Jacob van Eyck

Vun Wikipedia

Jacob van Eyck (* um 1590 rüm in Heusden?; † 26. Märt 1657 in Utrecht) is en nedderlannschen Musikus un Komponist ween.

Klokkenspeeler un Klokkenkunnigen[ännern | Bornkood ännern]

Jacob van Eyck is wohrschienlich in Heusden as Kind vun adelige Öllern boren wurrn. Al bi siene Geboort weer he blind. In Heusden is he to en Klockenkunnigen un Klockenspeeler wurrn. Heusden hett man een lüttjet Carillon harrt, dat in den Toorn vun dat Raathuus unnerbrocht weer. 1623 reis he to'n eersten Mol na Utrecht, um dor Raatsläge vör to bringen, wie dat Klokkenspeel vun den Dom to Utrecht verbetert weern konn. 1625 is he denn to'n Beiaardier (Klokkenspeeler) vun den Dom beropen wurrn. Later hett he datsülvige Amt utöövt an de Janskerk to Utrecht, de Jacobikerk to Utrecht un an dat Utrechter Raathuus. 1628 is he Direkteur van de Klokwerken in Utrecht wurrn. In düt Amt wüss he veel Verbeterung ut to föhren in den Klockenbestand vun de Stadt. He is ok unnerwegens ween na annere Städer hen, um dor Raatsläge af to geven, wie de Klockenspeele verbetert weern konnen. Van Eyck sien Kennis hett unbannig veel bidragen to de Fraag, wie dat mit dat Klockenspeel wietergahn dö. He hett utfunnen, wie de Toonstruktuur vun Klocken tohopenföögt is un wie een dor, dör de Form vun de Klocken an rumfummeln kann. Düt Weten is in Praxis umsett wurrn, as he mit Pieter un François Hemony tosamenarbeiden dö, de he in Zutfent drapen harr. Tohopen hefft se de eersten Carillons gaten, de en gode Stimme harrt hefft. Vunwegen, datt van Eyck sik dor achter klemmen dö, hefft de Jacobikerk un de Nicolaikerk in Utrecht later en nee Hemony-Klockenspeel kregen. Bi den Dom weer dat eerst en poor Johre na Van Eyck sien Dood so wiet.

Blockflötenspeeler un Komponist[ännern | Bornkood ännern]

In siene Freetied weer Jacob van Eyck ok en begnadigten Blockflötenspeeler. An Summeravende hett he de Spazeergängers up den Janskerkhof mit sien virtuoos Flötenspeel unnerholen. 1640 warrt dor to'n eersten Mol vun snackt un vun 1649 af an hett Van Eyck dor vun dat Janskapittel extra för betahlt kregen. 1644 füng he an un hett siene Kompositschonen för Blockflöte in Druck gahn laten. De Sammlung Der Fluyten Lust-hof is in twee Deele rutkamen (in dree Afsnitte) un weer toschreven an den beröhmten Dichter Constantijn Huygens, de en fernen Neffen vun Van Eyck ween is.

Der Fluyten Lust-hof ümfaat so bi 150 Stücke, sunnerlich Regen vun Variatschonen över populäre Melodien un Psalmen. Dorbi geiht Van Eyck dor bi un „brickt“ de Melodien: He sett de Themanoten is jummers lüttjere Notenweerte üm (Diminutschoon) un maakt so dat Speelen jummers swaarer. Ok vunwegen, datt he bi de Eenstimmigheit blieven dö, maakt sien Stil en sunnerlich upsmückten (ornmentalen) Indruck.

2007 weer dat Gedenkjohr för Van Eyck. An den Foot vun den Domtoorn in Utrecht is in düt Johr en Gedenkteken in de Straat anbröcht wurrn.

Literatuur[ännern | Bornkood ännern]

  • Jacob van Eyck, Der Fluyten Lust-hof. New Vellekoop Edition, edited by Thiemo Wind, Muziekuitgeverij XYZ, Naarden 1986-1988. 3 Deele.
  • Ruth van Baak Griffioen, Jacob van Eyck's "Der Fluyten Lust-hof". Vereniging voor Nederlandse Muziekgeschiedenis, Utrecht 1991, ISBN 90-6375-151-6
  • Thiemo Wind, Jacob van Eyck en de anderen - Nederlands solorepertoire voor blokfluit in de Gouden Eeuw. Dissertatschoon Universiteit Utrecht, 2006.
  • Thiemo Wind, In Fluyt en Klokken-spel een aller eeuwen wonder - Jacob van Eyck: stadsbeiaardier, klokkendeskundige, blokfluitist en componist, in: Maandblad Oud-Utrecht, Januar 2007, S. 4-9

Weblenken[ännern | Bornkood ännern]