Max Rötger (1860–1923)

Vun Wikipedia
Zur Navigation springen Zur Suche springen

Max Rötger (* 27. August 1860 in Wittenbarg; † 7. April 1923 in Berlin-Grunewald) weer en düütschen Verwaltungsbeamten.

Rötger is 1860 in Wittenbarg boren. Na dat Abitur an dat Wilhelms-Gymnasium hett he an de Universität Berlin Juristeree studeert. He is dor Maat von de Landsmannschaft Guilelmia ween. Na de Staatsprüfung un den Vörbereitungsdeenst is he 1892 Landraad von’n Kreis Labiau worrn. Von dor is he 1899 as Landraad in’n Landkreis Essen versett worrn un dat bet 1901 bleven. Na disse Tied is he in dat Direktorium von de Firma Krupp instegen. Von 1902 bet 1909 weer he as Nafolger von Hanns Jencke Vörsitter von dat Direktorium. Von wegen Differenzen mit Gustav Krupp von Bohlen und Halbach hett he de Firma verlaten. Sien Nafolger weer Alfred Hugenberg.

Rötger weer ok Vörsitter von de Hannelskamer Essen un de vereenigte Hannelskamer von’n nedderrhienschen Industrieverband. Von 1909 bet 1919 weer he Vörsitter von’n Zentralverband von de düütschen Industriellen. Tosätzlich weer he för en Tied Maat in dat Präsidium von’n Hansabund. Dor hett he 1911 en Kries utlööst, as he sik mit de Vertreders von de Swoorindustrie ut’n Bund trüggtagen hett. In’n Eersten Weltkrieg weer he Direkter in’n Kriegsutschuss von de düütsche Industrie.