Michaeliskapell (Kronenborg)

Vun Wikipedia
Zur Navigation springen Zur Suche springen

De Michaeliskapell is en Kapell in dat Dörp Kronenborg binnen dat evangeelsch-luthersche Kaspel Olendörp (Karkenkreis Stood). Ehren Naam hett se von’n Arzengel Michael.

Historie[ännern | Bornkood ännern]

De eerste Kapell in Kronenborg hett dat wohrschienlich üm un bi 1380 geven. De hett bi de ole Borg Kronenborg dicht bi de Oost stahn. Dor hett fröher ok dat Dörp Kronenborg legen. Dor stünn aver faken dat Water von de Oost in de Hüüs un in dat 19. Johrhunnert is dat Dörp denn bilütten mehr un mehr op de Geest tagen. Ok en ne’e Kapell is dor denn op’n Brink boot un an’n 23. Oktober 1811 inwieht worrn. Dat weer toeerst en Fackwarkkapell, de denn later massiv in Backsteen ümboot worrn is. De Kapell is 13,02 m lang un 7,60 m breed. De Toorn mit twee Klocken sitt as veer Meter hogen Dackrieder an’n Westgevel. De gröttere Klock is ut dat Johr 1831. De Klock is bi de Klockengeters Kovatsay & Ehlermann in Rodenborg ut de 1827 tweigahn Klock nee gaten worrn. Düsse Klock weer von 1461 un is von Segebade Marschalck von Bachtenbrock stift worrn. De twete Klock is in’n Tweten Weltkrieg insmult worrn (Klockenkarkhoff). Dor is 1957 en ne’e för kamen, de von de Firma Otto weer. Dor steiht op Latiensch op: HAEC CAMPANA FACTA EST CHRISTI 1957 (Düsse Klock is 1957 herstellt worrn).

An de Oostwand von de Kapell hängt en Stifttafel, de Gotthard von Brobargen 1598 för de Kapell op’n Höben in Brobargen hett maken laten. Düsse Kapell is in’n Dörtigjohrigen Krieg toschannen gahn. De Klingbüdel is von 1714, stift von Claus Mahler, un de Kelk un Pateen sünd von 1886. De Hostiendoos stammt ut dat Johr 1705.

Bet 1926 harr de Kapell to dat Kaspel Heckthusen tohöört. Dat weer aver en wieden Weg na Goddsdeenst na Heckthusen un as 1924 de Fähr twüschen Kronenborg un Klint dichtmaken wull, dor wullen de Kronenbörger geern, dat se in Tokumst to dat Kaspel Olendörp tohören schullen. Un so sünd de Kronenbörger 1926 denn na dat Kaspel Olendörp wesselt un billt dor nu sietdem en Kapellengemeen mit egen Kapellenvörstand.


Koordinaten:53° 36′ N, 9° 12′ O