Operatschoon Walküre
De Operatschoon Walküre weer an un for sik en Plaan vun de düütsche Wehrmacht för den Fall, dat dat in de Tiet vun den Tweeten Weltkrieg en Upstand gegen de düütsche Regeern geven scholl. De Strieders vun den Düütschen Wedderstand üm Claus Schenk Graf von Stauffenberg un Henning von Treskow ümto hefft düssen Plaan denn bruukt un hefft dor just en Plaan för jem ehren Greep na den Staat vun maakt.
De eersten Plaans vun de Operatschoon güngen in'n Anfang vun den Weltkrieg los, vunwegen dat de Regeern bange weer, dat dat mank de Zivilisten in Düütschland oder mank de Frömden, de nah Düütschland wegsleppt wurrn weern oder ok mank de Lüde, de in'n Konzentratschoonslager inseten, to'n Upstand kamen konn. Dor scholl de Operatschoon denn gegenan gahn.
Dorbi güng dat dor üm, dat Suldaten vun dat Reserve-Heer verscheden Punkten in Berlin un in anner grote Städer in dat Riek besetten schollen un gegen de Upsternaatschen gegenan gahn schollen. De Operatschoon scholl bloß denn losgahn, wenn Adolf Hitler süms oder de Kummandant vun dat Reserve-Heer dat Codewoort Walküre persöönlich utspreken döen. Bi den Anslag vun'n 20. Juli 1944 weer Generaloberst Friedrich Fromm Kummandant vun dat Reserve-Heer. He weer an un for sik bi dat Kumplott mit bi, man he wüß al gau, dat Hitler bi den Anslag in de Wolfsschanze nich storven weer. Dor hett he dat Codewoort nich utspraken un de ganze Greep na den Staat hett nich slumpt. He hett denn süms dorför sorgt, dat Stauffenberg un annere in den Hoff vun den Bendlerblock dootschaten wurrn sünd. Man later is he as en vun de Verswörers süms to'n Dode verordeelt un henricht wurrn.