Leo Sternbach

Vun Wikipedia

Leo Henryk Sternbach (* 7. Mai 1908 in Abbazia (do Österriek; vundaag Kroatien); † 28. September 2005 in Chapel Hill, North Carolina) weer en US-amerikaansch Chemiker un Pharmazeut. He weer vör allen as Utfinner vun dat Medikament Valium bekannt.

Leven[ännern | Bornkood ännern]

De Söhn vun en jüüdsch-poolschen Aftheker un en jüüdsch-ungaarsche Moder studeer an de Jagiellonen-Universität in Krakau toeerst Pharmazie, denn Chemie, worin he 1931 promoveer. In't Johr 1937 toog he in de Swiez üm, wo he Assistent vun Leopold Ruzicka an de ETH Zürich weer un 1940 to't Pharmaünnernehmen Hoffmann-La Roche na Basel wesseln dei.

1941 emigreer he in de USA, wo he wieder för Hoffmann-La Roche arbeid. Sternbach entwickel mehr as 240 Medikamenten, vun de de bekanntsten Librium (1960) un Valium (1963) ut de Stoffklass vun de Benzodiazepinen sünd. Een vun fief Patenten vun de Firma keem vun Sternbach.

In't Johr 1973 güng Sternbach in Rent, arbeid aver wieder bet en poor Johr vör sien Dood in sien Labor in Nutley.