Karl Weber (NSDAP)

Vun Wikipedia
Zur Navigation springen Zur Suche springen

Karl Weber (* 8. März 1885 in Lehnin; † 15. April 1945 in Veern) weer en düütschen Jurist un Politiker von de NSDAP.

Weber is 1885 in Lehnin boren. He weer siet 1904 aktiven Instandsetzungsoffzeer un weer Soldaat in’n Eersten Weltkrieg. Toletzt as Hauptmann. In’n Krieg is he mit dat Ieserne Krüüz II. Klass uttekent worrn. 1918 is he kriegsdeenstbeschädigt ut de Armee entlaten worrn. He weer denn informatorisch bi’n Magistraat von de Stadt Bad Orb. Later weer Weber Kurdirekter un Gemeenvörsteher von dat Noordseebad Wittdün op Amrum. Von 1925 bet 1930 hett he Juristeree an de Universitäten Kiel, München un Hamborg studeert un sien Dr. jur. maakt.

In de Tied von de Weimarer Republik weer Weber in de Düütschvölkische Freeheitspartei. In’n November 1926 is he Liddmaat von de NSDAP worrn un weer siet 1931 Kreisbaas von de Partei för Lümborg-Land. Von 1932 bet 1933 (veerte un föffte Wahlperiood) weer he Liddmaat von’n Prüüßschen Landdag. 1933 bet 1945 weer he Landraad von’n Landkreis Veern. 1939 bet 1943 hett he ok kommissarsch dat Leid över den Landkreis Rodenborg övernahmen.

An’t Enn von’n Tweten Weltkrieg an’n 15. April 1945, twee Daag, bevör de Briten in Veern ankamen sünd, hett Weber siene Fro un sik sülvs mit en Jagdgewehr doodschaten.[1]

Footnoten[ännern | Bornkood ännern]

  1. Dokterarbeid Joachim Woock (PDF; 5,1 MB) Universität Hannover, 2004