Martin Ponsiluoma

Ponsiluoma 2023 in Oberhof

Martin Ponsiluoma (* 8. September 1995 in Östersund) is en sweedsch Biathlet. Siet 2017 trett Ponsiluoma in‘n Weltcup an, wo he 2018 mit de Staffel sien eerste Siege fiern kunn. 2021 hett he sien eersten Weltmeestertitel (in’n Sprint) haalt un wunn ok noch twee Staffelmedaillen, 2022 hett he de olympisch Sülvermedaille in’n Massenstart wunnen.

Karriere

Anfänge un eerste Weltcupinsätze (bit 2018)

Martin Ponsiluoma fung in dat Öllern vun 10 Johren an mit Biathlon in den Vereen Tullus SG, de in dat Skistadion vun Östersund traineert. Van 2013 bit 2016 hett he an mehreren Grootereignissen in den Nahwussberiek deelnommen: dat Europääsch Olympisch Winter-Jöögdfestival 2013 as ok dree upnannerfolgend Jöögd- un Juniorenweltmeesterschapen (2014-2016). Dorbi reck he in dat Johr 2014 sien best Eenzelergevnis mit Platz 8 in dat Sprintrennen. He nehm denn ok an Rennen in’n IBU-Cup deel, ahn aber den ganz grooten Spood to hemm. 2017 kreeg he in Oberhof en eersten Weltcupinsatz – de Grootdeel vun de eerst Mannschap leet de Rennen för en betere WM-Vörbereiten ut – un wurr 86. in’n Sprint.

Af den Winter 2017/18 tell Ponsiluoma to de A-Mannschap, kreeg aber tonächst blots af un to Weltcupinsätze. In Oberhof leep he in’n Januar 2018 eerstmals in en sweedsch Weltcupstaffel un wunn as Startlöper mit Jesper Nelin, Sebastian Samuelsson un Fredrik Lindström dat vun dicht Nevel präägt Rennen. In dat olympisch Staffelrennen, in dat Sweden de Goldmedaille wunn, leep Peppe Femling statt Ponsiluoma up de eerste Positschoon; ok Ponsiluoma keem in Pyeongchang to’n Insatz in dat Eenzelrennen un keem dor up Platz 38. Later in de Saisonhett he bi den Sprint in Kontiolahti as 37. eerste Weltcuppunkte haalt, wat denn to Platz 96 in den Gesamtweltcup recken dee.

Upstieg in de Weltspitze (siet 2018)

Ponsiluoma hett sien Ergevnisse af 2018 düütlich verbetert: 2018/19 un 2019/20 reck he – as 38. bzw. 33. vun de Gesamtweltcupwertungen – tosommen mit Sebastian Samuelsson un Jesper Nelin de best Resultate in dat sweedsch Mannlüüd-Team. In mehreren Wettbewarfen keem he ünner de best 20 un stunn in’n Dezember 2018 bi den Sprint vun Nové Město nah en fehlerfree Scheeten as Dart (achter Johannes Thingnes Bø un Alexander Loginow) eerstmals up dat Podium bi en Weltcup-Eenzelrennen. Mit de Staffel reck he in de glieker Maand in Hochfilzen to’n tweeten Mal in’n Weltcup. Tosommen mit Emma Nilsson, Mona Brorsson un Sebastian Samuelsson wunn he in de Mixed-Staffel de Goldmedaille bi de Europameesterschapen 2019.

In‘n Winter 2020/21 tell Ponsiluoma to de flinksten Athleten in‘n Weltcup: Sien Looptieden weern över de Saison sehn veer Perzent ünner den Snitt vun dat Feld. All in’n Dezember 2020 reck he neben den darten Staffel-Weltcupsieg twee Podestresultate in Eenzelrennen, dorünner en tweeten Rang bi den Massenstart in Hochfilzen mit 1,3 Sekunnen Rückstand up den Sieger Arnd Peiffer. Bi den Biathlon-Weltmeesterschapen 2021 up de Pokljuka bleev he an’n 12. Februar in dat Sprintrennen ahn Scheetfehler un leep mit goot elf Sekunden Vörsprung up Simon Desthieux to de Goldmedaille. Ponsiluoma sien eerst WM-Spood weer to glieker Tiet ok sien eerst Weltcupsieg un de eerste Weltmeestertitel för en sweedsch Biathleten in en Eenzelrennen siet den Sieg vun Adolf Wiklung bi de erst WM 1958. Todem hett he up de Pokljuka mit de sweedsch Staffel vun de Mannlüüd de Sülvermedaille achter dat norweegsch Quartett un mit de Mixed-Staffel Bronze haalt. An dat Enn'n vun de Saison harr he den teihnten Platz in den Gesamtweltcup reckt.

2021/22 leep dat för Ponsiluoma nich so goot, as de Saison tovör, wat nah sien Sicht ok doran leeg, dat sien Scheeten nich mehr goot weer. In’n Weltcup keem he blots up Rang 22 in de Gesamtwertung, sien Teamkolleeg Sebastian Samuelsson reck den 3. Platz. In eenig Rennen keem he aber doch noch up dat Podium, dorünner in den Massenstart bi de Olympisch Winterspelen 2022/Biathlon in Peking, wo he mit twee Scheetfehlern de best Quote van all Deelnehmer harr (neben Simon Eder) un mit 40 Sekunnen Rückstand up Johannes Thingnes Bø de Sülvermedaille noch vör Vetle Sjåstad Christiansen, Quentin Fillon Maillet, Dominick Windisch un annern wunn. Bi de Sömmerbiathlon-Weltmeesterschapen 2022 wurr he Dart in’n Gala Massenstart achter Sebastian Samuelsson un Roman Rees.

De Folgesaison broch hüm gliek in dat eerste Rennen, dat Eenzel vun Kontiolahti, sien nächsten Weltcupsieg (vör Niklas Hartweg ut de Swiez un de beid Düütschen David Zobel un Roman Rees). Wiedere Podestplatzeeren reck he in Antholz, Nové Město un Oslo un belegg an dat Enn vun de Saison in den Gesamtweltcup den 5. Rang, womit he de beste sweedsch Athlet weer. Dorto keemen noch jewiels dart Plätze in’n Eenzelweltcup un Sprintweltcup. Bi de Biathlon-Weltmeesterschapen 2023 wunn he de Sülvermedaille in’n Massenstart achter Sebastian Samuelsson aber vör Johannes Thingnes Bø un Sturla Holm Lægreid un mit de sweedsch Staffel noch de Bronzemedaille.

Persönliches

Martin Ponsiluoma ssien Vader Jyrki weer bi de Olympisch Winterspene 1992 as Skilanglöper dorbi un hett bi den Heimatvereen vun sien Söhn, Tullus SG, de Positschoon vun den sportlichen Leiter övernommen. Martin Ponsiluoma hett ok an Skilangloo-Wettkämpen deelnommen, hett sück aber denn doch för Biathlon entscheedt, wiel he dat spannender un weniger vörhersehbar as Skilangloop ansehn dee.

Weblinks

Martin Ponsiluoma. Mehr Biller, Videos oder Audiodateien to’t Thema gifft dat bi Wikimedia Commons.

• Martin Ponsiluoma in de Datenbank vun de IBU
• Statistische Auswertung up realbiathlon.com (engelsch)
• FIS-Indrag