Zum Inhalt springen

De Deerschuulpartei

Vun Wikipedia
(wiederwiest vun Minsch Ümwelt Tierschutz)
Logo vun de Partei

Minsch Ümwelt Deerschuul (hoochdüütsch: Mensch Umwelt Tierschutz, kort: De Deerschuulpartei, bit November 1993 noch MUT) is en politische Lüttpartei in Düütschland, de an’n 13. Februar 1993 in Bonn grünnt worrn is un sik vun jemehrn Swoorpunkt her mit Saken to’n Deerschuul un to Deerrechten befaat un sich ok för en vegan Düütschland insetten deit. De Partei hett siet 2001 Sitten in enkelte Kommunalparlamenten hat, man bi Bundsdagswahlen harr se jümmer Resultaten twüschen 0,2 un 0,5 % kregen. De besten Resultaten kreeg se bi de Europawahlen 2004 un 2009, de Berliner Afordnetenhuuswahl 1999 un bi de Landdagswahlen in Sassen 2004 un 2009, dor hebbt se över 1 % kregen, 2009 sogar över 2 %. In Brannenborg kemen se 2019 sogors op 2,6 %. In’n Juni 2019 harr de Partei ruchweg 1900 Liddmaten.

Politische Inholten

[ännern | Bornkood ännern]

Dat aktuelle Grundsatzprogramm is an’n 4. Mai 2002 op’n teihnten Bundsparteidag in Frankfort an’n Main beslaten worrn. Dat hett dat eerste Grundsatzprogramm aflööst, dat ut dat Grünnerjohr 1993 stammt hett un vun de Parteigrünnersche Ingeborg Bingener utklamüstert weer.

Deerschuulpolitik

[ännern | Bornkood ännern]

De Partei sütt in Minsch, Deert un Natur en „undeelbore Eenheit“[1]. Se will af vun dat anthropozentrische Denken un lever en Politik vun de Mitleevwesenheit[2]. Se will butendem, dat Grundrechten für Beester mit en egenen Artikel in’t Grundgesett stahn schüllt.

Disse Rechten ümfaat na den Willen vun de Partei to’n Bispeel dat Recht op Leven, dat Schulen vör Schaden an Lief oder Psyche un dat Recht op en oortgerecht Hollen. Disse Rechten schüllt blots bi direkte Nootwehr ümgahn warrn dröffen. To de Foddern vun de Deerschuulpartei höört dorüm ok en Verbott vun all Deerversöken, Deertransporten, Bullenkämp, dat Hollen vun Zirkusbeester, de Produkschoon vun Pelzen, de Jagd, as ok op lange Sicht, dat Opgeven vun de Veehtucht in de Bueree un dat Ümstellen vun de Minschen op en vegetaarsche Nehren[3]. Ungefähr een Veerdel vun dat Parteiprogramm tellt to dat Themenrebeet Deerschuul un Deerrechten. De Deerschuul is dorbi en Twüschenstatschon to de Deerrechten.

Weertschopspolitik

[ännern | Bornkood ännern]

De Positschoon to de Weertschop is sozialliberal. Na dat Programm vun de Deerschuulpartei schall de Flaagverkehr op en Maat torüchsett warrn, dat ökoloogsch to verknusen is[4]. Op’t Rebeet vun de Ümweltpolitik is wieter dat Teel, de Gentechnik to verbeden, de Landweertschop ökoloogsch uttorichten, den Verkehr vun enkelte Personen weniger to maken un ahn Tögern ut de Karnenergie uttostiegen. De Sworlastverkehr schall vun de Straten weg op de Schien oder op de Waterstraten verlagert warrn. Entwicklungslänner schüllt dorto bewegt warrn, dat Woold- oder Brandroden natolaten, vun wegen dat de groden Wooldrebeden vun de Eer bannig wichtig sünd bi’n Afbo vun Kohlenstoffdioxid. För dit Teel schüllt de Schulden vun Entwicklungslänners streken warrn.

In de Gesundheitspolitik warrt vun de Partei foddert, dat Gesundheitswesen op ganzheitliche Medizin ümtostellen. Jede Minsch schall dat Recht hebben, free twüschen de Schoolmedizin un Naturheelmethoden to wählen. Gegen Krankheiten schall dorüm ok starker op Homöopathie, Akkupunktur oder Phytotherapie torüchgrepen warrn. Üm to dat Studium vun de Medizin tolaten to warrn, schall en sünnere ethische un moraalsche Ansicht vörrutsett warrn.

De Deerschuulpartei will hen to en soziale un ökoloogsche Martkweertschop, wo de Weertschopspolitik ökoloogsch utricht is. Anstrevt warrt’n Föddern vun’n Middelstand, de Afbo vun Subventschonen un dat Rünnersetten vun de Lohnnevenkosten. Vun de Partei warrt sünners kritiseert, dat de Politik sik meist blots noch an kommerzielle un machtpolitische Intressen orienteert. Butendem schall de Arbeitstiet rünnersett werden, dat de Arbeitnehmer mehr Tiet för de Foort- un Wieterbilln bruken kann. Dat Grundprinzip för jede verantwoortungsvulle Weertschopspolitik is na Ansicht vun de Partei, dat de Ökologie över de Ökonomie steiht[5].

Sellschopspolitik

[ännern | Bornkood ännern]

De Deerschuulpartei sütt sik sülvst as „Afkaat för all de, de sik sülvst keen Lobby opboen künnt“, sünners för Kranke, Behinnerte, Lüüd, de Pleeg bruukt, Oppers vun seelsche oder physische Gewalt, Obdachlose un Kinner, de in Armot leevt[1]. Se wüll dorhen, dat de praktischen Saken, de een daagdäglich maakt, för Behinnerte lichter warrt, t. B. dör Vekehrsmiddel un Bowarken, de ok för Rullstöhl egent sünd. De Partei is ok för’t Inföhren vun en Mindstrente[6].

In de Scholen schüllt de Klassen lütter warrn, butendem schall dat en nee Schoolfack „Deer- un Naturschuul“ geven un de Utbo vun Ganzdagsscholen föddert warrn[7]. Behinnerte un Kinner, de dat Lehren swor fallt, schüllt anpasst an jemehr Mööglichkeiten beter ünnerstütt un utbillt warrn. För utlännsche Kinner warrt en betere Integratschoon anstrevt, sünners dör Spraakföddern vun’t Vörschollöller an[7].

De Deerschuulpartei sett sik gegen de Wehrplicht in[8]. Se snackt sik dorför ut, dat jedeen, de ut eendüdig politische, rassistische, sexistische oder religiöse Grünnen verfolgt warrt, Asyl finnen mööt [9]. De Partei sütt ünner annern in den brutalen Ümgang mit Deerten un in de Gewaltverherrlichung in de Medien den Grund, dat in de Sellschop so lütte Hemmen gegen Gewalt to finnen is.

Struktur

[ännern | Bornkood ännern]

De Bundsvörstand

[ännern | Bornkood ännern]

De Bundsvörstand vun de Deerschuulpartei sett sik ut negenteihn Lüüd tohopen. An de Spitz staht de dree Parteivörsitter Matthias Ebner, Sandra Lück un Robert Gabel.

Bundsvörsitters

[ännern | Bornkood ännern]

Liddmaten un Organisatschonen

[ännern | Bornkood ännern]

De meisten Liddmaten vun de Partei hebbt veel mit Deerrechten to kriegen un sünd dorüm ok faken noch Liddmaten vun wietere Deerschuul- un Deerrechtsorganisatschonen. De gröttste Deel rekent sik butendem to de Vegetariers oder Veganers. De Andeel vun de Fronslüüd liggt bi de Deerschuulpartei bi över 75 %. De religiöse Grundlaag is teemlich ünnerscheedlich. Ünner de Liddmaten gifft dat Christen as ok Atheisten. Ünnerstütt warrt de Partei sünners ünner Jung- un Eerstwählers[10][11].

In de Partei gifft dat tosamen dörteihn Arbeitskreisen[12], teihn Landsverbännen[13] un een Kreisverband in Demost[14]. In Hamborg, Mekelnborg-Vörpommern, Rhienland-Palz, Sleswig-Holsteen un Brannenborg hett dat tietwies Landsverbännen geven, man jemehr Arbeit is in de Twüschentiet instellt. Dat weer vun 2001 bit 2005 ok so in Berlin. Alleen in Bremen hett dat bit hüüt noch keen Landsverband geven [15]. Jüst so weer dat ok mit de Kreisverbännen. Dorvun geev dat ok tietwies welke in annere Kreisen. Deelwies weer de Arbeit instellt vun Wegen dat Geld. En Jöögdorganisatschoon hett de Partei opstunns nich.

Tietschrift

[ännern | Bornkood ännern]

Dat Presseorgan vun de Deerschuulpartei heet Zeitenwende. Dat Blatt gifft dat siet Dezember 2000 un kummt veer mol in’t Johr in’n Sülvstverlag rut[16]. Opstunns liggt de Oplaag bi 2.000 Stück bi jede Utgaav. Dat Regeer in de Redakschoon harr bit Enn 2005 Carsten Strehlow, de aflöst worrn is vun Mari Herbold. Se harr dat Amt bit to ehrn Uttritt ut de Partei in’n Oktober 2006. Siet de Tiet deelt sik Margret Giese un Stefan Bernhard Eck disse Opgaav[17].

Utteken

[ännern | Bornkood ännern]

De Bundsvörstand hett in’n März 2003 beslaten, de so nöömte MUT-Medaille (na de Afkörten vun’n hoochdüütschen Naam) intoföhren. De warrt jeed Johr verleht. Dor schüllt Lüüd mit ehrt warrn, de „sik tomeist still mit Moot un Utduer mit groden persönlichen un finanziellen opwand för de Rechten vun de Beester insett“. De MUT-Medaille is bit hüüt verleht worrn an Manfred Karremann[18] Ute Langenkamp[19], Friedrich Mülln[20], Lisa-Maria Schütt un Schöler för Deerten[21]

Historie

[ännern | Bornkood ännern]
Resultaten op Bundseven[22] un höger[23]
Bundsdagswahl 1994 0,2 %
Bundsdagswahl 1998 0,3 %
Europawahl 1999 0,7 %
Bundsdagswahl 2002 0,3 %
Europawahl 2004 1,3 %
Bundsdagswahl 2005 0,2 %
Europawahl 2009 1,1 %
Bundsdagswahl 2009 0,5 %
Bundsdagswahl 2013 0,3 %
Europawahl 2014 1,2 %
Bundsdagswahl 2017 0,8 %
Europawahl 2019 1,4 %

Grünnen un de Johren bit 2000

[ännern | Bornkood ännern]

De Grünnen vun de Partei is an’n 13. Februar 1993 in Bonn vunstatten gahn. De hett sik den Naam Mensch, Umwelt und Tierschutz (kort: MUT) geven[16]. As eerste Bundsvörsittersche weer eenstimmig Ingeborg Bingener wählt. Al an’n 16. uli 1993 is in Hamborg de eerste Landverband grünnt worrn, de in’n September bi de Wahlen to de Börgerschop anpedd is un dor 0,3 % kreeg[16].

Dat hett nich lang duert, bit jem verboden worrn is, de Kortbeteken MUT to bruken, vun wegen dat dat al en Firma mit den glieken Naam geev. De Partei hett ehr Kortbeteken dorophen bi’n eersten Bundsparteidag in’n November 1993 in De Deerschuulpartei ännert. Bi de Bundsdagswahl 1994 hett de Partei 0,15 % kregen[24], ofschoonst man ehr blots in dree Bundslänner wählen künn.

Op den drüdden Parteidag in’n März 1995 is de Schrieversche Gisela Bulla as Bundsvörsittersche wählt worrn[16]. De eersten Bundsarbeitskreisen sünd 1996 inricht worrn. Bi de Bundsdagswahl 1998 hett de Partei 0,27 % kregen[25]. Dat geev an Tall vun Anboden vun anneer Partei, sik to Wahlbündnissen tohopentosluten. Dat is aver aflohnt worrn, vun wegen dat de Partei Sorgen harr, dat de Telen in’n Deerschuul dorünner to lieden harrn[26]. Gisela Bulla is an’n 8. September 2000 torüchpedd vun ehr Amt[16].

De Johren af 2001

[ännern | Bornkood ännern]

De Partei hett an’n 18. März 2001 bi de Kommunalwahlen in Hessen ehr eerst Mandat kregen, neemlich mit een Sitt in Landkreis Darmstadt-Dieburg. In’t sülve Johr is op’n Parteidag Jürgen Gerlach to’n ne’en Bundsvörsitter wählt worrn. 2002 weer de so nöömte „Programm-Parteidag“, op den an’n Enn en nee Parteiprogramm beslaten worrn is[16]. Na de Bundsdagswahl 2002, bi de de Partei 0,33 % kregen hett, hett dat in’n Oktober 2002 noch’n Parteidag geven, op den beslaten worrn is, dat de Partei vun Kark oder Religionsgemeenschoppen splitt warrn schüll.

In’t Johr 2004 harr de Partei ehrn opstunns gröttsten Spood mit 1,3 % bi de Europawahl un 1,6 % bi de Landdagswahl in Sassen. Bito kreeg se bi de Kommunalwahlen in Sassen-Anholt een Sitt in’n Stadtraat vun Meideborch. Bi de Bundsdagswahl 2005 kreeg de Partei 0,25 % – vun wegen de korten Tiet to’n Vörbereiden is se blots in Hessen, Noordrhien-Westfalen, Hamborg un Neddersassen anpedd wesen.

Bi de Landdagswahl in Sassen-Anholt 2006 is de Deerschuulpartei denn doch in en Wahlbündnis anpedd. Tosamen mit de ödp, de Grauen un Wählergemeenschoppen billn se dat Wahlnündnis „Gerechtigkeit, Umwelt, Tierschutz (GUT)“, dat 0,8 % vun de Stimmen kregen hett. An’n glieken Dag hett de Deerschuuulpartei bi de Kommunalwahlen in Hessen en Sitt in’n Stadtraat vun Offenbach winnen künnt. Siet April 2006 hett de Deerschuulpartei ok en Kreisdagsafordenten in’n hess’schen Lahn-Dill-Kreis, vun wegen, dat en Mandatsdräger in de Deerschuulpartei inpedd is. En half Johr later hett se ok en Sitt in’n Stadtraat vun Demost wunnen. Gerlach hett in’n Sommer 2007 Bescheed geven, dat he nich wieter för de Bundsvörsitt kandideren wull. Sien Nafolger is in’n September 2007 Stefan Bernhard Eck worrn.

Landdagswahlresultaten (in Prozent)
Johr BW BY BE BB HB HH HE MV NI NW RP SL SN SA SH DÖ
1993 0,3
1994 n.a. n.a. n.a. n.a. n.a. n.a. n.a. n.a.
1995 n.a. n.a. n.a. 0,1*
1996 0,2* n.a. n.a.
1997 0,4
1998 n.a. n.a. n.a. n.a.
1999 1,1 n.a. n.a. 0,5 n.a. n.a. n.a.
2000 0,0* n.a.
2001 0,2* n.a. n.a. 0,9
2002 n.a. n.a.
2003 n.a. n.a. 0,8 n.a.
2004 n.a. n.a. n.a. 1,6 n.a.
2005 0,1* n.a.
2006 0,2* 0,8 n.a. 0,7 0,8
2007 n.a.
2008 n.a. n.a. 0,6 0,5
2009 n.a. n.a. n.a. 2,1 n.a. n.a.
2010 0,6
2011 n.a. 1,5 n.a. n.a. n.a. n.a. 1,6
2012 0,7 n.a. n.a.
2013 n.a. n.a. n.a.
2014 n.a. 1,1 n.a.
2015 1,2 n.a.
2016 0,3* 1,9 1,2 n.a. 1,5
2017 0,7 n.a. n.a. n.a.
2018 0,3* 1,0
2019 2,6 n.a 1,5 n.a.
Legenn
best Resultat je Bundsland
n. a.: nich antreden
* blots in enkelte Wahlkreisen antreden

Borns

[ännern | Bornkood ännern]
  1. ↑ a b Präambel vun’t Grundsatzprogramm
  2. ↑ Afsnitt 1. Deerschuul- un Deerrechtspolitik 1.1 De Rechten vun de Deerten ut dat Grundsatzprogramm
  3. ↑ Andreas Schulze: Kleinparteien in Deutschland. Aufstieg und Fall nicht -etablierter politischer Vereinigungen, S. 72
  4. ↑ Afsnitt 5. Ümwelt-, Verkehrs- un Energiepolitik 5.1 Ganzheitlich Konzept ut dat Grundsatzprogramm
  5. ↑ Afsnitt 8. Weertschops- un Finanzpolitik 8.1 Soziale un ökoloogsche Marktweertschop ut dat Grundsatzprogramm
  6. ↑ Afsnitt 7. Arbeits- un Sozialpolitik 7.4 Sozialpolitik ut dat Grundsatzprogramm
  7. ↑ a b Afsnitt 6. Familien- un Bildungspolitik 6.2 Bildungspolitik allgemeen ut dat Grundsatzprogramm
  8. ↑ Afsnitt 10. Buten- un Europapolitik 10.1 Butenpolitik allgemeen ut dat Grundsatzprogramm
  9. ↑ Afsnitt 9. Binnen- un Rechtspolitik 9.2 Asylpolitik ut dat Grundsatzprogramm
  10. ↑ Oberhessische Presse: 20 000 Schüler wählen Landtag: SPD gewinnt, NPD und Linke dabei, 28.1.2008
  11. ↑ Taz: Jugendliche lieben Tierschutzpartei, 12.9.2006
  12. ↑ tierschutzpartei.de Afsnitt Arbeitskreise
  13. ↑ tierschutzpartei.de Afsnitt Partei Landesverbände
  14. ↑ tierschutzpartei.de Afsnitt Partei Orts-/Kreisverbände
  15. ↑ 10 Johr Partei Minsch Ümwelt Deerschuul – De Deerschuulpartei En korte Tosamenfaten vun ehr Entwickeln siet de Grünnen 1993
  16. ↑ a b c d e f Chronik vun de Deerschuulpartei
  17. ↑ zeitenwende-online.de
  18. ↑ vegan.de
  19. ↑ tierhilfe-hoffnung.de
  20. ↑ tierschutzpartei.de Afsnitt Aktuelle Infos - Die MUT-Medaille/
  21. ↑ Verlehen vun de Mensch Umwelt Tierschutz-Medaille an „Schöler för Deerten“ in Frankfort an’n Main, openpr.de
  22. ↑ Resultaten vun de Bundsdagswahlen
  23. ↑ Resultaten vun de Europawahlen
  24. ↑ bundeswahlleiter.de
  25. ↑ bundeswahlleiter.de
  26. ↑ EVU-News, Utgaav 2/1998

Weblenken

[ännern | Bornkood ännern]
Vun „https://nds.wikipedia.org/w/index.php?title=De_Deerschuulpartei&oldid=1016990“