Kummedie

Ene Kum(m)edie, ok Kamedie, Kemedie, Komeedje oder Komellje, is en Drama mit meist blöden oder lustigen Afloop, dat för den Helden meist glücklich utgeiht. Se stellt op vergnöögliche Wies minscheliche Swackheiden dor kann so nich bloots amüseren, man ok kritische Afsichten hebben.

De Tokiekers föhlt sik to de Figuren op de Bühn hentrocken, üm dat se sik in ehr wedderkennen, oder se kiekt op se daal un lacht över ehr, üm dat se Fehler oder Swackheiten hebbt, de vermieden warrn schöölt, oder ümdat se ut en neddere Schicht vun de Sellschop stammt. Wenn dat stark twischen Mitgeföhl un Utlachen swankt, snackt man ok vun en Tragikomödie.

Dat Kennteken vun dat Bliede wurr lange Tied in’n Vörgrund stellt, üm to verdecken, dat de Komödie na Aristoteles de „slechteren Minschen“ op de Bühn bringen schull. Siet de Neetied sünd dor meist nich-adlige, börgerliche Figuren mit meent. Martin Opitz schreev dorto: „Die Comedie bestehet in schlechtem wesen vnnd personen“, dat heet, se wiest „Knechte“ statt „Potentaten“ (Von der Deutschen Poeterey, 1624).

Mit de börgerliche Emanzipation kemen siet dat 18. Johrhunnert ok Formen vun de Komödie, de meist gor nich mehr bliede sünd, man doch börgerliche Figuren in’n Middelpunkt stellt.