Jeffrey Alan Hoffman

Offiziell NASA-Foto

Jeffrey Alan Hoffman (* 2. November 1944 in Brooklyn, New York) is en ehmalger US-amerikaansch Astronaut.

Utbillen

Hoffman kreeg 1966 en Bachelor in Astronomie vun dat Amherst College un 1971 sien Doktertitel in Astrophysik vun de Harvard University. 1988 kreeg he noch en Master in Materialwetenschapen vun de Rice University.

Van 1972 bit 1975 hett Hoffman an de University of Leicester in Grootbritannien an de Entwicklung vun verscheeden Weltruumröntgenteleskopen un anner Experimenten to de Röntgenstrahlung arbeit. So weer he ok an en Röntgenexperiment för den Satelliten EXOSAT vun de ESA bedeeligt.

Van 1975 bit 1978 hett he as Projektwetenschapler in dat Weltruumforschungszentrum vun dat Massachusetts Institute of Technology (MIT) arbeit.

Loopbahn as Astronaut

In‘n Januar 1978 wurr Hoffman vun de NASA as Astronautenanwärter utwählt. Wiels de Vörbereiten to de eerst Shuttle-Flüüg hett he an dat Floogsimulatschonslabor in Downey arbeit. He weer Liddmaat vun de Ünnerstüttensmannschap för de Space-Shuttle-Mission STS-5 un hett as Verbinnensspreker (CAPCOM) för de Missionen STS-8 un STS-82 arbeit. Wiederhen weer he Repräsentant vun dat Astronautenbüro för Bruuklastsekerheit. He hett an de Entwicklung vun en Ruumantoog för Weltruumutstiege un an den Vörbereitungen för den Upbau vun de Internatschonale Ruumstatschoon (ISS) arbeit. 1996 wurr he Leiter vun de Afdeelen Payload and Habitability vun dat Astronautenbüro.

STS-41-F

De Mission STS-41-F weer för August 1984 mit de Ruumfähre Discovery plaant, Dat weer de eerste Floog vun de Discovery ween, wenn de nich wegen Verspätungen vun de Bruuklast afseggt wurrn weer. Als Besatten weern Karol Joseph Bobko, Donald Edward Williams, Rhea Seddon, David Griggs un Jeffrey Hoffman vörsehn. De Floog wurr denn STS-51-E.

STS-51-E

Disse Floog vun de Ruumfähre Challenger wurr wegen Probleme vun de IUS-Böverstuuf afseggt. Upgaav weer dat Usetten vun en TDRS-Satellit. As Besatten weern nebst Hoffman Karol Bobko, Donald Williams, Rhea Seddon, David Griggs, de franzöösch Bruuklastspezialist Patrick Baudry un de Politiker Jake Garn vörsehn.

STS-51-D

Hoffman un Griggs wiels den Weltruumutstieg

An‘n 12. April 1985 is Hoffman as Missionsspezialist mit de Ruumfähre Discovery to eersten Mal in’t All start. De Crew weer meest de sülvige as bi STS-51-E, statt Baudry weer nu aber de Bruuklastspezialist Charles David Walker an Bord. Bruuklast weern de beid Satelliten TELESAT-9 un LEASAT-3. Bi den letzteren funktschoneer de automatische Inbedrievnahm vun de Anten un dat Drievwark aber nich. Bi en Weltruumutstieg kunn Hoffman mit sien Astronautenkolleeg David Griggs dissen Defekt nich beheeven. Nah meest 7 Daag in’n All weer de Mission an’n 19. April 1985 afslooten.

STS-61-E

De Mission STS-61-E mit de Ruumfähre Columbia harr in’n März 1986 de ASTRO-1-Spacelab-Mission in’t All bringen sullen. Nah dat Challenger-Unglück wurr disse Floog afseggt. De Mannschap harr ut Jon Andrew McBride, Richard Noel Richards, David Cornell Leestma, Jeffrey Hoffman, Robert Parker, Samuel Thornton Durrance un Ronald Anthony Parise bestahn.

STS-71-A

De Mission STS-71-A mit de Ruumfähre Atlantis harr an’n 12. Januar 1987 de ASTRO-2-Spacelab-Mission in’t All bringen sullen. Nah dat Challenger Unglück wurr ok disse Mission afseggt. De Mannschap harr ut Jon McBride, Richard Richards, David Leestma, Jeffrey Hoffman, Robert Parker, Bruuklastspezialist Kenneth Hugh Nordsieck as ok een vun de beid wiederen Bruuklastspezialisten Samuel Durrance un Ronald Parise bestahn.

STS-35

An‘n 2. Dezember 1990 is Hoffman as Missionsspezialist ünner dat Kommando vun Vance DeVoe Brand mit de Ruumfähre Columbia in’n All flagen. Pilot bi disse Mission weer Guy Spence Gardner, de anner Missionsspezialisten John Michael Lounge un Robert Parker. Dorto keemen de Bruuklastspezialisten Samuel Durrance und Ronald Parise. Bi disse Mission kem dat to Startverzögerungen, so dat dat eerste Mal in de Geschichte twee Space Shuttles startbereit up de Startrampen tegenöverstunnen. Hööftteel vun de Mission weern astronomische Beobachtungen mit den Redschoppen vun de ASTRO-1-Plattform in den Beriek vun UV- un Röntgenstrahlen. Wiels de Mission, de bit 11. Dezember vun dat Johr düern dee (meest negen Daag) geev dat eenige technische Probleme; so leepen bispeelswies de Displays to dat Utrichten vun de ASTRO-1-Teleskope nich. De Teleskope mussen dorüm vun de Eer ut stüürt wurrn. De wetenschaplich Teelen kunnen aber liekers to ruch weg 70 Perzent reckt wurrn.

STS-46

Hoffman is mit dat Space Shuttle Atlantis an‘n 31. Juli 1992 to de Mission STS-46 start. Kommandant bi disse Mission weer Loren James Shriver un de Pilot Andrew Michael Allen. De Missionsspezialisten weern Hoffman, de Swiezer Claude Nicollier vun de ESA, Franklin Ramón Chang-Díaz, Marsha Sue Ivins. Dorto keem de Bruuklastspezialist Franco Malerba ut Italien. Wiels den 8 Daag lang düern Floog wurr de Satellit EURECA utsett, as ok dat Tethered Satellite System (TSS) utprobeert.

STS-61

Hoffman bei der dritten EVA während STS-61

En ganz erfohren Crew weer bi disse Mission an Bord vun de Ruumfähre Endeavour. Kommandant Richard Oswalt Covey weer to’n veerten Mal in’t All, Pilot Kenneth Dwayne Bowersox weer to’n tweeten Mal dorbi. Missionsspezialisten weern Hoffman (veert Floog), Franklin Story Musgrave (5), Kathryn Ryan Cordell Thornton (3), Claude Nicollier (2) un Thomas Dale Akers (3). De Start weer an’n 2. Dezember 1993. Dat weer de eerste Reparaturmission vun dat Hubble-Weltruumteleskop (HST). De Hööftspeegel vun dat dreeeenhalv Johr tovör start Observatorium weer fehlerhaft, wat to unscharp Biller führen dee. Hoffman nehm an dree vun de fief Butenbordarbeiten (EVAs) deel, de notwennig weern, um dat Korrekturinstrument COSTAR- un de WF/PC-II-Kamera to installeeren. Buterdem wurrn de Solarpaneele to de Stroomversörgen vun dat HST ersett. Nah meest 11 Daag weer de Mission an’n 13. Dezember afslooten.

STS-75

Veer Mann ut de STS-46-Mission weern ok bi disse Mission dorbi. Andrew Allen weer ditmal Kommandant, Pilot weer Scott Jay Horowitz. Hoffman, Chang- Díaz un Claude Nicollier, weern all bi STS-46. Dorto keem noch de Italiener Maurizio Cheli för de ESA as Missionsspezialist un Umberto Guidoni as Bruuklastspezialist. Los gung dat an’n 22. Februar 1996 an Bord vun de Ruumfähre Columbia un düer 15 Daag un meest 18 Stünnen. Dat weer Hoffman sien letzte Mission. Hööftupgaven weern dat nochmalig Utsetten vun en Tethered Satellite System (TSS) un Experimente mit de United States Microgravity Payload (USMP-3). TSS demonstreerte spoodriek de Mögelkeiten, mit en spannt Kabel Elektrizität to produzeeren. Dat TSS-Experiment leefer wertvull Ergevnisse, bevör dat över 19 km lang utfohren Kabel rieten dee.

Nah der NASA

In‘n Juli 1997 is Hoffman ut dat Astronautenprogramm utscheeden un wurr Europarepräsentant vun de NASA in Paris. Dor weer he för de Koordinatschoon vun de Weltruumprojekte vun de USA un Europa tostännig. Af August 2001 wessel he as Perfesser för Luft- un Ruumfohrt to dat Massachusetts Institute of Technology (MIT). Siet 2005 is Hoffman leitend Mitarbeiter vun dat Massachusetts Space Grant Consortium in de Luft- un Ruumfahrtafdeelen vun dat MIT.

Privates

Jeffrey Hoffman is verheiraadt un hett twee Kinner. Hoffman weer de eerste amerikaansch-jöödsch Astronaut. Bi sien Flüüg in dat Weltall hett he jöödsch Gegenstände mit sück führt, etwa en lütten Chanukka-Lüchter oder en Dreidel. 1996, bi sien letzt Mission, hett he en Tora mit an Bord vun dat Space Shuttle Columbia nommen.

He is in de Astronaut Hall of Fame upnommen wurrn.

Weblinks

Jeffrey Alan Hoffman. Mehr Biller, Videos oder Audiodateien to’t Thema gifft dat bi Wikimedia Commons.

• Körtbiographie bi spacefacts.de
• NASA-Biographie (engelsch)