Zum Inhalt springen

Johannes Kühn (Biathlet)

Vun Wikipedia
Upnahm van 2020
Upnahm van 2020

Johannes Kühn (* 19. November 1991 in Passau) is en düütsch Biathlet. Nah mehreren Weltmeestertiteln in’n Juniorenberiek geev he 2012 sien Debüt in’n Weltcup. Af 2017 hett he sück in dat düütsch Weltcupteam fastsett un fier in’n Dezember 2021 sien eersten Sieg dor. Kühn hett an de Olympisch Winterspelen 2018/Biathlon in Pyeongchang un 2022 in Peking deelnommen.

Anfänge un Spood in’n Juniorenberiek (bit 2011)

[ännern | Bornkood ännern]

Kühn stammt ut Tüßling in Böverbayern. Över sien Öllern keem he as Kind tonächst to’n Skilangloop un fung in dat Öller vun 12 Johren dorto mit Biathlon an, nahdem he en Schnuppertraining bi Fritz Fischer besöcht harr. He hett sück den WSV Reit im Winkl anslooten un fung wiels sien Schooltiet mit regelmatig Biathlontraining an‘n Stüttpunkt Ruhpolding an.[1]

2010 legg he an dat König-Karlmann-Gymnasium Altötting dat Abitur af[2] un is ansluutend eerst de Sportfördergrupp vun de Bundswehr in Bischofswiesen bitreeden, bevör he 2011 to dat Toll Ski Team vun de Bundstollverwaltung wesseln dee.[3] 2020 harr he dor den Deenstgraad Erster Zollhauptwachmeister.[4]

Tüschen 2006 un 2009 wunn Kühn dreemal in Reeg de Gesamtwertung vun den Düütschlandpokal in sien Öllersklass[5]Sien internatschonal Debüt geev he bi dat Europääsch Olympisch Winter-Jugendfestival 2009]] in Slesien, wo he den Titel mit de Mixed-Staffel wunn[3] un Veert in’n Sprint un in de ansluutend Verfolgung Söbent wurr. Mit grooten Spood is he bi de Jöögd- un Juniorenweltmeesterschapen 2010 in Torsby start, wo he in’n Sprint (in de Öllersklass Jöögd) un mit Tom Barth, Benedikt Doll un Manuel Müller in dat Staffelrennen (in de Öllersklass Junioren) de Titel wunn. In dat Jöögd-Verfolgungsrennen muss he sück blots Alexander Petschonkin slahn geven, in’t Eenzel keem he up den 6. Platz. Een Johr later kunn he disse Erfolge bi de Juniorenweltmeesterschapen 2011 in Nové Město na Moravě wedderhalen. In dat Sprintrennen verpass he achter Tom Barth noch den Sieg, wunn dornah dat Verfolgungsrennen un mit Steffen Bartscher, Benedikt Doll un Tom Barth weer den Titel in‘n Staffelwettbewarf.[5]

Sporadische Weltcupupträen un twee Schullerbröök (2011 bit 2017)

[ännern | Bornkood ännern]

Af dat Fröhjohr 2011 traineer Kühn in de tweethööchst Lehrgangsgrupp 1b vun den Düütschen Skiverband.[6]To’n Uptakt vun de Saison 2011/12 is he eerstmals in den IBU-Cup antreeden un hett as 31. vun den Sprint in Östersund glieks sien eerst Punkte haalt. In den wiederen Saisonverloop hett he sück bit up Rang 5 bi en Sprint in Obertilliach verbetert. Sien eerst internatschonalen Titelkämpe bi de Utwussen hett he bi de Europameesterschapen 2012 in Osrblie bestreeden. Dor belegg he in’n Sprint Platz 7 un wunn an de Siet vun Daniel Böhm, Matthias Bischl un Erik Lesser den Europameestertitel in dat Staffelrennen. Up de darte Statschoon vun de Weltcup-Saison 2012/2013 in Pokljuka is Kühn eerstmals in’n Biathlon-Weltcup antreeden un belegg bi sien Debüt in‘n Sprint mit een Scheetfehler Rang 17, womit he sien eerst Weltcuppunkte halen dee.[7] Mit 39 Weltcup-Punkten belegg he an dat Enn’n vun de Saison Platz in de Gesamtwertung. Bei de Europameesterschapen 2013 hett he sück in’n Teelsprint de rechte Schuller braken. [5]

In de Saisons van 2013 bit 2016 is Kühn överweegend in’n IBU-Cup antreeden un kreeg blots af un an mal Insätze in dat düütsch Weltcupeam. In‘n Januar 2015 wunn he in Duszniki-Zdrój mit twee fehlerfree Scheeten en IBU-Cup-Sprint vör Henrik L’Abée-Lund. Nah wiederen Podestergevnissen keem Kühn an‘t Saisonenn’n up den 4. Platz in de Gesamtwertung vun de Reeg. He wurr ansluutend för dat Weltcupfinale in‘n März 2015 in Chanty-Mansijsk nomineert, wo he as Teihnt vun den Sprints sien eerst Top-Ten-Ergevnis in disse Wettkamppreeg recken dee. Mit 95 Punkten keem he in de Saison up den 54. Platz in de Gesamtwertung.

2015/16 hörr Kühn bi de Rennen in Ruhpolding to dat düütsch Weltcupupgebot: In dat 20-Kilometer-Eenzelrennen leep he dor de flinkste Tiet un keem mit veer Scheetfehlern noch up Platz 21; in de Staffel keem he Führender to dat Stahndscheeten, full aber mit dree Straafrunnen düütluch torüch. Dat düütsch Quartett um Erik Lesser, Kühn, Arnd Peiffer und Benedikt Doll keem denn blots up Platz 5.[8] In de Weltcup-Gesamtwertung keem he up Platz 80 (wurr aber ok blots tweemal insett). Aber de Saison geev ok all mal en Henblick dorup, wat sien Stärken un Schwächen weern. Bi’t Loopen weer he immer temelk wiet vörn, bi dat Liggendscheeten weer he nich schlecht, harr aber immer mal weer Probleme bi dat Stahndscheeten. Keem he dor ahn Fehler dör, reck he meest immer goot Platzeeren.

Wegen en nochmaligen Schullerbröök in’n November 2016 muss Kühn in de Saison 2016/17 utsetten.[9]

Fastsetten in dat Weltcupteam un Olympiadeelnahmen (siet 2017)

[ännern | Bornkood ännern]
Kühn bi den Weltcup in‘n Januar 2020 in Oberhof

In dat Fröhjohr 2017 thett de Düütsch Skiverband Kühn in de to dissen Tietpunkt söben Lüüd umfaaten Lehrgangsgrupp 1a indeelt, in de he ünner annern gemeensam mit den Weltmeestern Benedikt Doll, Erik Lesser, Arnd Peiffer un Simon Schempp traineeren dee.[10] In den folgend Wintern kreeg Kühn en fasten Platz in de eerst düütsch Mannschap un is meest immer in’n Weltcup mit dorbi ween. In’t Loopen hörr he to de weltwiet starksten Biathleten, wiels he in’t Stahndscheeten dörsnittlich mit weniger as 70 % vun sien Schööt drapen dee.[11] Bi den Weltcupsprint in Nové Město in‘n März 2021 hett he in den Stahndanslag all fiev Schieven nich drapen un hett den Wettkamp ok nich afslooten.[12]

In den Gesamtweltcup platzeer sück Kühn tüschen 2017 un 2024 mit Utnahm vun de Saison 2020/21 (Platz 46) jewiels ünner de eerst 30. Sien best Gesamtresultat reck he as Elfter – un dormit dartbest Düütsch nah Doll un Lesser – in‘n Winter 2021/22. Twee Johr later wurr he as best düütsch Biathlet in de Gesamtwertung Twalft.[13] In‘n Dezember 2018 stunn Kühn to’n eersten Mal in en Weltcuprennen up dat Podest: Bi den 20-Kilometer-Wettkamp in Pokljuka bleev he ahn Scheetfehler un keem wenige Sekunnen achter Martin Fourcade up den tweeten Platz.[14] Den eersten Weltcupsieg fier Kühn in‘n Dezember 2021 in den Sprint vun Hochfilzen, wo he blots eenmal vörbischeeten dee un mit Loopbesttiet vör Martin Ponsiluoma keem.[15] In de ansluutend Verfolgung hull he de Führung bit to dat letzt Scheeten un full denn mit dree Fehlschööt ut de vördere Ränge herut. [16]

In de Saison 2024/25 gelung hüm, wat he tovör noch nie nich schafft harr. He wunn dat eerste Mal bi Biathlon-Weltmeesterschapen en Medaille. An die Siet vun Philipp Nawrath, Danilo Riethmüller un Philipp Horn reck he in de Staffel de Bronzemedaille, wobi he as Eenziger vun dit Quartett ahn Fehler bleev. In den Gesamt-Weltcup belegg he an dat Enn'n vun de Saison Rang 32.

Sowohl bi den Olympischen Winterspelen 2018 in Pyeongchang as ok bi Olympia 2022 in Peking hörr Kühn to den düütschen Kader, bleev aber jewiels ahn Medaille.

Johannes Kühn. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen

[ännern | Bornkood ännern]
  1. he/Mühldorfer Anzeiger: Tüßling ist "aus dem Häuschen" up innsalzach24.de. 4. Februar 2010. Afropen an’n 22. Oktober 2023.
  2. Biathlet Kühn ist Weltmeister im Sprint up ovb-online.de. 2. Februar 2010. Afropen an’n 22. Oktober 2023.
  3. a b Profil vun Johannes Kühn auf viessmann climate solutions. Afropen an’n 22. Oktober 2023.
  4. Stephanie Brenninger: »Ich hoffe, dass möglichst viele Rennen stattfinden werden« up traunsteiner-tagblatt.de. 11. November 2020. Afropen an’n 22. Oktober 2023.
  5. a b c Profil vun Johannes Kühn up dsv-jahrbuch.de. Afropen an’n 22. Oktober 2023.
  6. Markus Lüttgens: Deutsche Kader-Einteilungen im Biathlon offiziell bekanntgegeben (Memento von’n 22. Mai 2011 in dat Internet Archive) up biathlon-online.de.
  7. SID: Deutsche Biathleten enttäuschen in Pokljuka up merkur.de. 13. Dezember 2012. Afropen an’n 22. Oktober 2023.
  8. Saskia Aleythe: Johannes Kühn wird es schwindelig in Ruhpolding up sueddeutsche.de. 15. Januar 2016. Afropen an’n 22. Oktober 2023.
  9. Biathlet Kühn muss pausieren up deutscherskiverband.de. 16. November 2016. Afropen an’n 22. Oktober 2023; Biathlet Johannes Kühn kämpft sich zurück up ovb-online.de. 17. Februar 2017. Afropen an’n 22. Oktober 2023.
  10. Andreas Mayr: Nach Dahlmeier: Bald weiterer Werdenfelser im Weltcup? up merkur.de. 16. Juni 2017. Afropen an’n 22. Oktober 2023.
  11. dpa: Neun Schuss ins Schwarze: Johannes Kühn landet auf Rang drei up welt.de. 10. Januar 2020. Afropen an’n 22. Oktober 2023. Tüschen 2017/18 un 2022/23 harr Kühn stahnd en Quote tüschen 62 % un 68 % harr, liggend aber in sien best Saison 2019/20 en vun 94 %.
  12. SID: „Ich war mental am Ende“ up faz.net. 9. März 2021. Afropen an’n 22. Oktober 2023.
  13. Franz Aichinger: Johannes Kühn bester Deutscher im Gesamtweltcup – Biathlet aus Tüßling beendet konstante Saison auf dem 12. Platz up pnp.de. 19. März 2024. Afropen an’n 13. April 2024.
  14. Volker Kreisl: Kühn rüttelt an der Biathlon-Ordnung up sueddeutsche.de. 4. Dezember 2018. Afropen an’n 22. Oktober 2023.
  15. dpa: Biathlon-Überraschung durch Kühn - Schempp: "Hut ab" up sueddeutsche.de. 10. Dezember 2021. Afropen an’n 22. Oktober 2023.
  16. Volker Kreisl: Stärker als der Oberschenkel up sueddeutsche.de. 12. Dezember 2021. Afropen an’n 22. Oktober 2023.