James Alton McDivitt

Offiziell NASA-Foto

James Alton McDivitt (* 10. Juni 1929 in Chicago, Illinois; † 13. Oktober 2022 in Tucson, Arizona) weer en US-amerikaansch Astronaut. Sowohl in dat Gemini- as ok in dat Apollo-Programm kommandeer he jewiels en vun de eerst Flüüg mit de nee Ruumschippen.

Anfang vun sien Loopbahn

James McDivitt hett Scholen in Kalamazoo (Michigan) un Jackson (Michigan) besöcht. Wiel wegen den Koreakrieg sien Inberopen sowieso bevörstunn, hett sück McDivitt to’n Januar 1951 freewillig to de US-Luftwappen melld. An de Williams Air Force Base in Arizona wurr he to’n Pilot von Kampfloogtüüg utbildt. In den Koreakrieg hett he 145 Kampinsätze up de Typen F-80 un F-86 flagen. In‘n September 1953 kehr he in de USA torüch un deen in Florida, Maine un New Jersey.

Af Juni 1957 studeer he an de University of Michigan un hett twee Johr later as Best vun sien Johrgang in Luftfohrttechnik afslooten. Ansluutend deen he as Testpilot up den Edwards-Luftwappen-Stüttpunkt in Kalifornien.

He weer Deelnehmer in den eersten Johrgang vun de Aerospace Research Pilot School vun de US-Luftwappen, wo he Frank Borman kennenlehrt hett, de do ras Utbiller arbeiten dee. En Angebot, an dat Dyna-Soar-Programm vun de Luftwappen mittoarbeiten, hett McDivitt alehnt, wiel he nich vun den Spood vun de Ruumgleiter övertüügt weer.

McDivitt harr eegentlich all beslooten, Testpilot för dat Raketenfloogtüüch X-15 to wurrn, as he sück nah anfänglich Bedenken doch bi de NASA as Astronaut bewurben hett. Sien Vörgesetter harr aber kien Verständnis dorför, dat McDivitt de Luftwappen verlaaten wull, un hett hüm för dat X-15-Projekt sparrt.

Gemini

James A. McDivitt in‘n Gemini-Ruumantoog

McDivitt wurr an’n 17. September 1962 mit de tweet Astronautengrupp de Apenlichkeit vörstellt. Af 1963 spezialiseer he sück up de Stüürn un Navigatschoon vun Ruumschippen. An‘n 27. Juli 1964 wurr McDivitt as Kommandant för Gemini 4, den tweeten bemannten Gemini-Floog, nomineert un harr as Weltruumneeling den Vörtoog vör de Mercury-Veteranen Walter Marty Schirra un Leroy Gordon Cooper kreegen. McDivitt weer de eerste vun fief NASA-Astronauten, de all bi hör eersten Floog dat Kommando över en Mehrpersonenruumschipp överdragen wurr. In’n Oktober 1964 weer he de eerste Astronaut, de den nee Gemini-Ruumantoog testen dee.

De Floog vun Gemini 4 funn van’n 3. Juni bit to’n 7. Juni 1965 statt un weer de eerste Gemini-Floog, de mehrere Daag düern dee. Mc Divitt sien Kopilot Ed White hett dorbi den eersten amerikaansch Weltruumutstieg ünnernommen.

Wiels de Mission vun Gemini 5 in‘n August 1965 weer McDivitt een vun de veer Verbinnensspreker (Capcom), de den Funkkuntakt to dat Ruumschipp hullen.

Apollo

In‘n Dezember 1965 wurr McDivitt as Ersatz-Kommandant för den eersten bemannten Floog vun dat Apollo-Ruumschipp nomineert. In’n Dezember 1966, noch vör dat Unglück vun Apollo 1 hett de NASA de Plaans ännert un hett McDivitt un sien Mannschap (Rusty Schweickart un David Randolph Scott) stattdessen den tweeten bemannten Floog de so nöömt D-Mission, as Hööftmannschap towiest. Dat wurr vun de NASA an’n 20. November 1967 so bekannt maakt. Toeerst wurr disse Floog as Apollo 8 plaant. Nah den spoodrieken Insatz vun Apollo 7 wurr aber en Maandfloog dörtüschen schaven, so dat de Floog vun McDivitt nu as Apollo 9 stattfunn.

Van‘n 3. März bit to‘n 13. März 1969 hemm McDivitt un sien Mannschap dat Apollo-Ruumschipp un de Maandlandefähre in de Eerdumloopbahn uttest. Dorbi sünd McDivitt un Schweickart as eerst Minschen dör en Tunnel vun en Ruumfohrtüüg in en anner umsteegen.

Nah dissen spoodrieken Ruumfloog hett McDivitt Managementfunktschonen binnerhalv vun e NASA övernommen. He wurr Baas vun dat Team vun dat Maandforschungsprogramm un Programmleiter vun de Apollo-Missionen 12 bit 16.

Nah de NASA

McDivitt is to’n 1. Januar 1972 ut de NASA un to’n 1. Juni 1972 ut de US-Luftwappen utscheeden. Dornah wurr he Viezpräsident för Corporate Affairs vun de Consumers Power Company. In‘n März 1975 wurr he Viezpräsident un Direkter vun de Pullman Inc. In‘n Oktober 1975 steeg he to’n Präsidenten vun de Pullman Standard Division (Railcar Division) up un hett as Baas vun de Leasing-, Technologie- un Konstruktschonsafdeelen arbeit. In‘n Januar 1981 wurr he Senior-Viezpräsident för Regeerensupgaven un internatschonale Angelegenheiten vun de Rockwell International Corporation in Washington, D.C.

McDivitt weer tweemal verheiraadt. He harr veer Kinner ut sien eerst Ehe un twee Steefkinner ut de eerst Ehe vun sien Fru. He is in de Astronaut Hall of Fame upnommen wurrn.

Weblinks

James Alton McDivitt. Mehr Biller, Videos oder Audiodateien to’t Thema gifft dat bi Wikimedia Commons.

• Daalschrift vun en NASA-Interview van 1999 in dat JSC Oral History Project, 110 Sieden, 306 kB PDF (engelsch)