbor.

Naam

De Vagels hebbt op Plattdüütsch je na Dialekt verschieden Naams. De eerste Deel vun de Naam Rapphohn oder Rappheen geiht op oorindoeuropääsch *erb^h-/ *reb^h- torügg, wat de Klöör „rood/bruun/vossig“ beschreev. Later as dat Woord nich mehr kloor to verstahn weer, wurr dat -hohn/-heen achteran föögt un op den eersten Deel het dat Woord rapp inwarkt, üm dat de flinken Deerter na ene Volksetymologie as „rappe Höhner“ verstahn wurrn. Dorto givt dat Dialektvarianten, de Repp- oder Riëp- as eerste Bestanddeel hebbt.

Anner Naams Feldhohn oder Feldheen un Wildhohn beschrivt den Levensruum vun de Vagels.

Der Naam Patries is besünners in’n Oosten vun’t Plattdüütsche begäng, wo de nedderlandsche Infloot grötter weer. So as dat nedderlandsche patrijs kümmt de Naam vun dat ooltfranzöösche perdriz vun af, dat vun’t latiensche perdrix afstammt, dat wedderüm vun dat ooltgreeksche πέρδιξ pérdix utlehnt is. Dat greeksche Woord hangt wegen dat Flögelruuschen bi’t Opflegen mit πέρδομαι pérdomai ‘pupen’ tohoop oder is villicht en vörgreeksch Substratwoort. Dorto givt dat ok Varianten as Petries, as tohoopsett Woort Patrieshohn oder -heen. Dorvun afkört givt dat ok den Naam Tries(e), Trieshohn/-heen oder as Diminutiv Triesken.

Bestand

De weltwiede Bestand is na de IUCN seker. De Bestand in Europa is man Gefohr un siet de 1970-er Johren stark torüggahn. Vun 1980 bit 2016 is de Bestand rund 94 % daalsackt. De Grund is dat de Levensrüüm vun de Rapphenen tonichtmaakt wurrn, as de Bueree bi’t Feldümleggen de Ackers för de groten Maschienen free maken wull.

De Naturschutzbund Düütschland (NABU) köör de Rappheen 1991 un 2026 to’n Vagel vun’t Johr. De Düütsche Jagdverband verkloor 2016 to’n Johr vun de Rappheen un will so op de stark daalsackt Bestand opmerksam maken.