Linndook

Vun Wikipedia
Zur Navigation springen Zur Suche springen
Linndook up Spannrahmen
Linndook, anmaalt mit Acrylfarv

En Linndook oder Liendook, ok Linnwand, Lienwand oder hoochdüütsch Leinwand, is en Geweev ut Linnen, dat up en Spannrahmen oder en fasten Rahmen spannt is. Blangen Linnen weert for dat Herstellen vun Linndöker ok annere natüürliche Materialien, as Jute oder Kattuun bruukt. Dat gifft avers ok Linndöker ut Halflinnen. Dor hannelt sik dat um en Mix vun Linnen un Kattuun bi. Hüdigendags weert Linndöker ok ut Kunstfesens herstellt. Bi allerhand Techniken in de Maleree warrt Linndook as Unnerlage bruukt, as u.a. bi de Öölmaleree un bi de Maleree mit Acrylfarv.

Allgemeen[ännern | Bornkood ännern]

Gegen annere Bildunnergrünn, as Holt, Metall un Wänn over, köst de Linndöker nich veel, weegt wenig un könnt fix tohopenrullt un allerwegens henbrocht weern. Up de annere Sieten sünd se nich so stebig un de Malschicht kann licht mol breken.

Stoffe[ännern | Bornkood ännern]

For de Maleree könnt allerhand Geweeve bruukt weern ut natüürliche un ut syntheetsche Fesens. De Struktur vun dat Geweev speelt en bannige Rull for dat Bild. In verschedene Tieden vun de Kunstgeschicht sünd mol de un mol de Stoffe an'n meisten bruukt wurrn. In de ollere Kunst sünd sunnerlich Stoffe ut Hempfesens bruukt wurrn. De weern bannig stebig. Knutten, de dat in handweevte Stoffe allerwegens gifft, sünd mit'n Hamer platt neiht wurrn. Wenn se en poormol tohopenliemt wurrn sünd, wurrn se twuschenin jummers mol wedder afslepen, vunwegen datt se an de Bovensiete so glatt ween schollen, as dat man gung. In de Industrietied keem dat up, un Stoffe sünd vun Maschinen weevt wurrn. In düsse Tied hefft de Künstlers veel Kattuun bruukt. In de moderne Maleree gung dat wedder retour na de handweevten Hempstoffe hen. Dor is de Struktur vun de Linndöker mit Afsicht wedder insett wurrn as Deel vun de Maleree. Hüdigendags bestaht Linndöker meist ut Kattuun oder Linnen. Kattuun is nich so düer un hollt nich so veel ut. Linnen köst mehr, passt sik beter an un hollt mehr ut. Vundeswegen weert grote Biller meist up Linnen maalt.[1]

Belege[ännern | Bornkood ännern]

  1. What is canvas?

Weblenken[ännern | Bornkood ännern]

Commons-logo.svg Linndook. Mehr Biller, Videos oder Audiodateien to’t Thema gifft dat bi Wikimedia Commons.