Matthäus-Kark (Stellsfellen)
De Matthäus-Kark is en Kark von de Sülvstännige Evangeelsch-luthersche Kark (SELK) in dat Dörp Stellsfellen (Gemeen Otterbarg). De Karkengemeen hett üm un bi 60 Maten. Ehren Naam hett se von’n Apostel Matthäus.
Historie[ännern | Bornkood ännern]
As 1945 de Düütschen ut de Oostrebeden un Polen verdreven worrn sünd, kemen ok Anhängers von de Evangeelsch-Luthersche Freekark in Polen in’n Landkreis Veern. De Freekark hett sik denn 1946 ümdöfft op Evangeelsch-Luthersche Flüchtlingsmissions-Kark un 1951 op Evangeelsch-Luthersche Bekenntniskark in de Diaspora. Disse Kark hett ünner annern ok all veer bet söss Weken en Goddsdeenst in de Lukas-Kark in Postdörp (höört to de Hannöversche Landskark) afhollen. Tostännig weer de Pastoor Leopold Zielke ut Ossenbrügge.
An’n 25. Juli 1948 hett sik denn in Postdörp en Karkengemeen billt, de to Anfang 380 Maten harr. 1949 wullen de Christen von de Landskark denn nich mehr, dat de Freechristen de Kark in Posthusen mit bruukt. Dorüm hett de Karkengemeen denn en poor Johr lang Goddsdeensten op’n Saal von dat Gasthuus Cordes in Postdörp afhollen. 1952 hett de Karkengemeen en Grundstück in Stellsfellen köfft un dor in’n Oktober 1954 anfungen de Matthäus-Kark to boon. De Grundsteen is an’n 17. Oktober leggt worrn un inwiehen kunnen se de Kark denn an’n 26. Juni 1955. Aver al in disse Tied weer de Tall von Maten op 181 dalgahn.
Al an’n 12. Oktober 1958 is de Grundsteen för en Anbo leggt worrn, de in’n Harvst 1959 trech weer. En tweten Anbo is in’n Sommer 1995 kamen. In de Tied von November 2000 bet Sommer 2001 is en ne’en Gemeensaal boot worrn.
De eerste Klock hett de Kark 1975 kregen. 1976 hett sik de Evangeelsch-Luthersche Bekenntniskark in de Diaspora de SELK anslaten.
Pastoorn[ännern | Bornkood ännern]
- November 1946–Februar 1954: Leopold Zielke
- Juni 1954–September 1960: Alfred Drung (bet 1956 blots Vikar)
- Februar 1961–Juli 1966: Karl Wengenroth
- März 1967–Oktober 1967: Siegfried Schwertner (as Vikar)
- März 1968–Juli 1975: Reinhold Buchholz
- Oktober 1975–September 1986: Adolpho Schimidt
- Dezember 1986–August 1998 : Christoph Schulze
- August 1998–August 2006: Manfred Griesheimer
- November 2006–2010: Christian Neddens
Weblenken[ännern | Bornkood ännern]
- Websteed von de Karkengemeen (hoochdüütsch)
Koordinaten:53° 3′ N, 9° 11′ O