Ludwig Kleine

Vun Wikipedia
Zur Navigation springen Zur Suche springen

Carl Ludwig Kleine (* 27. Juni 1866 in Kleve; † 24. Mai 1938 in Leer) weer en düütschen Verwaltungsbeamten un Politiker.

Kleine is 1866 as Söhn von Adolph Kleine (1835-1917) in Kleve boren. He hett 1884 an dat Gymnasium Wesel Abitur maakt un an de Universitäten in Jena, Bonn un Berlin Juristeree studeert.[1][2] De eerste juristische Prüfung hett he in’n Juni 1887 bi dat Oberlandsgericht Köln bestahn.[2] Von Oktober 1887 bet Oktober 1888 weer he bi’n Kommiss.[2] In’n Februar 1891 is he in’n prüüßschen Staatsdeenst gahn un Regerungsreferendar bi de Regerung in Arensperg worrn.[2] De Grote Staatsprüfung hett he an’n 9. Dezember 1893 bestahn un weer denn Regerungsassesser bi de Regerung in Posen (1894 bet 1899) un de Regerung in Auerk (1899 bet 1900).[2] He weer von 1901 bet 1907 Landraad von’n Kreis Soltau un is in’n März 1907 Regerungsraad bi dat Oberpräsidium von de Provinz Hannover worrn.[2]

Von 1910 bet 1930 weer he as Nafolger von Ferdinand Freiherr Schenck zu Schweinsberg Landraad von’n Kreis Leer.[2] He hett in’n Januar 1916 den Rang von en Gehemen Regerungsraad kregen.[2] In’n Winter 1916/1917 hett he in’n Eersten Weltkrieg kommissarsch de Steed von en Oberregerungsraad bi de Regerung in Auerk hatt un weer dor Viez von’n Regerungspräsident.[2] He müss sien Amt as Landraad in’n März 1930 (een Johr bevör he dat Öller harr, in Rohstand to gahn) afgeven, nadem he in’n Provinziallanddag Hannover för en Andrag von de NSDAP stimmt harr, de dat Verbaad von de Hitlerjugend beennen schull.[2] Sien Nafolger weer Hermann Conring. He is to’n 1. Oktober 1931 in Rohstand versett worrn.[3]

In siene Amtstied bi dat Oberpräsidium (1907 bet 1910) weer Kleine ernannt Liddmaat von’n Provinzialraad.[2] 1912 is he för den Wahlkreis Auerk 3 (Leer-Weener) Liddmaat von dat Prüüßsche Aforntenhuus worrn un dor bet to’n 15. November 1918 Afornten bleven.[2] Afornten in’n Provinziallanddag Hannover weer he von 1910 bet 1933.[2] An’n 23. Januar 1930 is he to’n Vörsitter von’n Provinzialutschuss wählt worrn.[2] Von 1927 bet 1929 weer Kleine Maat von’n Prüüßschen Staatsraad un von 1928 bet 1930 Vörsitter von’n Hannöverschen Landkreisdag.[2]

In siene Tied as Ladraad in Leer is in’n Harvst 1911 de Kleenbahn Ihrhove-Westrhauderfehn grünnt worrn. Kleine weer von 1911 bet 1930 Geschäftsföhrer von de Kleenbahn.[2] Ok dat Kreiskrankenhuus Leer is 1928 in siene Tied grünnt worrn.[2]

Von 1901 af an weer he Präsident von’n Land- un Forstweertschoplichen Provinzialvereen för dat Förstendom Lümborg.[4]

Footnoten[ännern | Bornkood ännern]

  1. http://www.historische-vereinigung-wesel.de/images/stories/Mitteilungen/124.pdf
  2. a b c d e f g h i j k l m n o p q Carl Ludwig KLEINE bi de Oostfreesch Landschap
  3. http://www.territorial.de/hannover/leer/landkrs.htm
  4. Festschrift zur Feier des 75jährigen Bestehens zu Ebstorf, am 26. Mai 1905. L. Mundschenk, 1905, Sied 105