Michael Edward Fossum

Vun Wikipedia
Zur Navigation springen Zur Suche springen

Michael Edward Fossum (* 19. Dezember 1957 in Sioux Falls, South Dakota) is en ehmalger US-amerikaansch Astronaut.

Militär un Studium[ännern | Bornkood ännern]

Fossum wurr in South Dakota boren, is aber in McAllen (Texas) upwussen, wo he bit 1976 de High School besöcht hett. Dat Maschinenbaustudium an de Texas A&M University in College Station hett he in’n Mai 1980 as Bachelor afslooten. Ansluuted is he in de US-Luftwaffe intreeden un hett an dat Air Force Institute of Technology studeert, dat hüm den Titel Master in dat Fack Systemtechnik verleehn dee.

Af 1981 hett he, immer noch in‘n aktiven Militärdeenst, bi de NASA arbeit, wo he in dat Lyndon B. Johnson Space Center in Houston an de Dörführen vun Space-Shuttle-Flüüg mitwarken dee.

De Utbillen to’n Testpiloten hett he 1985 an de Edwards Air Force Base afslooten, wo he dornah ok an de Wiederentwicklung vun de F-16 bedeeligt weer.

Af 1993 weer Fossum in de Luftwaffen-Reserve un wurr ziviler Angestellter vun de NASA, wo he an verscheeden Projekten rund um de Internatschonale Ruumstatschoon (ISS) arbeiten dee. Ünner annern hett he de Mögelkeit ünnersöcht, dat russische Sojus-Ruumschipp as Rettungsboot för de ISS intosetten. Ok bi de Tests vun den X-38-Prototyp, en alternativ Rückkehrmögelkeit, weer Fossum bedeeligt. 1997 hett he en Physik-Studium an de University of Houston-Clear Lake afslooten.

Astronautentätigkeit[ännern | Bornkood ännern]

Siet 1987 harr sück Fossum veermal ahn Spood as NASA-Astronaut bewurben. Sien fievte Versöök weer sluutend spoodriek, un so wurr he an’n 4. Juni 1998 in de 17. Astronautengrupp vun de NASA Upnommen.

Wiels de ISS-Expeditschoon 6 van November 2002 bit Mai 2003 weer he leitend Verbinnensspreker (CapCom). Parallel dorto hett he de Utbillen för Butenbordinsätze (EVA) maakt.

STS-121[ännern | Bornkood ännern]

In‘n Dezember 2003 wurr Fossum as Besattensliddmaat för de Mission STS-121 nomineert. De Mission wurr mehrmals verschaven un sluutend in’n Juli 2006 dörführt. Kommandant vun dit Ünnernehmen weer Steven Wayne Lindsay un Pilot Mark Edward Kelly. De Missionsspezialisten weern neben Fossum noch Piers John Sellers, Lisa Marie Nowak un Stephany Diana Wilson. Bi den Start weer ok noch de düütsch Astronaut Thomas Reiter an Bord, de nah de Mission up de ISS blieben dee. Hööftupgaven weern eenmal nahtowiesen, dat de nah STS-107 un STS-114 angahn Verbetern an dat Space Shuttle ok funktschoneeren deen un to’n annern, de Internatschonale Ruumstatschoon mit Göder to versörgen, as ok deren tweeköppig Besatten dör en Astronauten (Reiter) to verstärken. Dormit weern siet de ISS-Expeditschoon 6 weer dree Ruumfohrer up de Statschoon. Wiels den twee Week lang düern Floog hemm Fossum un sien Kolleeg Sellers dree EVAs ünnernommen. Dorbi hemm se Reparaturen an de Ruumstatschoion dörführt, Dorbi wurrn Reparaturen an de Ruumstatschoon dörführt, en System ut twee Roboterarms up deren strukturelle Integrität test un en neeaardig Spachtelmasse utprobeert, of de in' Weltruum wat dörgen dee.

STS-124[ännern | Bornkood ännern]

Af März 2007 hett sück Fossum up disse Mission vörbereit. De Start vun STS-124 weer an’ 31. Mai 2008. Kommandant bi disse Mission weer Mark Kelly un de Pilot Kenneth Todd Ham. Dorto keemen de Missionsspezialisten Karen Nyberg, Ronald Garan un de Japaner Akihiko Hoshide, as ok up den Henfloog to de ISS Gregory Chamitoff, wiels up den Rückfloog Garrett Reisman vun de ISS weer mit torüchnommen wurr.

Bi disse Mission wurr en wieder Deel vun dat japaansch Kibō-Modul (Japanese Experiment Module – Pressurized Module; JEM-PM) un de japaansch Roboterarm (JEM-RMS) to de ISS brocht. Buterdem wurr dat mit STS-123 leefert ELM-PS-Modul an sien endgültige Positschoon versett. Wiels dree EVAs hett Fossum wiedere 20 Stünn un 33 Minüüt Erfohrung bi Butenbordinsatzen sammelt.

ISS-Expeditschonen 28/29[ännern | Bornkood ännern]

In‘n Oktober 2009 wurr Fossum för en Langtietupenholt an vun de ISS nomineert. He hett af Juni 2011 as Bordingenieur vun de ISS-Expeditschoon 28 arbeit. Henflagen to de ISS is he mit de Mission Sojus TMA-02M mit den Sojus-Kommandanten Sergei Alexandrowitsch Wolkow un den Japaner Satoshi Furukawa. An Bord weern dor all Andrei Iwanowitsch Borissenko, Alexander Michailowitsch Samokutajew un Ronald John Garan. As Borissenko Samukutajew un Garan weer aflöst wurrn, bill Fossum gemeensam mit Wolokow un Furukawa un de nee dortokommen Ruumfohrer Anton Nikolajewitsch Schkaplerow, Anatoli Alexejewitsch Iwanischin un Daniel Christopher Burbank de ISS-Expeditschoon 29. An‘ 22. November 2011 weer Fossum weer torüch up de Eer.

Fossum hett de NASA an‘n 7. Januar 2017 verlaaten.[1]

Privates[ännern | Bornkood ännern]

Fossum is verheiraadt un hett veer Kinner.

Weblinks[ännern | Bornkood ännern]

Commons-logo.svg Michael E. Fossum. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. NASA: [1] Veteran Astronauts Retire from NASA van’n 9. Januar 2017, afropen an’n 12. April 2019 (engelsch)]