Kalterherberg

Vun Wikipedia
Zur Navigation springen Zur Suche springen

Kalterherberg (Up Platt: Kole Harbarg) is en süüdwestlichen Stadtdeel vun Monschau in den Kreis Aken nich wiet af vun de Grenz na Belgien. An’t Enn vun dat Johr 2004 leven dor 2.537 Inwahners. Bit 1972 weer Kalterherberg sülvstännig, denn keem dat nah Monschau. Midderwielen is dat de gröttste Stadtdeel vun düsse Stadt.

De Naam seggt allerhand över den Oort. He liggt direktemang an dat Hoge Venn un kriggt as Eersten dat kole un slechte Weer af. Gegen den Wind hefft de Lüde dor huushooch Bökenhecken plant, just so as annerwegens in dat Monschauer Heckenland ok.

In en Urkunn ut dat Johr 1391 is dat eerste Mol de Naam „Kalde Herberge“ to lesen. In dat Johr 1550 geev dat al en Kapell, de ünner den Schutz vun den Hilligen Lambertus stünn. Hüdigendags fallt de grode Kark mit twee Toorns in den Oort up. De Ökelnaam vun düsse Kark is de „Eifeldom“. 1898 güng dat mit den Boo los un 1901 (1904?) is de denn fardig ween. Dormols hett de Kark 112.600 Rieksmark köst.